Maarko 6

Ɓi Nasareet sangiɗ kos Yeesu

1Wa Yeesu kurkoh ndaam, a kaɗta kur ka a yakoh, taalubeeciŋ ɗe hunnda na ɗe. 2Ŋ mbehi na iɗsiɗkohse, a jangɗoheeɗa ŋ sinaagoga. Ɓooɓa laayiɗ ca sikɗukee ɗe feyuusa, ɓa woyeeɗa ne : « Ini ƴaarii inah wii a ɓayoha nde ? A eɗu ki'inah ye wii ? Na keemaan ci a na haɓɗe ? 3A miniseeni, yi kuɓkiŋ Maryaama haa e ? A taambɗoh Saak na Yoose na Yuud na Simong haa e ? Taambɗoh ciŋ ɗe ɓitiɓ ci nikɗi na ɓoo ndii e ? » Ineem weɗ tahee po ɓa minɗi ɗe teyɗuk.

4Waaye Yeesu woosa ɓa ne : « Woosuuɗ na kerhiɗasse ŋ ɗisik ci jen po tas kur ka a genoh, na ɗooƴ ɓaah ciŋ ɗe na kahan ɓa. » 5Ineem tahha po Yeesu minɗi haɓiɗ keemaan nga, nikɗi dega a degee ɓi kosaayiɗ yaah ciŋ ɗe, a wirɗeeɗa ɓa ɗah. 6A feyuusa ŋ kosaaɗiikaŋ ɓa.

Yeesu tuuƴiɗ Apootar ci

Wa Yeesu kurkoh ndaam, a wileeɗa, a jangɗoheeɗa ŋ kur ca nikee ŋ ɓak caam. 7A ɓeeɗukka Apootar ci ndaŋkiyaah na kanak ci (12), a tuuƴeeɗa ɓa kanak kanak ; a onnda ɓa hatil aañoha jiini. 8A nakka ɓa ne : « Ɗu kaɗee ɗah, kinaat ɓayndoh ali in, ɗal ndooɗ ŋ yaah. Kinaat ɓay kañam, kinaat ɓay saak te kinaat ɓay kopor. 9Ɓekkaat ñafaɗ, waaye kinaat ɓekuk kulɓa kanak. »

10A woyissa ɓa ne : « Kahan nu ɗu daloh ɗah, nikaat nga po mbaɗna ɗu pulan kur ka. 11Waaye ɗu teyɗukuuɗi ŋ ɗisik, ɓa sikɗukɗi ɗu ɗah, paangaat merhey miŋ kot ciŋ ɗu ne ɗu cootee ɗah, wa teeɓ ɓa ini ɓa haɓiɗ. »

12 Apootar ci kaɗta, ɓa woyeeɗa ɓooɓa ne ɓa ɓoƴsohaat pesohaaɗ. 13Ɓa aañeeɗa jiini laayiɗ, ɓa reefeeɗa diw ŋ haf jiriɗ gooñ, ɓa wirɗeeɗa ɓa.

Kakaan kaŋ Yahya Ɓoktohi

14In ceem kaɗoh kaɗoh po Herod buura kerahha ca, raak tiikiŋ Yeesu wiliɗ kur. Ɓooɓa woyee ne : « Ƴaareem, a Yahya Ɓoktohi ; a hultiɗu hultiɗu, weɗ tah a raakka hatil haɓɗoha in feyohiɗ ! » 15Ɓum an : « A Ilyas. » Ɓinooɓi woyeeɗa ne : « A woosuuɗ, findi woosuuɗ ca ɗeɓgaan. » 16Herod kerah ineem, a woosa ne : « Ƴaareem, a Yahya Ɓoktohi, yi ŋ nguɗɗukee hafiŋ ɗe. A hultiɗu hultiɗu. »

17-18A Herod yeem, a yi taƴɗukee Yahya sagu inii : A yi Herod, a kooɗee Herojaad, ɓiti taambɗoh ce Filip, a tummba ɗe ɓitiɓ. Yahya woyee na ɗe ŋ ineem an : « Waasiŋ Kooh teyɗohɗi ne fu ɓay ɓiti taambɗoh fu, fu tum ɗe ɓitiɓ. » #Lewiici 20:21 19-20Herojaad ambiɗta Yahya aay-keeñ ŋ ineem, a waaɗta ɗe apɗuk, waaye Herod neƴƴohee neƴƴoh Yahya te a inheen ne a ɓo' yurhiɗ, hooliɗ wuu Kooh. Tahha po a meeɗ ɗe meeɗ niiɗ po Herojaad mineeɗi ɗe apɗuk. Ɓaat nga, Yahya woyeesa ɗah, a yi Herod, a meeɗ meeɗ feyu lool ; hondohɗi a meeɗeen neɓu ŋ sikɗuk ɗe.

