Tum ci 26

Pool ngelɗiɗ haf ce ŋ fiki Agiripa

1Agiripa woosa Pool ne : « Fu onuuɗ ne fu ngeliɗ haf fu. » Pool raɗissa yaah, a cammba ngel an : 2« Buur Agiripa, ŋ sumiɗ woti ŋ mini ŋ min taas ŋ fikiifu in ci Yawuut ci na yambee so jen. 3Fu kangam ŋ inhi fu inah mbaah ciŋ Yawuut ci jen na taastiɗoh ci ŋ ini kaɗ ŋ waasi. Kon mi yii kiim ɗa fu sikɗuk ko te fu sang seesuk nga.

4Yawuut ci jen inhiɗ kipes kiŋ ngo ŋ kikomaakiikaŋ ngo poyi. Ɓa inhiɗ findi ŋ mandee ŋ ɗooƴ cuuɓiŋ ngo ŋ Yerusalem. 5Ɓa inhiɗ to maañiɗ te ɓa miniɗ to seede, ne ɓa waaɗa ɗah, ŋ nikee Farisen, ŋ peseeɗa pes Farisen, te weɗ ini uup yooɓaaɗi taambiɗ ŋ waasiŋ Musaa.

6Ɗiski wa nik, mi yii atte'u, sagu ini ŋ ooluk gapohi Kooh gapee caac ciŋ ɓoo. 7Cuuɓ ciŋ ɓoo ndaŋkiyaah na kanak ci (12) ambiɗ ne wa hey raake weɗ tah ɓeɗi ñaamuk Kooh noh na wek. Ee kilifaani, oolkeem nak weɗ tah Yawuut ci yambee so. 8Wa ye tah ɗu amb ne wa minɗi kosu ne Kooh na hultiɗe kaaniɗ ci ?

9Mi ŋ haf fo sah, ŋ liiɓee ne ŋ joyee joy hiñoh tiikiŋ Yeesu yiŋ Nasareet ŋ findi naa nu wa minoh nik ɗah. 10Ineem weɗ ŋ tumee ŋ Yerusalem, ŋ taƴca ɓo'-Kooh laayiɗ ŋ kaso. Kilifaaciŋ seeƴkiɗoh ciŋ waasiŋ Musaa teyɗukɗeen ndo ne ŋ tuma, te ɓooɓeem atte'seen ne ɓa joy joy apu ɗah, ŋ meeɗ meeɗ hun nga. 11Ŋ kaɗeeɗa ŋ sinaagog nu sinaagog ne ŋ torhiɗ ɓa, ŋ faɗɗukoh ɓa kosi ɓa kos Yeesu. Ayruki ŋ ayrukee ɓa miskeen lool po wa tahha so tolfiɗeeɗa ɓa po ŋ kur-taah ciŋ kur ci cinooci sah.

Pool naandsukiɗ Agiripa findi a tuuɓoh

12Wa kaɗeeɗa ɗaa po wa raakka mbeh, ŋ kaɗeeɗa Damas. Kilifaacaŋ seeƴkiɗoh ca woosee so, ɓa onnda so ne ŋ min amb kosiɗ ca nikee ndaam. 13Kilifaani, ñam kaɗoh po ŋ leero noh, ŋ hotta ñiin puloh Eel ci, siñaarɗiŋ wa weɗ uup wiŋ nohi. Wa willa so, mi na ɓi hunee na so, wa siñaarɗeeɗa. 14Ɓoo jen, ɓoo keennda ŋ kehƴi, ŋ kerahha hooso woyiɗ to ŋ peɗmiŋ Yawuut ci ne : “ Sool, Sool, wa ye tah fu tolfiɗee so ? Fu gaañee haf fu findi mbaami na mbalnguuse ndooɗi a na aañohse ! ”

15Ŋ loffa ne : “ A fu ɓa Heɗi ? ” Heɗi woosa so ne : “ E ñam Yeesu, yi fu na tolfiɗe. 16Waaye kurka fu tufuk ! Inii weɗ tah ho teeɓuk ɗa : Ŋ kooɗiɗ ɗa ne fu nik surgaaniŋ ngo ne fu seede'ee ini fu hot nga so woti, na ci ŋ teeɓissan ɗa.

