Bafilipi 2

Kulicepesha ne kukonempa kwa Klistu

1Buyumi bwenu muli Yesu Klistu bukute kumupa ngofu, kayi lusuno lwakendi lukute kumupa katontoshi. Mukute kwikala ne moyo umo mu Mushimu Uswepa, kayi mukute nkumbo kayi nekuyandana umo ne umo. 2Neco ndamwambilinga kwambeti munkondweleshe nekusuminishana manjeyaulwa, kayi ne kuyandana kumo, nekwikala ne moyo umo, ne muyeyo umo. 3Kamutensanga bintu mwakulisuna nambi mwakulitukumuna sobwe, nsombi kulicepesha kuli umo ne munendi. Cindi conse kamuyeyangeti munenu wamupita. 4Kamutensanga bintu mbyomusuni amwe mwenka nsombi ne bintu mbyobasuni banenu. 5Neco mwense mube ne moyo ngwalikukute Yesu Klistu.

6Nendi walikukute bwikalo bwa Lesa,

nsombi nkaleleshapo kulyelanika ne Lesa wangofu.

7Nendi walalichepesha

nekwikala bwikalo eti musha,

kayi walekala nebuyumi eti bantu bonse.

8Walalicepesha, kayi walenda mubuyumi

bwakunyumfwila mpaka kushikila ku lufu lwakendi

lwapalusanda.

9Pacebo ici Lesa walamusumpula kupita byonse

nekumupa lina lyapita maina onse.

10Walenseco kwambeti lina lya Yesu lyashumbulwa

bintu byonse byakwilu ne byapanshi kayi ne panshi pacishi

bikasuntame panshi nekumukambilila,

11kayi byonse nibikasuminishe pantangalala kwambeti Yesu Klistu ni Mwami,

kwambeti Lesa Bata balemekwe.

Kamubalani eti mumuni pacishi capanshi

12Pacebo ici mwasunika, mwanyumfwilanga cindi conse mpondanga nenjamwe, nomba kamunyumfwilanga nambi ndi patali nenjamwe. Mupitilishe kusebensa mwabuyowa nekututuma kulesheti mwapuluka, 13pakwinga Lesa endiye ukute kusebensa mulinjamwe, neco kamuyandanga kwinsa bintu byeshikumukondwelesha.

14Kamwinsanga bintu byonse mwakutatongauka nambi kutotekeshana, 15kwambeti mube babula kampenda kayi nekuba bana ba Lesa baswepa abo balekalanga muchishi cabantu bapilinkana mano, kayi beshikulwanisha banabo. Pakati pabantu bamushoboyo mukute kubala eti nyenyeshi pacishi capanshi, 16pa kubambila maswi eshikupa buyumi. Neco ame ninkabe necebo cakulinyumfwa pabusuba bwakubwela kwa Yesu. Busuba ubo nicikenshibike kwambeti nkandalasebensa mulimo wabulyo, kayi kwelesha kwakame kuliya kuba kwabulyo.

17Lushomo lwenu lulyeti cipo ca mulumbo ulabengangwa kuli Lesa, neco na milopa yakame itika pa cipo ca mulumbo, ame ngankondwa pamo nenjamwe mwense. 18Cimo cimo nenjamwe mubenga mwakondwa, kayi nekusangalala pamo nenjame.

Sha Timoti ne Epaflodito

19Na Mwami Yesu lasuminishi, ndashoma kwambeti ninkachikonshe kutuma Timoti kulinjamwe lino lino, kwambeti nkayuminishiwe ne mulumbe weshikufuma kulinjamwe. 20Endiye enka lamushilingonga mano eti njame. 21Aba nabambi balashala balashilinga mano kubintu byabo kutamba pacebo ca Yesu Klistu sobwe. 22Mwense muyinshi kendi milimo yaina Timoti njakute kwinsa pakwinga ndalasebensa nendiyeti mwana ne baishi, pakukambauka Mulumbe Waina. 23Pacebo ici ndashoma kwambeti nindimutume mwakufwambana, nimbone bintu ncoshi binyendele. 24Ndashoma Mwami kwambeti, nenjame ninkese lino lino. 25Lino ndayeyeti ngacinyamfwa na ndamutumu kulinjamwe mukwetu Epaflodito. Nendi lasebense pamo nenjame, mushilikali muname,uyo ngomwalatuma kwisa akunyamfwa ame. 26Pakwinga layandishishinga kumubona mwense, kayi wongumana pacebo cakwambeti wabanga mulwashi mbuli ncomwalanyumfwa. 27Nicakubinga wabanga mulwashi pepi nekufwa. Nsombi Lesa wamubela nkumbo, kayi liyawa kwinshila inkumbo nendi enka sobwe, nsombi nenjame kwambeti ampulushe kumapensho anene. 28Weco ndayandishishinga kumutuma kulinjamwe kwambeti mukasekelele pamo nendiye mwakamubona, lino kungumana kwakame nikukacepe. 29Neco kamumutambulani camakasa abili nekukondwa eti mukwetu muli Klistu. Bantu bamushoboyu mwelela kubalemeka. 30Walayanda kufwa cebo camulimo wa Yesu Klistu. Walalibenga mwakutatina kwambeti ngofwa, kwambeti anyamfwe pa bintu ibyo amwe mbyomwalikubula kucikonshya.

Currently Selected:

Bafilipi 2: SBT

Highlight

Copy

Compare