Macce 24

Yahuukiŋ Yerusalem na hayisiŋ Kuɓkiŋ ɓoyi

1Wa Yeesu pul Kahan Kooh kaɗeeɗa, taalubeeciŋ ɗe hayya nga ɗe, ɓa woosa ɗe ne : « Marka taɓah ciŋ Kahniŋ Kooh, findi ca moɗoh ! » 2A loffa ɓa ne : « Ɗu hotiɗ in cii jen haa e ? Ñam woo ɗu wa te wa keeh, ali atoh tasanɗi ŋ ɗafuk atoh ŋ ndii, ca jen ca hey yahrohse. »

3Yeesu kaɗta ɓooffa ŋ Tangooraŋ-Oliiw-ca, taalubeeci reɓpa, ɗaayya na ɗe, woosa ɗe ne : « Woya ɓoo jamanooni in ceem na hee raakohe, na ini na hee teeɓohe hayiŋ ɗa na reehiŋ Adina. »

4Yeesu loffa ɓa ne : « Wortukaat, ali ɓo' kinaat ɗu muuƴiɗ. 5Laam ɓo' laayiɗ hey haye ɓa kooɗ tiikiŋ ngo, ɓa woyee ne ɓeɗ Mucɗohi Gapohse te ɓa hey muuƴɗe ɓo' laayiɗ. 6Ɗu hey kerhoote ɓi hiñoh yakak, ɗu hey name kerah yegɗoh ci na woye ŋ hiñoh. Waaye, wortukaat neƴƴoh ; in ceem joy joy raak, waaye wa nikanɗi ne Adina na reehe. 7Cum ɗah, kur hey hiñohe na kur morom wa, buur hey hiñohe na buur morom ce, aɗ raak ŋ ɓi ɗisik, kehƴi namee yoondɗuk ŋ ɓi ɗisik, wa nikohan ɗaa. 8Ceem jen ca nikan cambiŋ miskiɗ ci, findi ɓitɓi na hee ɓasle.

9Ɗu hey ɓayse ne ɗu mbugalu, ɗu hey apse, cuuɓ ci jen hey ɗu sange saguuso. 10Laayiɗ nga ɗu hey keene ; ɓum hey wore ɓum, ɓa hey sangtiɗohe. 11Ɓo' laayiɗ hey haye ɓa tum haf ɓa woosuuɗ te ɓa woosuuɗ haa, ɓa hey muuƴɗe ɓo' laayiɗ. 12Wa hey kaɗe po waaɗi ɓo' laayiɗ waaɗ morom ciŋ ɓa haawsuk sagu eɗaaɗi waas cir ; 13waaye ɓoyi na hee ndengɗuke muñ po ŋ reehɗohaana, hey mucɗasse.

14 Yegɗohiŋ Muci, wiŋ Nguuriŋ-Ɗafki, hey yegɗohse ŋ adinaani jen, wa nik seede ŋ cuuɓ ci jen, ƴut ɗah, reehiŋ Adina han hay.

15Kaɗ po ɗu hot ini araamiɗi na yahrohe tufkiɗ ŋ Ɗiski Hooliɗi findi woosuuɗi Dañeel woyohee wa ɗah#Dañeel 9:27; 11:31; 12:11, - Fu yi na jange Fiis cii, inha ! - 16ɓooɓi wa raakan ŋ Yudee, ɓa saandohaat ŋ tangooca. 17Ɓoyi wa raakan ŋ ɗafuk teeraasiŋ ɗe, a ruhsee ɗah, a kinaat aas ne a na hee ɓaye in ciŋ ɗe ŋ ɗooƴ kahan ce ; 18ɓoyi wa raakan ŋ yohon ca, a kinaat gurid ne a ɓay kulɓaakiŋ ɗe. 19Mas ɓitiɓ ci na hee nike rook ŋ jamanooneem na ɓapɗoh ci ! 20Kiimaat Kooh po saandohiŋ ɗu nikuu ŋ jamanooniŋ soosi wala ŋ mbehi na iɗsiɗkohse. 21Laam ɓooɓi hey raake miskiɗ lool, miskiɗ mand ɗaa moosɗi raakoh ina Adina nikoh poyi te wa raakissanɗi. 22Te mbeh ceem haawsasseeɗi ɗah, ali kiñin heeɗi muce, waaye ca hey haawsasse sagu ɓooɓi Kooh tan.

23Ŋ jamanoonaam ɓo' woo ɗu ne Mucɗohi Gapohse yii ŋ ndii wala ŋ nden ɗah, kinaat ɗe kos. 24Laam ɓi ɓo' hey haye, ɓa tum haf ɓa Mucɗohi Gapohse wala woosuuɗ te ɓa yino nga ca haa, ɓa haɓɗee firnde yakak na keemaan ne ɓa muuƴiɗ ɓooɓi po ɓi Kooh tan sah ne wa mineen nik ɗah. 25Weɗi weem nak, ŋ woyiɗ ɗu wa bala wa hayan.

