Loma 12
12
Ifyabumi bwabwangu muli Klistu
1Nomba, mwe bawesu, pakuti Lesa atukwatila ichisa ichikulu mfi, nkomupapata ukuti mupele imibili yenu nga ichipupilo ichabumi, ichabuta nakambi ichisekesha Lesa. Nji enshila inenene yakulombelamo Lesa. 2Mwiitumpamo mubwikashi bwapanonshi, kuntu lekeni Lesa amupilibule nokumupela ubumi bwabwangu. Elo mwakwishiba ubufwayo bwakwe, ifiweme, ifyalungama nefimusekesha Lesa.
3Ukupitila mufiso ifyo Lesa ampela mubwanshi bwakwe, nkomukonkobesha ukuti mwilokuyitutumuna. Nachine mube nomutembo mumalangulushi enu ukulingana nobukulu bwachichetekelo chenu icho Lesa apela umo-umo pali mwe. 4Twalikwata ifilewa ifinji mumubili umo, kuntu mfi fyonse fyalikwata imilimo yafiko. 5Munshila imo yenka, nafwebo fwe bachetekela, nangu tuli abenji, twaba umubili umo muli Klistu. Echo twalikumbinkana pamo ngefilewa ifyamubili umo. 6Elo tulingile ukubomfya ifyabupe ifipusene-pusene ifyo Lesa apela mubwanshi bwakwe. Nga ubupe bwesu bwakushimika, tububomfye ukulingana nechichetekelo chesu. 7Nga bwakupyunga katupyunge. Nga bwakusambisha, katusambishe. 8Nga bwakukoselesha bambi, katubakoseleshe. Uyo uupela, kalokupela nomutima onse. Uyo ukotungulula atungulule, mwakwipela na uyo uukwatila inkumbu bambi, alokuchita mfi nokutemwa.
9Ukutemwa kwenu kube ukwafikapo. Mupate ichibipile, mutemwe ichiweme. 10Mutemwane ukwinekantu mubuwenu. Mupelane umuchinshi. 11Mupyungile Bashikulu nefiso fyonse. Mwibapo abanang’ani iyowo. 12Mulokusekelela mukulolela kwenu. Shipikisheni munshita shamachushi. Elo mulokulomba lonse. 13Peniko ifyakwafwilisha kubena Klistu banenu abatakwetepo. Pokelelenipo abalwendo namaboko abili.
14Lombeni kuli Lesa ukuti ashukishe abo abakomuchusha. Ina, muchite mfi mwilokubalapishapo iyowo. 15Sekeleleni nabo abakosekelela, elo lileni nabo abakolila. 16Mulokumfwana lonse. Mwiitutumunapo, kuntu mutemwane nabantu bwaka. Mwilokuyilangulukapo ukuba abamulangwe.
17Nga umuntu umo amuchitila ichibi, mwimulandulapo. Mulokuchita ifyo abantu bengasuminisha ukuti fiweme. 18Mweshe ukwikala mumutende nabantu bonse. 19Mwe batemwekwa, mwilandulapo ichibi kumuntu pakuti Lesa eye akumuchusha mubukali bwakwe. Chili kubati nimfilya Amalembo asosa ati, “Balekeni, ninebo nakubalandula. Nakubachusha, efyo asosa shikulu Lesa.”#Deut. 32.35 20Echo, kubati nimfilya Amalembo asosa ati, “Nga chipondo chobe chili nensala, chipeleni ichakulya. Nga alinechilaka, mupeleni amenshi ayakunwa.” Pakuti pakuchita mfi, ulamumfwisha insoni ukwinekantu. 21Mwilokuchimfiwa nobubi, kuntu mubuchimfye mukuchita ifiweme.
Chilala New Testament © Bible Society of Zambia, 1998.