Ɓi Rom 7
7
Ɓoyi kos nikisɗi ñaamiŋ nakoh ciŋ waasi
1Ɓaah ciŋ ngo, ŋ inhiɗ ne mi na woye na ɓi inah waas, kon ɗu inhiɗ ne waas na yilfe ɓo' ŋ wi a na pese. 2Wa mand na ɓitɓi toku, feeh ƴaar ce yii pes ɗah, e waas amb ɗe ŋ niyiŋ ƴaar ce ; waaye ƴaar ce kaan ɗah, a saɓsukohiɗ na waaseem. 3Nik ne, ƴaar ce yii pes, a nik ɓitiɓ ƴaar wiiriis ɗah, a woysan ne a na njaalo'e, waaye ƴaar ce kaan ɗah, a saɓsukohiɗ na waaseem ; a nik ɓitiɓ ƴaar wiiriis ɗah, a njaalooɗi.
4Wa nam mand ɗaa nga ɗu, ɓaah ciŋ ngo, taamboh ŋ kakaan kiŋ Kiristaani ɗu kaaniɗ ŋ ini kaɗ ŋ waasi. Kon harmban ɗu na waasi reehiɗ, kotii, ɗu wuu ɓoyi kaan, hulitta ne ɓoo min rim in baahiɗ wuu Kooh. 5Wa ɓoo meeɗ taambiɗ kiñin ciŋ ɓoo, nakoh ciŋ waasi yunee waaɗ-waaɗ ciŋ ɓoo baahaaɗiici. Te waaɗ-waaɗ ceem, ceɗ pangkee ŋ cir ciŋ faan ciŋ ɓoo, ne ca rimiɗ ɓoo kakaan. 6Waaye, ɗiski wa nik, ɓoo kaaniɗ ŋ ini kaɗ ŋ waasi, ɓoo saɓsukohiɗ naa, weɗ wi ambee ɓoo ñaam. Ɓoo ñaamkisɗi Kooh taamboh ŋ fiis ci maañiɗ ci, waaye ɓoo na ñaamkee ɗe taamboh ŋ in as puloh ŋ Fuuɗsi Hoolohngaani.
Waasi na bakaaɗ
7Kon ineem tokis ye ? Waasi na bakaaɗ, ca yino e ? Muk ! Waaye, ŋ heeɗi inhe ini bakaaɗ nik, ne waas raakeeɗi ɗah. Laam waasi woyeeɗi inii ɗah : « Fu waaɗɗanɗi haf fu iniŋ morom fu#Pula 20:17 », mbaa ŋ heeɗi inhe ne ineem bakaaɗ. 8Ŋ ineem, bakaaɗ tonduk nakohii, ɓekka nga so waaɗ-waaɗ nu nik ŋ ini kaɗ ŋ in ɓo' ; waas raakɗi ɗah, bakaaɗ na nike ini kaan.
9Ŋ maañ ɗah, mi, ŋ peseen te nakoh ciŋ waasi raakeeɗi ; waaye wi nakoh ciŋ waasi hay, bakaaɗ peseeɗa, 10mi, ŋ kaannda. Ɗaa, nakohi, wi joyee so ɓay ŋ kipes, weɗ mirndoh ho ɓay ŋ kakaan. 11Laam bakaaɗ tonduk nakohi, wa ñaañohha so. Wa taambohha nga, wa appa so. 12Waaye waasi, wa in hooliɗ wuu Kooh, nakoh nu nik nga ɗah, wa in hooliɗ wuu Kooh, wa yurhiɗ te wa baahiɗ.
13Kon in baahiɗ weɗ ap po e ? Muk ! Waaye bakaaɗ, ne wa teeɓoh haf wa, wa taamboh ŋ in baahiɗ, wa appa so. Ɗaa, wa taamboh ŋ nakohi, wa teeɓohha baahaaɗiikiŋ wa, wi raakɗi ɗiski wa top.
Hiñohi nik ŋ ɗooƴ co
14Ɓoo inhiɗ ne waasi puloh ŋ Fuuɗsiŋ Kooh, waaye mi, ŋ ɓo' dong ; ŋ ñaami bakaaɗ rom. 15Ŋ inahɗi ini na tumɗukohee so ini mi na tume ; ini ŋ waaɗ tum, mi na tumeeɗaa, waaye ini ŋ sang, weɗ mi na tume. 16Nik ne ini mi na tume, wa ini ŋ waaɗɗi tum ɗah, kon ŋ teyɗukiɗ ne waasi baahiɗ. 17Nik ne wa ɗaa ɗah, a ñam na tumee haa, a bakaaɗi gen ŋ ɗooƴ co weɗ na tumɗukohee so.
18Ŋ inhiɗ ne ali in baahiɗ genɗi nga so, maanaam mi yi ɓo' dong. Laam ŋ waaɗiɗ haɓiɗ ini baah, waaye ŋ minɗi wa haɓiɗ. 19Mi na tumeeɗi ini ŋ waaɗ, in baahiɗ, waaye mi na tume baahaaɗiini, ini ŋ waaɗɗi. 20Ŋ tumee ini ŋ waaɗɗi ɗah, mbaa a ñam na tumee wa haa, a bakaaɗi gen nga so.
21Inii daal, ŋ hotiɗa nga so, weɗ ne : Ŋ waaɗta tum in baahiɗ ɗah, e baahaaɗi na hayɗohee so. 22Ŋ ɗooƴ co, mi na raakohe ini neɓ po ŋ nakoh ciŋ waasiŋ Kooh. 23Waaye ŋ in ci mi na tume jen, mi na hote waas wiiriis weɗ na hiñohe na waasi ŋ teyɗuk ŋ ɗooƴ co, waaseem weɗ amb mbo, wa taƴca so, weɗ waasiŋ bakaaɗi gen ŋ tumohaaɗ ciŋ ngo jen. 24Mas so deey ! Ya ɓa naafan ndo ŋ faanii na ɓayee so ŋ kakaan ?
25Waaye Kooh corkiɗaah, a naafiɗ ɓoo taamboh ŋ Yeesu Kiristaa, Heɗ ɓoo !
Kon mi, ŋ ɗooƴ co, mi na pangkiɗe waasiŋ Kooh, waaye ŋ tumohaaɗ ciŋ ngo, mi na pangkiɗe waas bakaaɗ.
Currently Selected:
Ɓi Rom 7: YM
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc
