Maarko 11

Aasaŋ Yeesu Yerusalem

1Wa Yeesu na ɓa hunee na ɗe kaɗ po ɓa heeɗa ree Yerusalem, ŋ ɓak Betfase na Betani, ŋ sero Tangooraŋ-Oliiw-ca, a woossa kanak ŋ taalubeeciŋ ɗe. 2A woosa ɓa ne : « Kaɗaat ŋ kur ki ŋ fikiiɗu wii, ɗu aasee rek ɗah, ɗu hey hote cumbur mbaam tokuuɗ nga, yi ɓo' moosɗi rapoh. Toksaat ɗe, ɗu kom mbo ɗe. 3Ɓo' meekis ɗu ne wa ye tah ɗu toksee ɗe ɗah, lofaat ne : “ A kilifaani etoh ɗe, ƴut ɗah, a hey ɗe dokne ŋ ndii. ” »

4Taalubeeca kaɗta, ɓa raakka cumbraŋ mbaama tokuuɗ ŋ hara, ŋ nguɓu kahan, ɓa tokissa ɗe. 5Ɓi ɓo' ŋ ɓa nikee ŋ ndaam woosa ɓa ne : « Ɗu na haɓɗe ye an ? Wa ye tah ɗu toksee cumbriŋ mbaami ? » 6Ɓa loffa ɓa findi Yeesu woyohe, ɓa faɗuusa.

7Wa ɓa hay na cumbra, ɓa raɗta kulɓaacaŋ ɓa ŋ ɗafuk cumbra, Yeesu rappa nga ɗe. 8Ɓo' laayiɗ raɗɗeeɗa ɗe kulɓaacaŋ ɓa ŋ waasa, ɓum raɗeeɗa paangiica ɓa piikohee ŋ yohon ca. 9Ɓa adgee na ɓa ñaakee nga ɗe woyeeɗa ŋ ɗafka woo kii :

« Hosaana#11:9 Hosaana : ŋ ɗeɓgaana, wa tokseen ne : "Woti-woti, mucɗa ɓoo." Wa nikee kiim Kooh. Waaye, wa kaɗta po wa nikka woo yakɗoha Kooh. !

Ɓoyi na haye ŋ tiikiŋ Heɗi raakaat barke !

10Wa barke'aat,

Nguuriŋ caac ɓoo Dawuuda wi na haye !

Hosaana ŋ ɗisik ca uup ɗafuk !#Sabuur 118:26 »

11Weɗ Yeesu kaɗoh po a reesa Yerusalem, a aassa ŋ Kahan Kooh. Wa a maraka jen po ƴutta, a kurukka, a hunnda na taalubeeci ndaŋkiyaah na kanak ci (12), ɓa kaɗta Betani, raak Kooh hooɓeeɗa.

Yeesu ŋ Kahan Kooh

12Ŋ Kooh-wiisiina, a puleeɗa Betani, a aɗukka. 13A ƴokka ndun kifsiɗ, a kaɗta marka andi a hey raake ini a min ñam nga. Waaye wa a ree, a hotɗi ali in nga ɗal saaf ca. Wa nikeeɗi ŋ jamanooni ndun ci na rimohe. 14A woosa nduna ne : « Ali ɓo' ñamissanɗi rim ciŋ ɗa ! » Taalubeeciŋ ɗe kerheeɗa nga.

15Wa ɓa ree Yerusalem, Yeesu aassa ŋ Kahnaŋ Kooh, a aañeeɗa toonoh ca na romoh ca nikee nga. A foleeɗa taaɓul caŋ ɓoƴsoh kopor ca na ɓoofohaacaŋ toonoh banuut ca. 16A faɗeeɗi ali ɓo' ne a taamb na bagaas ŋ ɗooƴ Kahnaŋ Kooh. 17A jangɗeeɗa ɓooɓa an : « A inii weɗ woyu ŋ Fiis ci Hooliɗ ci haa e ? Ne : “ Kahan ndo teeksan kahan kiimoha wuu cuuɓ ci#11:17 Toonoh ca, na ɓooɓa meeɗ taamb na bagaas caŋ ɓa ŋ Kahnaŋ Kooh, ɓa meeɗ nik ŋ ɗiska ɓi nikɗi Yawuut topɗasse. jen.#Esayi 56:7 ” Waaye ɗu tumiɗa ɗembohaaniŋ rokoh ci. »

18Ŋ ineem kilifaacaŋ seeƴkiɗoh caŋ waasiŋ Musaa na jangɗohoh caŋ wa kerahha Yeesu, ɓa waakeeɗa findi ɓa hee ɗe apohe. Ɓa neƴƴoheen ɗe sagu aasa jangɗohiŋ ɗe aasee mboolnda.

