Apocalipsis 9

1Te tikachujapa ema nasinkune'i ángele, níma'apa eta jarairiki takipairuwa te juka apake'e, tasi'akene te anuma, tási'a naijarakapa eta llave eta mavejiasirayare eta pusu táupenakene tikaijare abismo. 2Taka'e, mavejiakapa eta táupenakene'i pusu, tiúchukapa eta ichape kijare takutipa eta takijarera te tiju eta evitara'i, eta kijare tiasi'a te pusu timapikupa taicha eta sache, etapa eta tekatikawa. 3Témuna'irikawapa tiúchuka eta tawasikeneana eta tsakarana, taye'e eta kijare, amairipa'ipa tamutu eta apake'e, tikawana'ipa tayukawakayare ena achaneana, tetavikawa eta takatiyurawa takutipa eta alacrán. 4Tikatuparakasipa wa'i takunika eta tamuijira eta apake'e étapa eta tapakajiana eta sukurekana étapa eta yukukiana, eta tatupara'a'i eta tayukawakayare'i namutu ena achaneana, nakarichu takaitikaya ena tiamana eta naikutiarana te nana'uana, taye'e eta maye'e sellu ema Viya. 5Sínkuyare'i kaje eta tayerewa eta tayukarareresirayare'i, wá'isera tépenanaima'i ena achaneana tayukakeneanayare'i, tétavikawasera takatiwayare'i nasama, eta tayukaraki takutiyare'i eta alacrán. 6Te jena sacheanayare ena achaneana nawara'ayare tikapakawana, wá'isera tépenanaima'i, tayanapane náwara'a naépena.

7Eta juka tawasikeneana tsakarana, nímikutichapa eta kawayuana te titsekawana'i taye'e eta guerraya, tási'a, te tachuti tamapa'i takutima'iyaréni eta corona uru, eta tamira achanemirayaréni. 8Tiuji eta tachutimaka, takutiyaréni eta suchutimaka esu esena, tíñe'iwaka eta tá'eana takuti eta taka'era eta itiare. 9Eta taparuma takutiyaréni eta fierro murakakene'i, tási'a eta tapawana tikaemarara'a takutipa eta takaemaira eta kamuri kawayuana tichurukana eta kamurikene karretana. 10Tikaijikiwaka takutiyaréni eta alacrán, eta juka tikawana'i'i tayukawakayare'i ena achaneana, sinku kajeyare'i eta takaetemajirisirawakayare ena. 11Marari'iware ema tákenu eta tsakarana, ema ángeleni taye'e'i eta taupenakene pusu, tikaijare abismo, ema maka ángeleni, eta máijare te náechejiriruwa ena griegoana Apolión te hebreo naimijarecha “Abadón.”

12Títauchawapa eta tínapuka ekuñaraki. Jukaicha'awaresera apinacha'a eta ekuñarakiyare.

Tikachujapa ema saisikene ángele eta machuja

13Te tikachujapa ema apana ángele, nusamapa eta ma'u ema apana te tápusi eta kuátrukene esquina taye'e eta mesa uru, tiávi'a'i eta mámawa'u te mamira'u ema Viya. 14Tikawanairipipa ema ángele ema tikachuja'i, ánipa maka'e: “Pikaitikapa ena kuatrukeneana ángeleanaini, tiávi'ana'i te tachakaya eta kajakure Éufrates.” 15Taicha akane ema Viya manerejikaipa eta juka ura eta makaitisirainapa ena kuatrukeneana ángeleanaini, máisapainapa eta nakapasirayare'i kamurikeneana achaneana, ena mapamurikeneana eta náichapemuriwa. 16Tási'a nusamapa eta natupa ena suntaruana tikaperana'i. Dosciento millone eta náichapemuriwa.

17Taka'e, eta nímaira'i ena tikaperana, tatiari'i eta náikutiara te natupana. Eta táima'iana titsi, azul, tiyakaka. Táiñe'ikene'i eta tachuti eta náperana. Tiúchukapaipa eta yuku, eta kijare te tajaka. Azufrepu'a eta táepu'a. 18Kamuriana'i ena achaneana, ena takaparuanapa'i eta juka mapanakene ekuñaraki eta takuchusirapa'i te tajaka: eta yuku, eta kijare, étapa eta azufrepu'a. 19Taicha tétavikawa'i eta táiñe'iwapa'i eta takaparaki eta kawayuana, táuchurepa'i te tajaka, éneichuware tatiari'i eta táijiki tikutipaine'i eta kichare.

20Énasera ena apamuriana achaneana takaitiruana'i eta ekuñaraki, wá'ikene nawara'aima'i náinajika eta náichira eta tamaurikeneana. Wá'isera náinajikaima'i eta najirauchira ena éreanana, eta natsiusira'i eta nasiñarajiana náepiyaruana'i uru, plata, bronce, márija'i, yukuki. Tamutu eta juka mayamurikaka'iware, wá'iware tapaika'ini, wá'iware tasamara'i'ini, wá'iware táimairirika'ini. 21Tási'a wá'isera náinajika'ini eta nakapa'iwana, eta na'iapemarewana, étapa eta náesenamarewana, étapa eta námeraiwana.

Currently Selected:

Apocalipsis 9: IGB

Highlight

Compare

Copy