26Ɓa woo ɗu ne : “ A yi ŋ ndii ŋ kehƴi hulangi ” ɗah, kinaat kaɗ. Wala : “ A yaa ɗasɗukka nden ” ɗah, kinaata kos. 27Findi meleñ na pulohe ŋ pulohaaɗ-noh, wa ñiiniɗ po ŋ muyohaaɗ-noh, hayiŋ Kuɓkiŋ ɓoyi mandan ɗaa. 28Ɗiski fiɗaaf nik, suur ci na cohe nga.

29Miskiɗ ciŋ mbeh ceem reehee rek ɗah, nohi ñuus, caɓni ƴim, hor ci keen te hatil ci nik ŋ eel ci yoondɗu. 30Firndeeniŋ Kuɓkiŋ ɓoyi hey hotke ŋ eel ci, teemb ndeem, cuuɓ ciŋ kehƴi jen hey miskiɗke te ɓa hey hote Kuɓkiŋ ɓoyi, eel ciŋ Asamaan haytohee ɗe, a riif na hatil na kiyak. 31Kuluɓ hey ɗiiɗɗe, a woos malaakaaciŋ ɗe, ca kaɗ ɓak po ɓak ŋ adinaani jen ne ɓa teembɗoh ɓooɓi a tan.

32Inhaat ini nduni jangɗoh : Kaɗ po naak ciŋ wa hiƴ, wa camb kifis ɗah, ɗu na jaare inah ne rehi usisɗi. 33Wa mand ɗaa, ɗu nam hot in ceem jen ɗah, inhaat ne wa usisɗi, weɗi ŋ nguɓu kahni. 34Ñam na woyee ɗu wa te wa keeh, ɓooɓiŋ adinaani woti kurkohanɗi nga jen te in ceem jen raakɗi. 35Eel ci na kehƴi hey coote waaye woo ciŋ ngo moosanɗi kurkoh nga.

36Ini kaɗ ŋ mbehi na wahtuuni in ceem na hee raakohe, ali ɓo' inahɗi ca. E malaakaaciŋ Eel ci haa [te a Kuɓki haa] ; waaye a Baabi dong inaha. 37Kuɓkiŋ ɓoyi hay ɗah, wa mandan findi wa mandee ŋ jamanoonaŋ Noohin. 38Waam, bala masma laayɗa riifee kehƴi hayan ɗah, ɓooɓa nikee ñameeɗa, aneeɗa, ɓa kilookeeɗa, ɓa kilookseeɗa po mbeha Noohin aasoh ŋ gaala. 39Ɓa inheeɗi in nga po wa masma hay, wa ɗummba ɓa jen. Kuɓkiŋ ɓoyi hay ɗah, wa mandan ɗaa. 40Ƴaar kanak hey nike ŋ yohon, yinni ɓayu, yi tas faɗu. 41Ɓitiɓ kanak hey hune oɗe, yinni ɓayu, yi tas faɗu. 42Kon, kinaat neeh, ɗu inahɗi mbehi Heɗ ɗu hayohan. 43Inhaat ne heɗ kahni inheen wahtuuni roki na hee aasohe kahan ce ɗah, a heeɗi neehe ŋ ɗooƴ weki po kahan ce kee aassa. 44Weɗ tah po, ɗu, namaat kooɗuk, laam Kuɓkiŋ ɓoyi hayan ŋ jamanooni ɗu liiɓɗi. »

45Yeesu ɓaatta nga ne : « Ya ɓa a yi ñaami woor te a ñaannja po, heɗ ce hee ɓaaɓe ɗah, a dengkoh ɗe pangkoh ciŋ kahni ɓinooɓi ne a eɗee ɓa kañam ŋ jamanooniŋ wa ? 46Ñaameem hey neɓɗe ne heɗ ce hay, raak ɗe tume ineem findi a nakohee ɗe wa ɗah. 47Ñam na woyee ɗu wa te wa keeh, heɗ ce hey ɗe tufkiɗe, a adgoh in ciŋ ɗe jen.

48Waaye ñaameem baahaaɗi po a woo ŋ ɗooƴ ce ne heɗ ce hayɗi paaɗ, 49a nik nga a laɓee ɓooɓi a na pangke na ɓa, a ñame, a anee na laaroh ci ɗah, 50heɗ ce hey haye ŋ mbehi a foogɗi, ŋ wahtuuni a inahɗi. 51A hey ɗe mbugale, a ɓay ɗe ŋ naafeehaaca, ɗiska fuɗ na ɗoɓɗoh sis raak. »

Currently Selected:

Macce 24: YM

Highlight

Copy