Imilimo ya batumwa 26
26
Paulo ayipokolola kuli Agilipa
1Elo Agilipa aebele Paulo ati, “Wasuminishikwa ukuti uyisosele wemwine.” Elo Paulo atambulwile ukuboko kwakwe nokuyisoselela umwine ati,
2“Mwe mfumu Agilipa! Ndineshuko ukuti lelo njipokolole nemwine kuli mwebo kufintu fyonse ifyo Abayuda bampelelapo umulandu. 3Nchi chachine pantu mwebo mwalishiba bwino utufuto tonse twa Bayuda. Echo nkopapata ukuti muteke umutima pakumfwa ifyo nkososa.
4“Abayuda bonse balishiba ifyabumi bwanji ukufuma kubwayiche bwanji. Balishiba ukuti ukufuma bwaka kukutatika nayikele muchalo chanji, nakambi namu Yelusalemu epela. 5Kati bachishinka, kuti basumina ukuti ukufuma nakale nalikwenda mwibumba lya Bafalisi, abalama amafunde esu ukuchila bonse. 6Nanomba mulandu bantekele muno chilye wachichetekelo ndinacho icho Lesa alayile ifikolwe fyesu. 7Echilayo chenka icho nemikowa yesu ikumi na ibili, abo abalomba Lesa akasuba nobushiku, ikololela. Mwe bachinshikwa, nipamulandu wachichetekelo nchi epo napelwa umulandu ku Bayuda! 8Mulandu ndo mwebo mwebali mpano mutachetekela ukuti Lesa alabusha abafwa?
9“Ukuba nandibo kumo akale efyo nalikulanguluka ukuti ninsuminisha nangu panini amashiwi aku Yesu waku Nasaleti. 10Echo nalikuchita mu Yelusalemu. Nalipelwa ifiso kuntungulushi shabachipupila. Echo abantu baku Lesa abenji nababikile muchifungo, nakambi ulo balikubapingwila ukufwa, nandibo nalikusuminisha. 11Elo panshita ishinji nalikubachusha ukwinekantu mumananda aku Lesa, nokubakakatisha ukuti bapose ichichetekelo chabo. Nali umukali pali ngu mulandu. Nalikwenda namumishi iimbi yamufyalo ifipusene mukubachusha.
Paulo asosa pamulandu wakwaluka kwakwe
(Mil. 9.1-19; 22.6-16)
12“Ni wenka ngu mulimo nayilile nakumushi wa Damasikasi, nalipelwe ifiso kuntungulushi shabachipupila. 13Mwe bachinshikwa, twalikwenda mumusebo inshita ya 12 koloko wakasuba ulo nabwene ukusanika ukukulu ukuchila ukusanika kwakasuba, kwali shingulukile pamo nabalalume nali nabo. 14Bonse twawile panshi. Elo naumfwile ishiwi likonjeba mu Chihebele ati, ‘Saulo, Saulo! Chindo ukonchushisha? Wakwichena wemwine kubati nintungu yapanta chibaka kuchiti chakwa chembela wayiko.’ 15Nandibo nalifumbile ati, ‘Nimwe bani Bashikulu?’ Elo Bashikulu bayasukile ati, ‘Nine Yesu ukochusha. 16Nomba ima! Ichalenga ukuboneka kuli webo nipakuti ndikusalile ukuba umupyungi wanji. Wakusosa kuli bambi ifyo wabona kuli nebo lelo nefyo nakwisa kukulanga kuntanshi. 17Nakwisa ku pokololako kubena Isilaeli naku benafyalo uko nkokutuma. 18Wakuya kubashibatula amenso, ukubafumya mumfinshi nokubaleta mukusanika. Wakubafumya mufiso fyakwa Satana nokubenjisha mufiso fyaku Lesa pakuti ukupitila mukuchetekela muli nebo bakunakililwa amabifyo abo nokusangana ichifulo mubwikalo pamo nabantu baku Lesa abasalwa!’
Paulo asosa pamulandu wamilimo yakwe
19“Kanshi mwe mfumu Agilipa, tanshakene kumfwila ichimonwa ichafumine kumulu. 20Natatikilepo ukushimikila mu Damasikasi nokuya mu Yelusalemu, namuchalo chonse icha Yudeya napakati kabenafyalo. 21Nipali ngu mulandu Abayuda banjikatile ulo nali munanda yaku Lesa nokufwaya ukunjipaya. 22Ukufika nanomba Lesa eulengafwa. Echo njimakene mpano ukupela bukamboni bwanji kuli bonse, kubayiche nakubakulu. Ifyo nsosa fimo fyenka abasoseshi na Mosesi basosele ukuti fili nokwisa kuchitika. 23Klistu ali nokuchula nokuba umutanshi ukubuka kubafwa ukuti kukabilishiwe amashiwi epusukilo ku Bayuda nakubenafyalo, akabe ukusanika kuli bo.”
24Ulo Paulo alikusosa munshila nji, Fesitasi ayimishe ishiwi nokubilikisha ati, “Paulo ulifuntile! Ukusambilila kobe kwakufuntisha.”
25Paulo naye ayasukile ati, “Iyowo, kalonga mulopwe tanshifuntilepo! Amashiwi nsosele achine, nakambi nanebo nkososa ifyamutembo. 26Ba mfumu Agilipa, balishibile fyonse mfi. Emulandu nkososela nomutima umo. Nkochetekela ukuti mukoukonka bwino-bwino umulandu onse pakuti ichintu nchi tachachitikilepo mubumfinsolo iyowo. 27Ba mfumu Agilipa, napo mulachetekela amashiwi yabasoseshi? Nalishiba ukuti mulayachetekela!”
28Elo imfumu Agilipa aebele Paulo ati, “Napo panshita iinini bwaka nji, epo wingalenga ukuti njaluke umwina Klistu?”
29Elo Paulo amwasukile ati, “Nangu ibe inshita iinini nangu iitali, ukulomba kwanji kwakuli Lesa ukuti mwebo, pamo nabonse abakonkutika pakasuba kalelo, babe kubati nimfino ndi ukufumyako bwaka ukukakwa iminyololo nji isho ndi nasho!”
30Elo imfumu Agilipa na Benisi umukashi wakwe, Fesitasi kateka nabantu bonse abayikele nabo balimakene. 31Ulo balikwenda balikuyisoshanya benka ati, “Ngu muntu tapali ichibi nangu chimo icho achita icho engafwilapo nangula ukuposwa muchifungo.” 32Nomba Agilipa aebele Fesitasi ati, “Ngu muntu nga tatwele umulandu wakwe kuli kateka mukulu nga akakulwa bwaka.”
Chilala New Testament © Bible Society of Zambia, 1998.