Esta 3
3
Haman un Mordechai – Aunschlach von Haman jäajen de Juden
1No dise Bejäwenheit muak de Kjennich Ahasveros Haman, Hamedata sienem Sän, däm Agagita, groot, un hee erhoof am un sad sienem Stool äwa aule Ferschten, dee bie am wieren. 2Un aule Kjennichskjnajchts, dee em Kjennichsdooa wieren, kjneeden sikj un schmeeten sikj ver Haman dol; dan aulsoo haud de Kjennich befoolen. Oba Mordechai kjneed un bekjt sikj nich dol. 3Doa säden de Kjennichskjnajchts, dee em Kjennichsdooa wieren, too Mordechai: Wuarom jehorchst du daut Kjennichsjeboot nich? 4Un daut passieed, aus see am daut Dach fa Dach säden, un hee nich opp an hieed, soo berechten see daut Haman, om to seenen, auf Mordechai siene Wieed bestonen wudden; dan hee haud an jesajcht, daut hee een Jud wia. 5Un aus Haman sach, daut Mordechai sikj nich ver am bekjt un dol foll, doa wort Haman voll Jrim. 6Oba hee veacht daut en siene Uagen, de Haunt auleen aun Mordechai too lajen; dan maun haud am Mordechai sien Volkj toweeten loten. Un Haman socht aule Juden, dee em gaunzen Kjennichrikj Ahasveros wieren, daut Volkj von Mordechai, too vetiljen.
7Aum ieeschten Moonat Nisan, em 12-ten Joa vom Kjennich Ahasveros, schmeet maun daut Pur, daut es daut Loss, ver Haman, von Dach too Dach un von Moonat too Moonat, bat däm 12-ten Moonat, daut es de Moonat Adar. 8Un Haman säd toom Kjennich Ahasveros: Doa es een Volkj, vestreit un aufjesondat unja de Velkja en aule Lenda von dienem Kjennichrikj; un äare Jesazen sent von aule Velkja gaunz aundasch, un de Jesazen vom Kjennich doonen see nich; un daut jeziemt sikj nich fa däm Kjennich, an en Ru to loten. 9Wan daut däm Kjennich rajcht es, soo lot am schriewen, daut maun an ombrinjt; un ekj well 10 000 Talent Selwa en dee äare Henj aufwäaje, dee Deena, dee daut Jeschaftliche doonen, daut see daut enne Kjennichsschatskoma brinjen. 10Doa naum de Kjennich sienen Säajelrinkj von siene Haunt un jeef am Haman, Hammedata sienem Sän, däm Agagita, däm Fiend de Juden. 11Un de Kjennich säd to Haman: Daut Selwa jäw ekj die, un daut Volkj, om met am to doonen, aus daut en diene Uagen rajcht es.
12Doa roopt maun de Kjennichsschriewa em ieeschten Moonat, aum 1dredden Dach; un daut wort no aulem, waut Haman befool, aun de Kjennichsferschte jeschräwen, un aun de Launtfläaja äwa jiedret Launt un aun de Ferschten von eenem jiedren Volkj, no de Schreft von eenem jiedren eenselnen Launt un no de Sproak von eenem jiedrem eenselnen Volkj; daut wort em Nomen vom Kjennich Ahasveros jeschräwen un met däm Kjennichssäajelrinkj vesäajelt. 13Un de Breew worden derch stoakje Booten en aule Kjennichslenda jeschekjt, om aule Juden too vetiljen, auftowarje un omtobrinjen, vom Jungen bat toom Jreis, Kjinja un Frues, aun eenem Dach, aum een dredden em 12-ten Moonat, daut es de Moonat Adar, un om äa Hab un Goot too plindre. 14Un om daut de Befäl en jiedrem eenselnen Launt jedonen woat, woat eene Aufschreft vom Schriewen aun aule Velkja bekaunt jemoakt, doamet see opp disem Dach reed wieren. 15De Booten jinjen opp daut Kjennichswuat schwind ut. Un de Befäl wort enne Burjch Susan bekaunt jejäft. Un de Kjennich un Haman sauten un drunken; oba de Staut Susan wia oppjeräacht.
Currently Selected:
Esta 3: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
