Mateyo 26
26
Bapinga ukwipaya Yesu
(Mk. 14.1-2; Luk. 22.1-2; Yoh. 11.45-53)
1Ulo Yesu ashilile ukulabila amashiwi onse nga, asosele kubakusambila bakwe ati, 2“Mulishibile ukwebati kwashala inshiku shibili ukuti akasuba kakulu ka Chakulya Chakuchilila kafike, elo Umwana wa Muntu akupelwa ukuti asamikwe pamutashi.”
3Elo intungulushi shabachipupila nabakulu ba Bayuda balongene kunanda yakwa Kayafasi, chipupila mukulu. 4Balikusoshanya ukuti basange inshila yakwikatilamo Yesu mubuchenjeshi nokumwipaya. 5Balikusosa ati, “Iyowo, pakasuba ka Chakulya Chakuchilila tepopo, pantu kuti mwayisa kuba ichimfulunganya mubantu.”
Yesu bamusuba amafuta ku Betani
(Mk. 14.3-9; Yoh. 12.1-8)
6Yesu ali mumushi wa Betani, munanda yakwa Simoni uwapolele kufyona. 7Ulo Yesu ali pakulya, kwayishile umwanakashi umo uwapintile umusashi wamafuta aabwema ubuweme nakambi aamutengo uukulu ukwinekantu alikwitwa naladi, nokuyetulwila pamutwi waku Yesu. 8Ulo abakusambila babwene mfi balikalipile, nokusosa ati, “Mulandu ndo akowonawilwa mfi amafuta nga? 9Nga twaya kushitishamo indalama ishinji ishakupela abachula.”
10Nomba Yesu alishibile ifyo balikusosa, elo abebele ati, “Chindo mukomusakamikila ngu mwanakashi? Umulimo ngu uwo ampyungila uuweme ukwinekantu. 11Pantu abachula mwali kuli nabo lonse, kuntu tamwalokulipo nandibo lonse iyowo. 12Ngu mwanakashi pakunjitila mafuta pamubili wanji, ampekanishisha kabela ukushikwa kwanji. 13Nachine nkomweba ati, konse uko pano chalo balikubilisha Ubutumi Bwawama, balikusosa ifichitile ngu mwanakashi pakumwibukisha.”
Yuda asumina ukwembula Yesu
(Mk. 14.10-11; Luk. 22.3-6)
14Nomba umo uwabekumi na babili uwitwa Yuda Isikaliyoti ayile kuntungulushi shabachipupila 15nokuti kuli bo, “Nindo mukompela nga chakuti nayembula Yesu kuli mwe?” Elo bamupele indalama shabuseke amakumi atatu. 16Nomba ukufuma njilya nshita Yuda ali kufwayilisha inshila neshita iingalinga ukwembwilapo Yesu.
Yesu nabakusambila bakwe balya umulalilo
(Mk. 14.12-21; Luk. 22.7-13,21-23; Yoh. 13.21-30)
17Mukasuba kakubalilapo akakulyamo Imifuba Iitatutumuka, abakusambila bayile kuli Yesu nokusosa ati, “Kanshi nikwisa uko mukofwaya ukuti tumuwamishishe Chakulya Chakuchilila?”
18Yesu abasukile ati, “Kamuya kuli kantwa mumusumba, mukamwebe ati, ‘Umusambishi akoti, inshita yanji ili mupepi. Ndefwaya ukulya Chakulya Chakuchilila kunanda yobe pamo nabakusambila banji.’”
19Nachine abakusambila bachitile mwenka umo Yesu abebele. Bapekenye nachakulya nchi.
20Ati kube ichungulo, Yesu nabakusambila bakwe ikumi na babili balikulya. 21Ulo bali pakulya, Yesu asosele ati, “Nkomweba ati, umunenu umo akonyembula.”
22Pakumfwa mfi, nabo babele nechikonko ukwinekantu. Elo batatikile ukufumba Yesu umo-umo ati, “Napo ninebo Bashikulu.”
23Naye asosele ati, “Uwo nkotobela nakwe pamo mumbale imo eukonyembula. 24Umwana wa Muntu akoya mukufwa nga mfilya chalembwa mu Mashiwi aku Lesa pali Ye. Nomba ishamo kumuntu uyo ukoyembula Mwana wa Muntu! Nga chaliweme kuli ye ukutafyalwapo.”
25Elo Yuda uyo uwamwembwile, afumbile ati, “Napo nine Bashikulu?”
Naye amwasula ati, “Wasosa.”
