Jesaja 24
24
Daut Launt woat vewust aus eene Bestrofunk derch Gott
1Kjikj, de Har moakt daut Launt ladich un drieecht daut ut; un hee dreit siene Bowaschicht om un vestreit siene Bewona. 2Un aus däm Volkj, soo jeit daut däm Priesta; aus däm Kjnajcht, soo sienem Harn; aus de Deenstmejal, soo äare Jebeedarin; aus däm dee doa kjaft, soo däm Vekjeepa; aus däm dee doa liet, soo däm dee utliet; aus däm Schildna, soo sienem Monenden. 3Daut Launt woat gaunz ladich un jeplindat; dan Gott haft dit Wuat jerät. 4Daut truat, daut Launt walkjt; daut schmacht, de Ieedkjreis walkjt han; daut schmachten de Hechten vom Volkj em Launt han. 5Un de Ieed es unja äare Bewona entheilicht jeworden; dan see ha de Jesazen äwaträden, de Jebooten äwaschräden, däm eewjen Bunt jebroaken. 6Doarom haft de Fluch de Ieed jefräten, un äare Bewona woaren jestroft; doarom sent de Ieedbewona vebrent, un weinich Menschen bliewen äwa. 7Daut truat de junga Wien, daut veschmacht de Wienstock; daut seften aula, dee von Hoaten froo wieren; 8de Freid de Trompeeten es vebie, oppjehieet haft daut frooe Jeschrecht, de Freid de Hoap rut; 9maun drinkjt kjeenen Wien mea unja Jesank, betta schmakjt daut stoakje Jedrenkj dän, dee daut drinkjen. 10Vewiest es de ladje Staut, veschloten jiedret Hus, soo daut kjeena nengonen kaun. 11Kloag Jeschrecht om däm Wien es opp de Gaussen; unjajegonen es aule Freid, wajchjegonen es de Freid von de Ieed. 12Von de Staut es blooss eene Wieste äwajebläwen, un en Trimma woaren de Dooasch veschloagen. 13Dan soo woat daut enne Medd de Ieed passieren, en de Medd de Velkja: Aus biem Eeljbäaren aufschlonen, aus biem noläsen, wan de Wienarnte too Enj es.
14Jane (de Entkomne ut de Vestreiung Israels) woaren äare Stemm opphäwen, woaren jublen. Äwa de Majestät Gottes jublen see vom Mäa. 15Doarom jeft däm Harn Iea em Oosten, opp de Inslen em Mäa däm Nomen Gottes, däm Gott Israels! 16Wie hieren von de Enj de Ieed Jesank: «Harlichkjeit däm Jerajchten!» Doa säd ekj: Ekj vego, ekj vego, wee mie! Reibasch roowen, un reibarisch roowen de Reibasch an. 17Schrakj un Kul un Strank komen äwa die, Bewona de Ieed! 18Un daut passieed, wäa ver de grulje Stemm rant, felt enne Kul; un wäa ut de Kul nohecht sticht, woat em Strank jefangen. Dan de Fensta en de Hechten doonen sikj op, un daut häwen sikj de Gruntfausten de Ieed opp. 19De Ieed brakjt utenaunda, de Ieed vebrakjt, de Ieed wankt han un häa; 20de Ieed stolpat (tomelt, schwankt) aus een Bedrunkna un schokelt aus een Henjbad; un äare Äwaträdunk licht schwoa opp ar: Un see felt un steit nich wada opp.
21Un daut woat passieren aun janem Dach, doa woat de Har strofen de bowaschten Harscha de Hechten, un Kjennichs de Ieed oppe Ieed. 22Un see woaren en de Kul enjeschloten, aus maun Jefangne ennspoat, un em Jefenkjnis enjeschloten; un no väle Doag woaren see bestroft woaren. 23Un de Mon woat met Schaund bedakjt un de Sonn beschämt woaren; dan Gott de Häaschoa harscht aus Kjennich opp däm Boajch Zion un en Jerusalem, un ver sienem Eltestasch es Harlichkjeit.
Currently Selected:
Jesaja 24: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
