Imilimo ya batumwa 7
7
Sitefano ayisosela
1Chipupila mukulu afumbile Sitefano ati, “Napo fyonse mfi fyachine?”
2Naye ayasukile ati, “Mwe bawesu nabata, umfweni! Lesa wamuchinshi abonekele kuchikolwe chesu Abulahamu ulo ali muchalo cha Mesopotamiya, atalakukila ku Halani. 3Aebele Abulahamu ati, ‘Fuma muchalo chobe, ushe abamukowa obe nokuya kuchalo icho nakukulanga.’ 4Nachine Abulahamu afumine muchalo cha Kalodiya, aya kwikala mu Halani. Ulo wishi afwile, Lesa alimufumisheko nokumufisha muno chalo umo mukoyikala nomba. 5Elo Lesa, tapeleko Abulahamu ichifulo nangu panini. Nomba amulayile ukuti akumupela nchi chalo pamo nabeshikulu bakwe nangu panshita njilya atakwetepo umwana. 6Elo Lesa asosele kuli ye ati, ‘Abeshikulu bobe bakwisa kwikala muchalo chabene nokutekwa ubusha nokuchula pamyaka imyanda ine. 7Nomba umutundu wakubateka ubusha nakwisa kuupingula. Panuma bakufumamo muli nchilya chalo. Elo bakwisa ukulomba kuli nebo muli nchino chifulo.’ 8Ukufuma mpalya Lesa apele Abulahamu ichipangano chakushilimunwa. Elo Abulahamu ashilimwine Isake ulo ali nenshiku shisano na shitatu kukufyalwa kwakwe. Naye Isake ashilimwine umwana wakwe Yakobe, na Yakobe ashilimwine abana bakwe ikumi na babili abo abali efikolwe fyesu.
9“Elo abana bakwa Yakobe bakwete umufimbila pali Yosefe wabo, bamushitishe ubusha mu Ijipiti, kuntu Lesa alinakwe. 10Amuchingilile ukufuma kumachusho akwe onse. Ulo Yosefe abonekele kuli Falo, Lesa amupele umulangwe nokumuwamya pamenso yakwa kateka. Elo Falo asalile Yosefe ukuba intungulushi yachalo namunanda yakwa Falo. 11Panuma kwaponene insala mu Ijipiti namu Kenani iyaletele amachushi ayenji kubantu. Ifikolwe fyesu tafyali kusanga ifyakulya. 12Nomba ulo Yakobe aumfwile ukuti mu Ijipiti muli ifyakulya, atumineko ifikolwe fyesu ubulwendo bwakwamba. 13Elo palwendo lwachibili, Yosefe ayifisulwile kuli bawakwe. Panuma ayishibishe Falo ifyaku bo. 14Yosefe alayishe bawishi ba Yakobe ukuti bese ku Ijipiti nabana babo. Panshita njilya bali amakumi asano na abili nabantu basano. 15Elo Yakobe ayile ku Ijipiti uko afwile pamo nefikolwe fyesu. 16Ifitumbi fyabo fyalipintilwe ku Shekemu nokufishika mumunda uyo Abulahamu ashitile nendalama ukufuma kumukowa wa Hamo.
17“Ulo inshita yakufika kwachipangano icho Lesa apele Abulahamu yali mupepi, abantu besu balifulile mu Ijipiti. 18Nakambi kwayishile imfumu imbi mu Ijipiti iyatayishibile Yosefe. 19Njilya mfumu yachenjeleke nokuchusha ifikolwe fyesu. Yalikubakakatisha abafyashi ukuposa utwana twabo utunini pakuti tulokufwa. 20Pali nji nshita, Mosesi afyalilwe, umwana uwawama. Bamulelele kubafyashi bakwe imyeshi itatu. 21Ulo bamuposele, umwana wakwa Falo umwanakashi alimutolele nokumulela kubati mwana wakwe. 22Echo Mosesi asambilile umulangwe wabena Ijipiti onse. Elo imilimo namashiwi akwe fyali ifikulu.
23“Ulo Mosesi afikile imyaka amakumi ane, apingile ukuya kutandalila aba mukowa wakwe aba Isilaeli. 24Abwene umo umwina Isilaeli uwo balikuchusha kumwina Ijipiti. Ayile mukupokololako umwina Isilaeli, elo ayipeye umwina Ijipiti ngulya. ( 25Mosesi alikulanguluka ukuti bawakwe bakwiluka ukuti Lesa alimutumine ukubalubula, kuntu bena tabayibukilepo iyowo.) 26Ulo bwachele Mosesi alisangile abena Isilaeli benka balikulwa. Ayeseshe ukubalamununa nokuti, ‘Mwebo bantu, ala muli banankashi! Nindo mukolwila mfi?’ 27Nomba uyo uwalikupama umunakwe atankile Mosesi nokuti, ‘Nga ninani wakubika kapingula palifwebo? 28Napo ukofwaya ukunjipaya kubati nimfilya wayipeye umwina Ijipiti mailo, bati?’ 29Ulo Mosesi aumfwile mfi, abutukile ku Midiyani. Ayikele nkulya nokufyala abana abalalume babili.
30“Ulo papitile imyaka amakumi ane, umungelo abonekele kuli Mosesi muchimpukesa ichalikubilima umulilo mupepi no Lupili lwa Sinai. 31Mosesi pakubona mfi, alishimbilwe ukwinekantu. Elo apalamine mupepi ukuti abwenekeshe. Nomba aumfwile ishiwi lyaku Bashikulu likoti, 32‘Nine Lesa wafikolwe fyobe, Lesa wakwa Abulahamu, Isake na Yakobe.’ Nomba Mosesi alikututumine, elo tafwayilepo nokuloleshako. 33Elo Bashikulu balimwebele ati, ‘Fula nkwanda shobe pakuti apo wimakane nipachifulo chapatulika. 34Ndibwene ifyo abantu banji bakochula muchalo cha Ijipiti. Ndyumfwile ukwilishanya kwabo. Nomba ndishile mukubalubula. Isa nkuno pakuti nkutume ku Ijipiti.’
