Mateyo 25
25
Ichelusho chabanansungu ikumi
1“Pali njilya nshita, ubufumu bwakumulu bwakubati banansungu ikumi abapintile inyali shabo nokuya mukuchinsha nshibwinga. 2Basano bali bapuneme, elo bambi basano bali abamano. 3Abapuneme bapintile inyali shabo, nomba tabapintilepo amafuta. 4Nomba abamano bo balipintile amafuta mumisashi yabo pamo nenyali. 5Pamulandu wakuti nshibwinga alililwe ukwisa, bonse batatikile ukushipula nokuponena mutulo.
6“Elo pakati kabushiku, kwaumfwikile ukwaula ati, ‘Ayisa nshibwinga! Fumeni mukachinshe!’ 7Echo abanansungu bonse balibukile nokwasha inyali shabo. 8Abapuneme mbalya basosele kubamano ati, ‘Tupeniko amafuta. Boneni inyali shesu shikoshima!’ 9Nomba abanansungu abamano baasukile ati, ‘Nga twamupelako tekuti akumaninepo. Echo kamuya kubamakwebo mukayishitile.’ 10Ulo balikuya mukushita, nshibwinga alifikile. Echo bonse abayipekenye bayinjile pamo naye kumalila aabwinga. Elo nechiibi chaliselwe.
11“Panuma abanansungu mbalya balifikile nokusosha nshibwinga ati, ‘Shikulu, shikulu, twiswileniko.’ 12Nshibwinga abasukile ati, ‘Nachine nkomweba ati, nshimwishibilepo!’”
13Elo Yesu asosele ati, “Echo mulokulola pakuti tamwishibilepo akasuba nangula inshita Umwana wa Muntu akubwela.
Ichelusho chabalimi batatu
(Luk. 19.11-27)
14“Ubufumu bwakumulu bwakupalana nomuntu uwayile pabulwendo. Atalayima, ayitile abamilimo bakwe nokubapela ububoni bwakwe. 15Umo amupele indalama amakana asano. Umbi amupele amakana abili. Elo umbi naye amupele ikana limo. Apele umo naumo ukulingana nefyo angabomba. Ulo ashilile ukubapela, aliile. 16Uwapelwe amakana asano alimine nokushifungashanya. Elo asangilemo nashimbi amakana asano. 17Uwapelwe amakana abili naye alishifungashenye, kasangamo nashimbi amakana abili. 18Nomba ngulya uwo bapele ikana limo, ayile kwimba panshi nokushika indalama shakwa shikulu wakwe.
19“Ulo papitile inshita iitali, shikulu wabamilimo mbalya alibwelele nokubeta ukuti bamulondolwele ifyo babomfeshe indalama shakwe. 20Uwapokele indalama amakana asano alishile nokuletelapo nashimbi amakana asano nokusosa ati, ‘Shikulu, mwampele indalama amakana asano. Boneni, nafungashanyamo nashimbi amakana asano.’ 21Elo shikulu wakwe amwebele ati, ‘Wachita bwino wemupyungi uuweme nakambi uwachetekelwa. Pakuti waba wachine patunini, nomba nkokubika ukuba umukulu pafintu ifinji. Echo injila usekelele pamo nandibo ne shikulu obe.’
22“Uyo Uwapokele indalama amakana abili, naye alishile nokusosa ati, ‘Shikulu mwampele indalama amakana abili. Boneni, nafungashanyamo nashimbi amakana abili.’ 23Elo shikulu wakwe amwebele ati, ‘Wachita bwino wemupyungi uuweme nakambi uwachetekelwa. Pakuti waba wachine patunini, nomba nkokubika ukuba umukulu pafintu ifinji. Echo injila usekelele pamo nandibo ne shikulu obe.’
24“Nangulya uwapokele ikana limo naye alishile nokusosa ati, ‘Shikulu, nalishiba ukuti mwebo mwalikosa umutima. Mulalobolola noko mutabyeleko, nokulonganya ifyo mutaminshilepo. 25Echo nalitinine. Elo nalile kushika indalama shenu panshi. Tenshi indalama shenu!’
26“Shikulu wakwe amwasukile ati, ‘We mupyungi mubi umufila! Kambi walishibile ukuti ndakobola noko ntabyeleko nokulonganya ifyo ntaminshilepo! 27Echo walingile ukubika indalama shanji uko babika indalama. Elo nebo pakubwela nga napokelela pamo nambikilapo. 28Pokeni ikana lyandalama, mupele ngulya uukwete amakana ikumi. 29Pantu umuntu ukwete ifinji, akubikilwapo nafimbi, nangulya uukwete tunini akupokwa noto akwete. 30Nomba nchi chinangwa chamuntu, chiposeni panse mumfinshi, ukwakuba ukulila nokukwesanya ameno.’
Ubupingushi bwakupelako
31“Ulo Umwana wa Muntu akwisa mubuleme bwakwe, pamo nabangelo bakwe bonse, akwikala pachipuna chakwe ichabufumu. 32Imitundu yonse iyabantu ikalonganikwa kuli Ye. Elo akupatula abantu ukubati nimfilya chembela apatula imbelele kumbushi. 33Akubika imbelele kukuboko kwakwe ukwamulyo, kuntu imbushi kuchipiko. 34Elo Imfumu yakusosa kubakumulyo ati, ‘Iseni mwebo Bata bashukisha. Injileni mubufumu ubo Bata bamupekanishisha ukufuma apo ichalo chatalilwe. 35Pantu ulo nali nensala mwalimpele ichakulya. Nali nechilaka mwalimpele amenshi aakunwa. Nali umulwendo mwalimpokelele. 36Ulo nali ubwamba, mwalimfwikile. Ulo nali umulwele, mwalimpempwile. Ulo nali muchifungo, mwalimpempwile.’
37“Elo abo abasekeshe Bashikulu bakwasuka ati, ‘Nilwisa twamubwene nensala, nafwe twamupela ifyakulya? Nilwisa mwali nechilaka, nafwe twamupela ichakunwa? 38Nilwisa mwali abalwendo, nafwe katumupokelela, nangula ulo mwali ubwamba nafwe katumufwika? 39Nilwisa mwali abalwele nangula ukuba muchifungo, nafwe katwisa mukumupempula?’ 40Elo Imfumu yakubasuka ati, ‘Nachine nkomweba ati, ulo mwayafwilishe umo uwakuli mba abali kubulilwa, ninebo mwayafwilishe.’
41“Elo akweba abakuba kuchipiko ati, ‘Fumeni mpa, mwe bashama. Kamuya mumulilo uutashimapo uwo Lesa apekanishishe Satana nabangelo bakwe. 42Pantu nali nensala tamwampelepo ichakulya. Nali nechilaka tamwampelepo ichakunwa. 43Nali umulwendo, tamwampokelelepo. Nali ubwamba, tamwamfwikilepo. Ulo nali umulwele namuchifungo, tamwampempwilepo.’
44“Elo nabo bakwasuba ati, ‘Mwe Mfumu nilwisa twamubwene mwali nensala nangula nechilaka nangula abalwendo nangula mwali ubwamba nangula mwali abalwele nangula muchifungo, kuntu tatwamwafwilisheko?’ 45Naye akubasuka ati, ‘Nachine nkomweba ati, lonse ulo mutalikwafwilishako nangu mba abali kubulilwa, nachine ninebo mutalikwafwilishako.’ 46Elo bakuya mumachunshi aamuyayaya, kuntu abo abasekeshe Bashikulu bakwinjila mubumi butapwa.”
Currently Selected:
Mateyo 25: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.