21Kaɗeeɗa po mbeh, Herojaad raakka tondkoha ; wa nikee wa Herod yakɗee mbehi a raakohu. A yi Herod a haɓɗiɗukka kañam laayiɗ, a ɓeeɗukka dag caŋ ɗe na kilifaacaŋ soldaar ca na kilifaacaŋ Galile. 22Mbaɗi, kuɓkiŋ Herojaad ɓitɓi aassa ŋ ɗiska ɓa nikee, a mbeceeɗa, a neɓpa Herod na hanheecaŋ ɗe. Herod woosa kuɓka cafƴa ne : « Woo so ini fu waaɗ, ŋ hey ɗa wa one. » 23A giñiɗta ɗe ineem, a woosa ɗe ne : « In nu fu meekis so ɗah, ŋ hey ɗa wa eɗe ; ali wa nik haaƴiŋ nguuriŋ ngo sah, ŋ eɗ ɗa wa. »

24Kuɓka cafƴa pulla, woosa yaay ɓa ne : « Ŋ meeksan ɗe ye ? » Yaay ɓa loffa ɗe ne : « Meeksaa ɗe hafiŋ Yahya Ɓoktohi. » 25Kuɓka cafƴa arra dokuk ŋ buura, a woosa ɗe ne : « Ŋ waaɗ ne fu eɗ to win-win, ŋ palaat, hafiŋ Yahya Ɓoktohi. » 26Herod soossa waaye giña a giñee ŋ fiki hanheeca tahha po a minɗi ɗe wa sangiɗ. 27A jaarra woos soldaar, a nakka ɗe komu hafiŋ Yahya. Soldaara kaɗta, nguɗta hafiŋ Yahya ŋ ɗiska a nikee ŋ kasoona, 28a hayya naa ŋ palaat, a eɗta kuɓka cafƴa wa, yeem eɗtaa yaay ɓa.

29Wa taalubeecaŋ Yahya kerah ineem, ɓa kaɗta, ɓa ɓayya fiɗaafaŋ ɗe, ɓa ɓekkaa ŋ ruy-ruy.

Laayɗa Yeesu laayɗee mbuuruuca

30Ini kaɗ ŋ Apootar ca Yeesu tuuƴee, wa ɓa dokuk, ɓa cohha ŋ ɗiska na ɗe, ɓa naandsukka ɗe in ca ɓa haɓiɗ na in ca ɓa jangɗoh jen. 31A woosa ɓa ne : « Hayaat ɓoo ɗaaya ŋ ɗisik eendiɗ, ɗu iɗsiɗuk ƴissuut. » Raak ɓa ɓo' laayiɗ ɓeɗ nikee nga, ɓum kaɗeesa ɗah, ɓum haye ; tahha po Yeesu na taalubeeciŋ ɗe rahasɗi ne ɓa ñam. 32Ɓa ɓayya gaal ne ɓa ɗaaya ŋ ɗisik eendiɗ. 33Waaye ɓo' laayiɗ hotta ɓa kaɗeeɗa, inhissa ɓa ; ɓi kur caam jen nuppa, adugka ɓa ŋ ɗiska ɓa kaɗe.

34Wa Yeesu na taalubeeciŋ ɗe ree po a ruhussa ŋ gaala, a hotta mboolo yakak, ɓa misikka ɗe lool ; ɓa mandee na mbaal raakaaɗi niiɗoh. A jangɗeeɗa ɓa in laayiɗ.

