Jesaja 11
11
Daut tookjinftje Frädensrikj von Christus
1Un een Auflaja woat ut däm Boomstobben Isai väakomen, un een Aust ut siene Wartel woat Frucht brinjen. 2Un opp am woat de Jeist Gottes ruen, de Jeist de Woarheit un daut Vestentnis, de Rotjeist un de Krauft, de Jeist de Erkjantnis un Forcht Gottes; 3un sien Wooljefaulen woat sennen aun de Forcht Gottes. Un hee woat nich nom seenen von siene Uagen rechten, un nich Rajcht spräakjen nom Hieren von siene Uaren; 4un hee woat de Jerinje en Jerajchtichkjeit rechten, un däm Deemootjen em Launt en Jerajchtichkjeit Rajcht spräakjen. Un hee woat de Ieed met de Wäd ut sienem Mul schlonen, un met däm Odem siene Leppen däm Gottloosen dootmoaken. 5Un Jerajchtichkjeit woat de Jirtel von siene Lenden sennen, un de Tru de Jirtel om siene Hoften sennen.
6Un de Wulf woat biem Laum weiden, un de Leopard bie däm kjlienen Bock ligjen; un daut Kaulf un de junga Leiw un daut Mastfee woaren toop sennen, un een kjliena Jung woat an joagen. 7De Koo un Boa woaren metenaunda weiden, äare Junge ligjen toop; un de Leiw woat Stroo fräten aus daut Rind. 8Un daut Brostkjint woat aun däm Natta Loch spälen, un daut aufjewande Kjint siene Haunt utstrakjen no de Heel de Jeftschlang. 9Maun woat nich Iebel doonen, noch vedorwen haundlen opp mienem gaunzen heiljen Boajch; dan de Ieed woat voll de Erkjantnis Gottes sennen, soo aus daut Wota däm Mäaresgrunt bedakjen.
10Un daut woat passieren aun janem Dach: De Wartelauflaja Isai, dee doa steit aus een Tieekjen fa de Velkja, no am woaren de Nazionen froagen; un siene Rustäd woat Harlichkjeit sennen.
11Un daut woat passieren aun janem Dach, doa woat de Har noch toom tweeden Mol siene Haunt utstrakjen, om de Äwajebläwne von sienem Volkj, dee äwabliewen woat, loostokjeepen ut Assur un ut Ägipten un ut Patros un ut Ätiopien un ut Elam un ut Sinear un ut Hamat un ut de Mäaresinsle. 12Un hee woat fa de Nazionen een Tieekjen opphäwen un de Veschlapte Israels toopbrinjen, un de Vestreide Juda woat hee saumlen von de 4 Enj de Ieed. 13Un de Aufgonst Efraims woat veschwinjen, un de Bedrenja Juda woaren utjerot woaren; Efraim woat Juda nich beneiden, un Juda woat Efraim nich bedrenjen. 14Un see woaren de Filista oppe Schulren flieejen - jäajen Wasten, woaren metenaunda de Säns - vom Oosten plindre; aun Edom un Moab woaren see äare Haunt lajen, un de Kjinja Amon woaren an horchen. 15Un de Har woat de Mäarestung Ägiptens vebaunen; un hee woat siene Haunt äwa däm Stroom hoolen met de Gloot von sienem Frodem, un an en 7 Riee veschlonen un moaken, daut maun met Schoo doa derch jeit. 16Un soo woat eene Gauss sennen von Assur häa fa de Äwajebläwne ut sienem Volkj, dee äwabliewen woat, aus eene Gauss fa Israel wia aun janem Dach, doa aus see ut däm Launt Ägipten nopptrocken.
Currently Selected:
Jesaja 11: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