Umulalilo waku Bashikulu
(Mk. 14.22-26; Luk. 22.14-20; 1 Kol. 11.23-25)
26Ulo bali pakulya, Yesu abulile umufuba atotele kuli Lesa, ausunawile nokupela nabakusambila bakwe ati, “Buleni mulye pakuti ngu mubili wanji.”
27Nakambi abulile ulukombo, atotele kuli Lesa, abapele nokuti, “Nwenimo bonse. 28Ngu mulopa wanji uwachipangano chabwangu, uwayitililwa abenji ukuti amabifyo abo anakililwe. 29Nachine nkomweba ati, tanshakanwepo nakambi amenshi afitwalo fya mpesha ukufikila pakasuba ako nkanwamo amenshi afitwalo fyawaini uwabwangu mu Bufumu bwaku Lesa.”
30Ulo bayimbile ulwimbo, balifuminemo nokuya kulupili lwa Maolife.
Yesu asosa ifyakukanwa na Petulo
(Mk. 14.27-31; Luk. 22.31-34; Yoh. 13.36-38)
31Yesu asosele kuli bo ati, “Mwe bonse mukombutuka bwenka mbuno bushiku. Pakuba chalilembwa mu Mashiwi aku Lesa ati, ‘Nakwipaya chembela nembelele shakupalangana.’#Sek. 13.7 32Nomba ulo nakubuka kubafwa, nakumutanjilila ku Galili.”
33Elo Petulo ayasukile Yesu ati, “Nangu bambi bakubutuka, kuntu nebo iyowo!”
34Elo Yesu amwebele ati, “Nachine nkokweba ati, muli mbuno bushiku bwenka, ulo tambala atalalila, ukonkana imiku itatu.”
35Petulo asosele ati, “Nangu kati kufwa, nkofwa nawe. Tekuti nkukanepo iyowo!”
Nabakusambila bambi nabo basosele fimo fyenka.
Yesu alomba Wishi mwibala lya Getesemani
(Mk. 14.32-42; Luk. 22.39-46)
36Elo Yesu ayile nabakusambila bakwe kuchifulo ichitwa Getesemani. Elo abebele ati, “Ikaleni mpano panshita nkoya mukulomba.” 37Yesu abulilepo Petulo nabamwana Sebedi babili. Elo atatikile ukulilishika nokusakamikwa. 38Abebele ati, “Umutima uli nechikonko ukwinekantu nichikanga bwaka nokufwa. Ikaleni mpano, mulokulinda pamo nandibo.”
39Ulo Yesu aendeleko panini akatalamukila awile panshi ubwifuneme, nokulomba ati, “Bata, kati kuti chalinga, fumyenipo ndu lunkombo ulwabuchushi. Nangu chibe mfi, kwiba kubati kufwaya kwanji iyowo, kuntu ukufwaya kwenu eko kuchitike.”
40Yesu abwelele kubakusambila bakwe mbalya batatu, asanga bali mutulo. Epakweba Simoni Petulo ati, “Simoni Petulo, mulilele, bati? 41Kanshi mwafilwa ukulola pakashita akanini bwaka? Umutima ukofwayisha, kuntu umubili uli wanaka.”
42Yesu alibwelelemo umuku wachibili, aya mukulomba ati, “Bata kati ulunkombo ndu ulwamachushi talwafumepo pali nebo, chiteni ukufwaya kwenu.” 43Elo nakambi abwela, asanga bali mutulo, amenso abo alilemene kutulo.
44Nakambi alibashile, ayile mukulomba umuku wachitatu. Asosele amashiwi amo enka. 45Elo abwelelemo kubakusambila bakwe nokubeba ati, “Napo nanomba muchili mutulo nokutusha, bati? Boneni, Umwana wa Muntu akoposwa muminwe yabantu babipa. 46Imeni tulokuya. Boneni uwakunyembula ngu ayisa!”
Bayikata Yesu
(Mk. 14.43-52; Luk. 22.47-53; Yoh. 18.3-12)
47Lwenka ndulya ulo Yesu alikusosa, Yuda umo uwabakusambila bakwe ikumi na babili alifikile. Ali nebumba ilikulu ilyabantu abali nemyele nenkoli. Batuminwe nentungulushi shabachipupila nabachilolo. 48Uwakwembula Yesu alibapele kale ichishibilo ati, “Uyo nkoya kufyomfyonta, eye enka. Mumwikate.”
49Ulo Yuda afikile kuli Yesu asosele ati, “Mutende we musambishi! Elo amufyomfyontele.”
50Elo Yesu amwebele ati, “We munanji, chita icho wishile.”