17Ŋ hey ɗa mucɗe ŋ yaah ciŋ Yawuut ci na ɓi nikɗi Yawuut, ɓi maa tuuƴohee ɗa, 18ne fu rangis has ciŋ ɓa, fu pulɗoh ɓa ŋ ñuus, fu ɓek ɓa ŋ siñaari, fu puliɗ ɓa ŋ nguuriŋ Seytaani, fu ɓay ɓa ŋ Kooh, ɓa ɗaasu bakaaɗ ciŋ ɓa, ɓa raak ɓak ŋ lamaahi te ɓa hey ɓaahe ŋ ɓooɓiŋ Kooh hoolɗuuɗ ci sagu kosi ɓa kos so. ”

19Kilifaani, a ineem tah, ŋ taambɗiɗ ini ŋ hotee pulohha Eel ci. 20Ŋ ineem, ŋ kocca woo na ɓi Damas na ɓi Yerusalem, ŋ nammba woo na ɓi Yudee jen na ɓi nikɗi Yawuut, ne ɓa ɓoƴsoh pesohaaɗ, ɓa hay ŋ Kooh te ŋ tumohaaɗ ciŋ ɓa, ɓa teeɓoh ne ɓa ɓoƴsohiɗ pesohaaɗ keeh-keeh.

21Inii de', weɗ tah Yawuut ci ammba so ŋ ɗooƴ Kahan Kooh, ɓa waaɗta so ap. 22Waaye Kooh yii niiɗ to po woti, te ŋ ris pes, ne ŋ seede ŋ fiki yakiɗ na ƴin. Te ŋ wooɗi ini ɗaloh na in ci Musaa na woosuuɗ ci jen woo ne ca hey raake. 23Weɗ ne Mucɗohi Gapohse hey yaaɓe, a yi kocan hulit ŋ kaaniɗ ci te a yegɗoh siñaariŋ muci ŋ Yawuut ci na ɓi nikɗi Yawuut. »

Ini Agiripa liiɓ ngaŋ Pool

24Pool rissa ngelɗeeɗa haf ce ɗaa, weɗ Festus leehkoh ɗe an : « Fu dof dof Pool ! Ini fu jang laay laay po fu arndiɗohiɗ ! » 25Pool loffa ɗe ne : « Muk kilifaani, ŋ arndiɗohɗi. In ci ŋ woo jen keeh te ca wiriɗ. 26Buur Agiripa sah inhiɗ in cii weɗ tah ŋ kaannja ca woo ŋ fikiice an. Wa hooliɗ to ne ali in fusɗi ɗe ŋ in cii, laam, findi ca raakoh ɗembɗi. 27Buur Agiripa, fu kosiɗ woo ciŋ woosuuɗ ci e ? Ŋ inhiɗ ne fu kosiɗ ca ! »

28Agiripa woosa Pool ne : « Tas ƴissuut rek, fu hey yo kosɗukohe, fu tum mbo Kerceen ! » 29Pool loffa ne : « Wa nik win-win wala wa yiih, ŋ wooɗi ɗa fu dong waaye mi yii kiim Kooh ne ɓi na sikɗukee so woti jen, ɗu nik ini ŋ nikoh, ɗal toku na ceen. »

30Wa Pool woo po ƴutta, buura na goornoora na Berenis na ɓooɓa hunee na ɓa jen, kurukka. 31Wa ɓa pulee, ɓa woyeeɗa ŋ harmban ɓa ne : « Ƴaarii tumɗi ini joy ɗe tah apu wala taƴu. » 32Agiripa woosa Festus ne : « Ƴaarii mineen faɗsu ne a nakoheeɗi ɓayu ŋ buuri yakki ɗah. »

Currently Selected:

Tum ci 26: YM

Highlight

Copy

Compare