Loma 16
16
Amashiwi akuposhanya umutende
1Nkomupela Febi inkashi yenu, nakambi umupyungi uwachilonganino ichaku Kenkiliya. 2Mupokeleleni nga umwina Klistu munenu kubati nimulya abantu baku Lesa bapokelela. Mwafwilisheniko ifyo akokabila pakuti ye aafwilishe abantu abenji pamo nandibo.
3Natuma umutende kuli Pulisila na Akwila,#16.3 Pulisila na Akwila: Boneni mu Imil. 18.2,18,26. abapyungi bananji mumulimo waku Klistu. 4Bali abayipekanya ukuposa ubumi ukwebati basunge ubumi bwanji. Te nebopo nenka ukobatotela, kuntu nakufilonganino fimbi ifyabenafyalo. 5Nkoposha umutende nakambi kubantu bonse abalonganina munanda yabo.
Nkoposha umutende Epinotasi mutemwekwa wanji. Ngu ewatatikilepo ukuchetekela Klistu mu Asiya. 6Muposhe umutende Maliya uyo uwamupyungila ukwinekantu. 7Muposhe umutende nakambi kuli Andilonikasi na Yuniyasi, Abayuda bananji abo twali nabo muchifungo. Mba balishibikilwe ukwinekantu kubatumwa. Ulo nshilachetekela mba bali kale abena Klistu.
8Nkoposha umutende kuli Ampuliyatasi, mutemwekwa wanji muli Bashikulu. 9Muposhe umutende Ubanasi umupyungi munanji muli Klistu na Sitakisi umunanji natemwesha. 10Nkoposha umutende kuli Apelesi, umwina Klistu uwakosa. Mubaposhe umutende abamunanda yakwa Alisitobulasi. 11Muposhe umutende kuli Helodiyoni, Umuyuda munanji, nakuli bawesu abena Klistu abamunanda yakwa Nakisusi.
12Nkoposha umutende kuli Tulayifena nakuli Tulayifosa, bo abapyunga umulimo waku Bashikulu nefiso. Muposhe umutende na Pesisi umutemwekwa wanji, alichitile ifinji mukupyungila Bashikulu. 13Nkoposha umutende kuli Lufusi,#16.13 Lufusi: Boneni muli Mk. 15.21. uwachinchila mukupyungila Bashikulu, nakuli banyina bo abali kubati nibama. 14Nkoposha umutende kuli Asinkilitasi, Fulegoni, Hemesi, Patulobasi, Hemasi, nakuli bawesu bonse abena Klistu abo bekala nabo. 15Nkoposha umutende kuli Filologasi, Yuliya, Neliyasi nenkashi yakwa Olimpasi nakuli bonse abantu baku Lesa bo bekala nabo.
16Muposhanye umutende muchitemweko ichinenene. Abafilonganino fyonse ifyaku Klistu fyamuposha umutende.
Amashiwi aakusambisha akumupwilo
17Nkomupapata, mwe bawesu, chenjeleni nabo abapatukanya abantu pakati kenu nokulenga abanabo ukubifya. Pakuchita mfi balasha ukusambilila uko mwapokelele. Batalukeni! 18Pakuti abo abachita mfi tabapyungilapo Bashikulu Klistu, kuntu bapyungila ifyo bafwaya ukuti bekute nafyo. Namashiwi ayaweme ayakonaula balabepayika abantu banaka muchichetekelo. 19Abantu bonse balyumfwa ifyo munakila Lesa. Echo nkotemwa pamulandu wenu. Nomba nkofwaya ukuti mube nomulangwe pafintu ifiweme. Mwipumfiwapo nefibi. 20Elo Lesa uupela umutende, akumupela ifiso ifyakuchimfishako Satana.
Ubwanshi bwaku Bashikulu Yesu bube namwebo bonse.
21Akomuposha umutende Timoti#16.21 Timoti: Boneni mu Imil. 16.1; 19.22; 20.4. umupyungi munanji, pamo na Lusiyasi, Yasoni na Sosipata Umuyuda munanji.
22Nkomuposha umutende muli Bashikulu nebo ne Tetiyasi kalemba wakalata nji.
23Akomuposha umutende Gayusi, uko nafikila nechilonganino chonse eko chikumanina. Akomuposha umutende Elasitosi kasunga wachipawo ichamumushi nawesu Kwatasi. [ 24Ubwanshi bwaku Bashikulu Yesu Klistu bube namwebo bonse. Ameni.]
Ukulomba kwakumupwilo
25Nomba Lesa uwafiso akomukoselesha ukupitila Mubutumi Bwawama ubo nkoshimika ubusosa ifyaku Yesu Klistu. Mfi fyalifishilwe pamyaka iinji. 26Nomba ichine nchi chalifisululwa ukupitila kufyo abasoseshi balembele. Elo ukupitila nefyo akonkobeshe Lesa uwamuyayaya nokufyumfwila.
27Kuli Lesa uyo uwamulangwe enka, kube umuchinshi muli Yesu Klistu umuyayaya. Ameni.
Chilala New Testament © Bible Society of Zambia, 1998.