19Wa niina ree, Yeesu na taalubeeciŋ ɗe pulla Yerusalem.

Nduna Yeesu yonjee

20Ŋ Kooh-wiisiina na ɓaaɓa, ɓa dokkeeɗa po ɓa teembeeɗa ŋ nduna, ɓa hottaa suyiɗ po ŋ niir ca. 21Piyeer naandsukka ina raake, a woosa Yeesu ne : « Jangɗohohi, marka ! Nduni fu yonjee#11:21 yonj : kiim in moɗaaɗi ne wa raak. suyiɗ kong ! » 22A woosa ɓa ne : « Kosaat Kooh, 23ñam na woyee ɗu wa te wa keeh, ɓo' nu woo tangoorii ne : “ Kurka ndii, njafka ŋ cookma ” te a raakɗi liiɓ kanak nga, waaye a kos ne ini a woo hey raake ɗah, Kooh hey ɗe wa tumɗe. 24Weɗ tah mi na woyee ɗu ne, in nu ɗu kiimee Kooh ɗah, kosaat ne ɗu rahsiɗa po ƴutiɗ, Kooh hey ɗu wa tumɗe. 25Fu kiimee Kooh te raak, fu ambɗiɗ morom fu in ɗah, ɗaasa ɗe, Baabiŋ ɗu, yi ŋ Eel ci nam ɗa ɗaas. [26]#11:26 Ngaŋ Fiis ci maañiɗ ci, cum raak ayaanii : "Waaye ɗu ɗaasohɗi ɗah, Baabiŋ ɗu, yi ŋ ɗafki, ɗaasanɗi ɗu bakaaɗ ciŋ ɗu." Waaye Fiis ci uup woor ngaŋ ci maañiɗ ci ris woti raakɗi woo keem. »

A ɓa tufkiɗ Yeesu ?

27Wa Yeesu na taalubeeciŋ ɗe dokkis Yerusalem, a tiindsukeeɗa ŋ ɗooƴ Kahan Kooh, kilifaacaŋ seeƴkiɗoh caŋ waasiŋ Musaa na jangɗohoh caŋ wa na yakak ca, hayya nga ɗe. 28Ɓa woosa ɗe ne : « In ci fu na haɓɗe, fu gaƴuk nde po fu kaannja ca haɓiɗ, wala a ya ɓa tufkiɗ ɗa ne fu haɓiɗ ca ? » 29Yeesu loffa ɓa ne : « Maa hee ɗu meekse in yino dong, lofaat to, ŋ woo ɗu ini tufkiɗ to po ŋ haɓɗee in cii. » 30A woosa ɓa ne : « Ya ɓa tuuƴee Yahya ne a ɓoktoh, a Kooh wala ɓi ɓo' ? Lofaat to ! » 31Waaye ɓa woyeeɗa ŋ harmban ɓa ne : « Ɓoo woo ɗe ne Kooh a yi woos Yahya ɗah, a na hee woye ne : “ Wa ye tah ɗu kosɗi ɗe ? ” 32Te ɓoo namɗi kaañ woo ne wa puloh ŋ ɓooɓi. » Ɓa neƴƴoheen ɓooɓa laam mboolnda jen ambeen ne, Yahya nikee woosuuɗ keeh-keeh. 33Ɓa loffa Yeesu ne : « Ɓoo inahɗi. » A woosa ɓa ne : « Kon ŋ namanɗi ɗu woo ini tufkiɗ to po ŋ haɓɗee in cii. »

Currently Selected:

Maarko 11: YM

Highlight

Copy

Compare