Abantu bayile kuntashi, nokumwikata Yesu. 51Nomba umo uwabantu abali pamo na Yesu, asolomwene umwele wakwe nokukwempula ukutwi kwamupyungi wakwa chipupila mukulu. 52Elo Yesu amwebele ati, “Bwelesha umwele muchitubyu, pantu bonse ababomfya umwele bakonaulwa nomwele. 53Napo ukolanguluka ukuti tekuti njitepo kuli Bata ukwebati bantumine nduno lwenka amabumba ikumi na abili aabangelo? 54Nga chakuti nachita mfi, nga kuti fyachitika shani ifyalembwa Mumalembo?”
55Panuma Yesu abafumbile ati, “Napo nebo ndi chipondo, apo mwayisa nemyele nenkoli mukunjikata, bayi? Inshiku shonse nalikwikala namwebo nkosambisha munanda yaku Lesa, nokuti munjikatepo, yii. 56Chiweme pantu mfi fyonse fyachitika ukuti fibe ifyakwebesha ifyo abasoseshi balembele.”
Elo abakusambila bonse bashile Yesu nokufulumuka ulubilo.
Yesu munsaka yamilandu
(Mk. 14.53-65; Luk. 22.54-55,63-71; Yoh. 18.13-14,19-24)
57Abantu bo abayikete Yesu bamutwite kuli Kayafasi chipupila mukulu, uko abasambishi ba Mafunde nabakulu ba Bayuda balongene. 58Petulo alikukonka Yesu akatalamukila, nakwisano lyakwa chipupila mukulu. Alinjile nokwikala apayikele abashilikali ukuti abone ichikochitika. 59Elo intungulushi shabachipupila nabachilye bonse balikufwayilisha bukamboni bwabufi ubwakuti bapingwilepo Yesu ukufwa. 60Nomba balifililwe, nangu pali bakamboni babufi abenji abakumubepesha. Kumupwilo kwayishile abantu babili, 61basosele ati, “Ngu muntu alikweba ati, ‘Nebo kuti natobaula nji nanda yakulombelamo Lesa nakambi nokuyimaka munshiku shitatu bwaka.’”#Yoh. 2.19
62Chipupila mukulu ayimakene mulwalala lwachilye nokufumba Yesu ati, “Kanshi taukoyasukapo nangu kamo pali nji milandu iyo abantu bakokwebelela?” 63Yesu ali chelele, nokwasuka, yii. Elo chipupila mukulu asosele kuli Yesu ati, “Nkokweba mwishina lyaku Lesa uwabumi ukuti utwebe mukulapa kati niwe Klistu, Umwana waku Lesa?”
64Elo Yesu amwebele ati, “Wasosa. Nomba nkomweba ati, ukufuma nomba mwakubona Umwana wa Muntu alikele kukuboko kwamulyo ukwaku Lesa umwine wafiso fyonse, mwakumubona uko akwisa mumakumbi amumulu.”
65Penkapo chipupila mukulu alepawile insalu shakwe nokuti, “Mulandu ndo tukofwayila nabakamboni bambi? Asalula Lesa. Nomba mwayumfwila mwebene umusalula.
66“Nomba mukolangulukapo shani?”
Bonse balyasukile chapamo bati, “Alingile bwaka ukuti afwe.”
67Elo bamushipile amate kumenso nokumupama. Elo abamupamine basosele ati, 68“Lota nga ewe Uwasubwa waku Lesa. Ninani wakupuma?”
Petulo akana Yesu
(Mk. 14.66-72; Luk. 22.56-62; Yoh. 18.15-18,25-27)
69Nomba Petulo ayikele mulubansa. Elo kwayishile umwanansungu umo umupyungi wakwa chipupila mukulu nokumweba ati, “Nawe kumo wali pamo na Yesu waku Galili.”
70Nomba Petulo alikene kabomfwileko bonse ati, “Webo, nshishibilepo icho ukusosa iyowo.” 71Ulo Petulo alikufumina panse pamulyango, umwanansungu umbi amubwene nokweba abalipo ati, “Ngu mwalalume naye aali pamo na Yesu waku Nasaleti.”
72Nakambi Petulo alikene ati, “Nalapa, uyo muntu nshimwishibilepo.”
73Ulo papitile akashita kanini, abayimakenepo balikweba Petulo ati, “Nachine webo wali pamo na Yesu pantu imisosele yobe yakushinina.”
74Nomba Petulo atatikile ukuyilapisha ati, “Nalapa, Lesa antobaule. Nebo uyo muntu mukoshimbula tanshimwishibilepo nangu panini!”
Penkapo natambala alililile. 75Elo Petulo ayibukishe ifyo Yesu asosele ati, “Ulo tambala atalalila ube ulinkene imiku itatu.” Elo Petulo afumine panse nokulila ukwinekantu.
Currently Selected:
Mateyo 26: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.