Apocalipsis 7
7
Ema Viya makatiuchawakayare ena manerejiruana
1Taka'e, níma'apa ena panakeneana ángeleana, titupi'ana'i te táina'u eta juka apake'e, náichejimiraurusira'i tamutu eta tékatikawana, apaesa takuija eta tékatikawa te apake'e, étaipa te ichape une, étawanerekaina'ipukaini eta yukukiana. 2Éneichuware níma'awarepa ema apana ángele tiási'a'i te táuchusine'i eta sache, makarataka'i eta maye'e sello ema yátupikene Viya Vikaiyakene. Ema maka ángele máechejikawakapa muraka ena kuatrukeneana ángeleana tikawana'iana'i naikuñaka eta apake'e étapa eta ichape une: 3“¡Wicha'a ekukamirika eta táikuñayare eta apake'e, eta ichape une, étapa eta yukukiana, tapaenumawaya te vinakapa eta maye'e sello te nana'uana ena mawanarana ema Viya!”
4Tási'a, te tamutupa eta nasellaresira'i, nusamapa eta natupa ena 144,000 eta nasimutuwa. Nási'akeneana'i naye'e ena dósemurikeneana israelítana. 5Doce mil ena tikasellana'i machichanavékeneana ema Judá, doce mílware ena machichanavékeneana ema Rubén. Duce mílware ena machichanavékeneana ema Gad, 6doce mílware ena tikasellana'i ena machichanavékeneana ema Aser, duce mílware ena machichanavékeneana ema Neftalí, doce mílware ena machichanavékeneana ema Manasés, 7duce mílware tikasellana'i ena machichanavékeneana ema Simeón, doce mílware ena machichanavékeneana ema Leví, duce mílware ena machichanavékeneana ema Isacar, 8doce mílware tikasellana'i ena machichanavékeneana ema Zabulón, duce mílware ena machichanavékeneana ema José, doce mílware ena machichanavékeneana ema Benjamín.
9Taka'e, níma'awarepa ena kamurikeneana achaneana tiási'ana te tamutu awasareana, apaechejiriruwakeneana. Waipa titupachakareana eta nasimutuwa'i. Titupi'ana'i ena te tamira'u eta trono, mávi'a'i ema Cordero, tijapumuiri'awaka eta namuiri'ana, tási'a nakarataka'i te nawa'uana eta káchipaka. 10Namutupa tipiarakana'i muraka:
“¡Pítipa pikuchuku'a'aviya,
piti Tata Vikaiyakene
piti pejaka'a'i te piye'e trono,
émapa ema Cordero!”
11Táis'a, namutu ena ángeleana titupi'ana'i te tachakayaka'i eta trono, tási'a nachayaka'iware ena kuatrukeneana ekutiarareana'i, énapa ena víyakara'ana. Tási'a, tépuyukanapa te tamira'u eta trono, tétipaimuri'anapa, natsiukapa ema Viya 12naka'epa:
“¡Eta vika'eyare!
Maitawakakayare eta vitsiusiraviyare,
taicha tétavikawapa
eta pikunachakarewa'i,
tetavikawaware eta pimatiekene'aira'i tamutu,
étapa eta pipikauchakarewa,
étapa eta pitumewa
pikarichu piti pécha'avi'i.
Ichape eta vi'asulupayachiravi'i,
¡Eta vika'eyare!”
13Taka'e, ema émana víyakara'a tiyaserekanupa: “¿Nája'asika ena nani tijapuiri'ana'i, tási'a tavi'aware nási'a?” 14“Piti pecha'i Tata”, nujikapapa. Tási'a ema máichanuwarepa: “Ena nani énara ena nakatajiwakeneana'i, tiúchuku'anaipasera, tikasipaipa puiti eta náchanewana taye'e eta máitine ema Cordero, puiti tikamuiri'anapa eta tijapu.
15“Eta taka'e, titupi'ana'i
te tamira'u eta trono mávi'a'i ema Viya,
tási'a tamutu sácheana yátiana
naitati'i te maye'e'i templo.
Ema tejaka'i te trono
ema majaneakawaka'i.
16Ena nani waipa tikatajiwanaima'i eta namaunewa,
wáipaware taijuchaima'i eta táijurewa eta sache,
etainapukaini eta tijuru'i takaeñamaka'ini,
17Taicha ema Cordero,
ema tiávi'a'i te enumu'u eta trono,
émainapa ema eye'eyare pastor
tási'a emainapa tiama'eyare,
eta te une tiuriama tikaitarera'i,
tási'a ema Viya makamitiasinayare eta náiyaira.”
Currently Selected:
Apocalipsis 7: IGB
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Ignaciano © Sociedad Bíblica Boliviana, 2004.
