Apocalipsis 22

1Ema ángele tímechanuwarepa eta tapachinakene kajakure, tétavikawa'i eta takaitarekaraiwa'i eta ta'unera. Takutiyaréni eta cristale eta tajararaesira. Eta táuchusi'a'i eta maye'e trono ema Viya, émapa ema Cordero. 2Taka'e, tatiari'i'i eta yukukiana, tikaitarekara'i eta ta'i. Eta távi'a'i te enumu'uiyapa'i eta tínapuka calle, te tachausipa'iware eta kajakure, tási'a dóse'e tika'i te étana añu, kajepachu eta taka'ira, ipurujiware eta tapakaji, takanaraka ena achaneana te awasareana. 3Tájinapa tímiapechaima'i tiviuchaima'i ena achaneana tikawasana taye'e eta juka awasare, eta máejasi'a'i ema Viya, émapa ema Cordero, tási'a ena mawanarana, máitawakakayare'i eta najirauchirayare'i, étapa eta natsiusirayare. 4Naimararakayare te mamira tamutu sacheana. Tási'a namayare eta máijare te nana'u. 5Akenuka'aviyare, máichekuarakireya eta vikatupara'airayare, ánaki tájinapa yátina, tájinainapa eta timapiku, waipa vikamunuima'i eta tajaraiwa eta sache, wá'isera vikamunuima'i eta vimíka'u, taicha tamikauchayare eta majaraiwa'i ema Viya.

Tiáne'ipa eta máitesirayare ema Jesucristo

6Máichanuwarepa ema ángele: “Eta juka nímeruvi'i, yátupikeneya eta, tamutuyare títauchawa, je'eware eta tisuapakareana. Taicha émaichu'i ema Viákenu Viya ema timitukawaka'i ena profetana akaneni, mawa'aka'i ema machanewa Viya, mawaneka'i ema ángele, ema timitukawakayare'i, ena mawanarana ema Viya, eta tane'irainapa titauchawa tamutu.”

7“¡Níja'uchawanenapa nútijapa! ¡Tétavikawa eta náurikakarewaya ena tisuapana'i, napanerekene'aira'i eta nametarapi, te juka Ajureka maechejiriruwa ema Viya!”

8Tétavikawa eta náramira'i nuti eta nímaira'i tamutu eta júkana, nusamira'i nuti Juan. Tási'a, te tamutupa, népuyukapa te máiwapeana ema ángele ema tímechanu'i eta juka. Nuwara'apa nutsiukayare'ini. 9Émasera máichanupa: “Péchepukachucha, wa'i pikutsiukanu, taicha núti'ichu'i pikutikenenu'i mawanaranu'i ema Viya, énapa ena pichamuriana'i ena tikametarairuana eta máechajiriruwana ema Viya, énaipa ena tisuapana'i tamutu eta takajukeneana'i te juka Ajureka, ema tatuparaka'i. Pitsiukayare ema Viya.”

10Énerichuware máichanuwarepa: “Wa'i pikueñaucha eta juka wanairipi, pimetajirika eta juka pimetakasiwana'i eta máechejiriruwa ema Viya piájuchakeneana eta te juka Ajureka, taicha tiáne'ipa eta táitauchirawayare tamutu eta táichararakawayare'i. 11Énasera, nákani wínarajiana'i, wa'i pikukamesawaka, náimiyanawacha'a naicha eta nawinarajiwa, nákani tíchana'i eta tamaurikeneana, náimiyanawacha'a naicha eta tamaurikeneana'i, nákanisera tíchana'i eta táurikeneana, tatuparaka'i náimiyanawachucha naicha eta táurikeneana, nákani matapirawareana'i te mamira'u ema Viya, náimiyanawaware nauri eta maye'e.”

12Ániware maka'e ema Viákenu: “Nútijapawanenapa, namayarepa'i eta náijarakasianayare, émanaichusera tijakapayare eta naikuchi'i, etapasera tiamayare eta naichakeneana'i te tiuripuka wa'ipuka, ena tikaemataneakanuana'i eta náitaresira'i te juka apake'e, éneichuware námayarepa'iware eta naye'eanayare ena masuapajiraira'ana. 13Nútira nécha'i tamutu te tépanawainapa eta apake'e, núti'ichuware nécha'i eta táimiyanirawa'i tiuri, puiti nuti nítauchayare tamutu.”

14Tétavikawa eta náurikakarewayare nákani tépachinachana eta náchanewana, takuti te tikasipaji'ana eta namuiri'ana, ena tatuparaka'i nanikayare'i eta ta'i eta yukuki tikaitarekara'i, tatuparaka'iware nasiapayare eta Arairu Jerusalén. 15Énasera ena masuapajiraira'ana'i wa'i títujikawanaima'i tisiapana, nanasiyare te aneka, énapa ena iápemareana, ena tú'usiana, ena tikapa'iana, ena tikasiñarajiana eta achanemirana, énerichuware ena tiúrikana'i tási'a ena tépiya'ira'iana tikaetemara'iana.

16Maka'eware ema Viákenu: “Nuti, Jesús, nuwaneka'i ema nuye'e ángele máimikaecherachayare'i tamutu eta juka numetarapiana puiti eye'e eti nuchanerana te awasareana. Nuti, yátupinu'i Rey'i ekuchapakene'i, mawanerunu'iware ema Tata. Tétavikawa'i eta nujaraiwa'i taicha eta akenukairanu'i ichape.”

17Ema Machanewa Viya énapa ena té'ikana'i ema Cordero, tíchuarekana, naka'e'i: “¡Yare!” Tási'a nákani tisamanaya naka'e: “¡Yare!” Énapa nákani timauneanayare, náiteka apaesa náera eta une tikaitarera'i, tájina wa'i nawacharekaima'i.

18Emutu eti esamayare eta juka mametarapiana ema Viya, takajukeneana'i te juka libro, nuwara'a numetaka'e: Nákani nawayuyupika eta táechejisi'akeneana'i eta juka libro, éneichuware ema Viya mawayuchinayare eta nakatajiwairayare taye'e eta juka ekuñarakianayare táechejisi'akeneana'i. 19Éneichuware ekaunechawa eta iáñauchira eta táechejisi'akeneana'i te juka libro, machu máñaucha'e ema Viya eta esiapira eta juka máwasa sántokene'i, machu wa'i makuenika'e eta ta'i eta yukukiana tikaitarekara'iana, étaipa eta nájurekeneana te juka libro.

20Mákani títametaka'i eta júkana, maka'e'i: “Tiuri nútijapawaneyare.”

Amén ¡Yarepa, Tata Jesús!

21Émaina ema Viákenu Jesús, táetaviucha'ini eta iúrikakarewaya máicha emutu eti.

Currently Selected:

Apocalipsis 22: IGB

Highlight

Compare

Copy