35Wa niina ree, taalubeeciŋ ɗe reɓpa nga ɗe, ɓa woosa ɗe ne : « Ndii wa bilaf, te Kooh yii hooɓeeɗa, 36woya ɓooɓii ɓa kaɗ ŋ kur ci reɓ ndii ne ɓa rom ini ɓa joy ñam. » 37A loffa ɓa ne : « Ɗu, eɗaat ɓa ini ɓaa hee ñame. » Waaye ɓa woosa ɗe ne : « Ɓoo na hee ɓa kee romɗa mbuuru na hanjar dinaar teemet-kanak (200) hanaa ? » 38A woosa ɓa ne : « Ɗu raak mbuuru hend na ? Kaɗaat ɗu marka. » Ɓa marakka, ɓa loffa ɗe ne : « Ɓoo raak mbuuru yatuus na cuurund kanak. »

39A nakka ɓa ne ɓa ɓoofɗaat ɓooɓa jen rung rung ŋ paangfa iirnda. 40Ɓa ɓooffa teemet teemet (100-100) na ndaŋkiyaah-yatuus ndaŋkiyaah-yatuus (50-50). 41A ɓayya mbuuruuca yatuus ca na cuurund ca kanak ca, a marakka ŋ ɗafki, a corkiɗta Kooh. A nguɗsohha mbuuruuca, a eɗta taalubeeci ca ne ɓa paysoh ca mboolnda, a nammba tum cuurund ca ɗaa po ɓooɓa jen raakka. 42Ɓooɓa jen ñammba po ɓa kappa. 43Wa ɓooɓa ñam po ɓa ƴutta, taalubeeca nangɗohha tasɗohiica po ɓa raakka ini mit pañe riifiɗ ndaŋkiyaah na kanak (12). 44Ƴaar ca ñamee ŋ ɗiska nikeen ŋ ɓak junni-yatuus (5000).

Yeesu tiindiɗ ŋ ɗafuk masma

45Wa ɓa nangɗoh tasɗohiica po ƴutta, Yeesu jaarra, tufukka taalubeeciŋ ɗe ne ɓa aasaat ŋ gaala, ɓa adgohaah ɗe ŋ ɓakaŋ winooraŋ cookma, ŋ ɓak Betsayda ; a saɓsukoheeɗa na mboolnda.

46Wa a askoh na mboolnda po ƴutta, a kaɗta tango ne a kiima Kooh. 47Wa weka ree, raak gaalaŋ taalubeeca ŋ leero cookma, Yeesu tassa kiik ce ŋ merhey ma suyɗa. 48A hotta ne taalubeeca yaaɓiɗ ŋ joowaŋ ɓa na gaala, sagu puuɗsa yurhiɗkohee na ɓa. Ŋ wiisaaɗiina, a tiindeeɗa ŋ ɗafuk masma, a kaɗeeɗa nga ɓa po a heeɗa ɓa cootke. 49-50Ɓa jen, ɓa hotta ɗe tiindeeɗa ŋ ɗafuk cookma, ɓa liiɓpa ne a husiɗ, ɓa feyuusa keeh-keeh, ɓa leehkeeɗa. Jaarra, a jommba na ɓa, a woosa ɓa ne : « Hunaat na sagoociŋ ɗu ! A ñam ! Kinaat neƴƴoh ! » 51A kaɗta nga ɓa ŋ gaala, puuɗsa seemmba. Ŋ ineem, ɓa nikka feyuuɗ jameet ŋ ɗooƴ ɓa po ɓa inhisɗi in ci ɓa haɓɗan ; 52raak ɓa ambɗi ali in ŋ ina a haɓɗee na mbuuruuca. E ndengaŋ ɓa keeñ tahe.

53Wa ɓa reehiɗ ƴakaanduk cookma, ɓa teerra ŋ kur kaŋ Senesaret. 54Ɓa yipuk yipuk rek, ɓooɓa inhissa Yeesu, 55ɓa nupeeɗa, ɓa aaseeɗa ŋ kur caŋ ɓak caam jen. Ŋ ɗisik nu ɓa kerahha ne a yaa nga ɗah, ɓa komee ɗe kosaayiɗ ca nga, faanuuɗ ŋ faankoha. 56Wa kur ca yakak ca haa, wa ca ƴin ca haa, te wa pariɗ ca haa ; ɗisik nu ɗisik ŋ toonohaaca ŋ kur ca, ɓa ɓayeeɗa kosaayiɗ ca nga. A reesa ndeem ɗah, ɓa kiimee ɗe ne ɓa laal lecmiŋ kulɓaakiŋ ɗe dong, te ɓooɓa laalee ɗe jen wireen.

Currently Selected:

Maarko 6: YM

Highlight

Copy

Compare