Esta 1
1
Daut Fast en Susa – Äwaträdunk de Kjennijin Waschti
1Un daut wia aun de Doag von Ahasveros, daut es de Ahasveros, dee von Indien bat Ätiopien äwa 127 Lenda rejieed, 2en jane Doag, aus de Kjennich Ahasveros opp sienem Kjennichstroon saut, dee enne Burjch Susan (een Paulaust waut daut dolste vesechat es) wia, 3aum dredden Joa siene Rejierunk, doa muak hee een Gaustmol aul siene Ferschten un Kjnajchts, endäm de Majchtje von Persien un Medien, de Väanämen un de Ferschten de Launtschoften ver am wieren, 4aus hee daut harliche Rikjtum von sienem Kjennichrikj un kostboare Pracht siene Majestät väl Doag seenen leet, nämlich 180 Doag lank.
5Un aus dise Doag erfelt wieren, muak de Kjennich aulem Volkj, daut enne Burjch Susan wia, vom Jratsten bat toom Kjlansten, een Gaustmol von säwen Doag, oppem Hoff em Goaden biem kjennichlichen Paulaust. 6Witte un purpurblaue boomwolne Väahenj wieren faust jemoakt metem Schnua von Bussus un Purpur aun selwane Rinj un witte Marmelsteen Stendasch; Polsta von Golt un Selwa lagen opp eenem Plosta von jreenem un wittem Marmel un Parlsteena un schwoata Marmel. 7Un maun jeef daut Jedrenkj en goldne Jefässa, un de Jefässa wieren vonenaunda veschieden; un daut jeef väl Kjennichswien, no de friehjäwje Kjennichshaunt. 8Un daut Drinkjen wia nom Befäl onen Dwank; dan aulsoo haud de Kjennich aule Bowaschten von sienem Hus befoolen, daut see doonen sullen no jiedrem sienem jefaulen.
9Uk de Kjennijin Waschti muak een Gaustmol fa de Frues em Kjennichshus, vom Kjennich Ahasveros.
10Aum säwenden Dach, aus daut Hoat vom Kjennich froo vom Wien wia, befool hee Mehuman, Bista, Harbona, Bigta, Abagta, Setar un Karkas, de 7 Deena vom Kjennich [Eunuche], dee ver däm Kjennich Ahasveros deenden, 11de Kjennijin Vasti met de kjennichliche Kroon ver däm Kjennich to brinjen, om de Velkja un Ferschten äare Scheenheit to wiesen; dan see wia scheen von Aunseenen. 12Oba de Kjennijin Vasti wäad sikj, opp däm Kjennichswuat too komen, daut ar derch de Kjennichsdeena äwabrocht wort. Doa wort de Kjennich sea oajalich, un sien Oaja flaumd en am opp.
13Un de Kjennich räd to de Weise, dee de Tieden vestunden – (dan aulsoo wort de Kjennichsaunjeläajenheit ver aulem Jesaz- un Rajcht behaundelt; 14un de Näakjste bie am wieren Karschna, Schetar, Admata, Tharsis, Meres, Marsna un Memukan, de 7 Ferschten von Persien un Medien, dee daut Aunjesecht vom Kjennich sagen, dee däm ieeschten Sett em Kjennichrikj hauden:) 15Waut nom Jesaz met de Kjennijin Vasti to doonen, doaväa daut see daut Wuat vom Kjennich Ahasveros derch de Kjennichsdeena nich jedonen haft? 16Doa säd Memukan ver däm Kjennich un de Ferschten: Nich aum Kjennich auleen haft sikj de Kjennijin Vasti vegonen, sonda uk aun aule Ferschten un aun aule Velkja, dee en aule Lenda vom Kjennich Ahasveros wonen. 17Dan daut Vehoolen de Kjennijin woat aun aule Frues bekaunt, soo daut äare Mana veacht en äare Uagen sennen woaren, endäm see sajen woaren: De Kjennich Ahasveros befool, de Kjennijin Vasti ver am to komen, oba see kaum nich! 18Un aun disem Dach woaren de Ferschtine von Persien un Medien, dee daut Vehoolen de Kjennijin erfoaren ha, doavon räden too aule Kjennichsferschte; un daut woat väl Veachtunk un Oaja jäwen. 19Wan däm Kjennich daut jefällt, soo saul een Kjennichsbefäl von am utgonen un woat jeschräwen enne Jesazen de Persa un Meeda, daut et nich aunjeit: Nämlich, daut Vasti nich mea ver däm Kjennich Ahasveros kjemt, un daut de Kjennich äare kjennichliche Iea eene aundre jeft, dee bäta aus dise es. 20Un woat maun däm Befäl vom Kjennich, däm hee jäwen woat, en sienem gaunzen Kjennichrikj hieren, – dan hee es groot – soo woaren aule Frues äare Mana en Iea hoolen, vom Jratsten bat toom Kjlansten.
21Un daut Wuat jefoll däm Kjennich un de Ferschten; un de Kjennich deed no Memukan sienem Wuat. 22Un hee schekjt Breew en aule Kjennichslenda, en jiedrem Launt en äare Schreft, un aun jiedrem Volkj no siene Sproak; daut jiedra Maun Har en sienem Hus sennen sull un no siene Volkjssproak räden sull.
Currently Selected:
Esta 1: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