35“Engulya Mosesi uwo abena Isilaeli bakene ulo basosele ati, ‘Nga ninani wakubika kapingula pali fwebo?’ Eye Lesa atumine ukuti abatangilile nokubapulusha, nowakumwafwako ningulya mungelo uwamubwenekele muchimpukesa ichali kubilima umulilo. 36Mosesi alibafumishe abantu muchalo cha Ijipiti panuma yakuchitamo ifyafiso ifikulu nefyakushimbwisha. Afichitile napali Bemba Wasweta namuchiswebebe ukufika napamyaka amakumi ane. 37Engu enka uwaebele abena Isilaeli ati, ‘Lesa akwimya umo muli mwebo ukuba umusoseshi kubati ninebo.’ 38Enka Mosesi ngu ewali pamo nefikolwe fyesu ulo balongene muchiswebebe. Ewali nomungelo uyo asosele nakwe pa Lupili lwa Sinai. Engu enka uwapokelele amashiwi abumi nokuyapela kuli fwebo.
39“Nomba ifikolwe fyesu fyalikaninine ndi ukumunakila. Balimutankile pambali mumitima yabo balikulanguluka ukubwelelamo bwaka ku Ijipiti. 40Elo baebele Aloni ati, ‘Tupangile balesa bambi abakututangilila pantu tatwishibilepo ichachitika kuli Mosesi uwatufumishe mu Ijipiti.’ 41Nachine, penkapo bapangile chingosa wakubasa ichali kubati ning’ombe. Elo bachitulile nechipupo, bakosekelela kuchintu icho bapangile neminwe yabo. 42Nomba Lesa abafutatile nokubapela ukuti balombe intandala shakumulu kubati fintu chalembwa Mumalembo abasoseshi ati,
‘Mwe bena Isilaeli!
Napo mwalikupela kuli nebo
inama nefipupo fyenu,
pamyaka amakumi ane muchiswebebe?
43Mwali kupinta itenti lyaku lesa wenu Moleki,
nolutandala lwaku lesa wenu Lefani,
tungosa wakubasa uto mwapangile
ukwebati mulokutulomba.
Echo nakumutamfisha ukutali,
ukuchila ichalo cha Babiloni.’
44“Ifikolwe fyesu fyakwete itenti lyachipangano muchiswebebe. Lyapangilwe ukulingana nefyo Lesa aebele Mosesi. Lyapangilwe muchimpashanya icho Lesa abweneshe Mosesi. 45Itenti ndilya ifikolwe fyesu fyapokelele kubafyashi babo, bayishile nalyo ulo balikuya na Yoshua mukupoka ichalo chamikowa yabantu iyo Lesa afulumwishe pamenso yabo. Lyalikele pakati kabo ukufika napanshita yakwa Davide. 46Lesa akwete ubwanshi na Davide ngulya. Elo Davide apapatile Lesa ukuti amwimakile inanda, Lesa uwo Yakobe naye alikulomba. 47Nomba ni Solomoni ewayimakile njilya nanda.
48“Nomba Lesa, Kateka wamyulu yonse, tekalapo mumananda ayemakwa neminwe yabantu kubati nimfilya umusoseshi asosa ati,
‘Lesa akoti:
49kumulu echipuna chanji chabufumu,
nechalo echinyantilo chamakasa anji.
Kanshi ninanda ndo wakunjimakilapo nebo?
Nipesa apo ningatushishapo?
50Tanshili nebo uwapangile fyonse mfi?’”
51Elo Sitefano asosele ati, “Mwe bachitomfwa! Mwe bankoma amatwi, mwe batomfwa mashiwi aku Lesa! Muli ukubati fikolwe fyenu, mulakana Umupashi Wabuta. 52Musoseshi ndo uwo ifikolwe fyenu fitachushishe? Fyayipeye abalikubilisha ukwisa kwa Wasubwa waku Lesa. Boneni namwebo mwamupele kufipondo fyakwe nokumwipaya. 53Nimwebo mwapokelele Amafunde aku Lesa awo abangelo baletele panonshi, kuntu tamwayalamine.”
Bayipaya Sitefano kumabwe
54Ulo abamuchilye baumfwile amashiwi akwa Sitefano, bakalipile ukwinekantu nokusumanya ameno kubukali bwabo. 55Nomba Sitefano, uwayiwule no Mupashi Wabuta, aloleshe kumulu nokubona umuchinshi waku Lesa, elo na Yesu alimakene kumulyo waku Lesa. 56Elo asosele ati, “Yangwee! Nabona umulu wachenama no Mwana wa Muntu alimakene kukuboko kwamulyo waku Lesa!”
57Pakumfwa mfi, bashichilye bayimishe amashiwi nokuchilika amatwi yabo, bamufukukile bonse pamo. 58Bamutankile kunse yamusumba nokumutobaula amabwe. Abalipo bapele ifyakufwala fyabo kumulumbwana uwalikwitwa Saulo ukuti abasungile. 59Ulo balikumutobaula amabwe, Sitefano alikwaula bwaka nokwita Bashikulu ati, “Bashikulu Yesu, pokeleleni umupashi wanji!” 60Nakambi alifukeme nokwaula neshiwi ilikulu ati, “Bashikulu, mwibapela umulandu pabubi mbu bakochita!” Ulo asosele mfi, alifwile.
Chilala New Testament © Bible Society of Zambia, 1998.