Tum ci 18

Pool kaɗiɗ Korenta

1Wa inaam coot, Pool pulla Ateen, a kaɗta Korenta. 2A cohha na Yawuut nga na woyse Akilaas rimohu kur kaŋ Pontos. Raak yeem han ree, puloh Itaali na ɓitiice Pirisil. Waam raak Kolod, buura yakka ŋ Rom nakoheen ne, Yawuut ca jen pulaat Rom.

Pool kaɗta ɗiskaŋ ɓi Akilaas, 3sagu ina ɓa ɓaahee panguk, ɓa nikee haɓɗoh ɗiip baas ; a gennda na ɓa, ɓa hunnda, ɓa pangkeeɗa. 4Mbehi na iɗsiɗkohse nu ree ɗah, Pool kooɗ woo ŋ sinaagoga ne a woo na Yawuut ca na ɓi nikɗi Yawuut, ne ɓa min kos.

5Mbeh, Silaas na Timoote pulohha Maseduwaan ɓa hayya raake Pool ŋ Korenta. Ina kooɗoh waam, Pool faɗta pangka, a toppa ŋ yegɗohiŋ Woo ki kotii ; a teeɓeeɗa Yawuut ca ne a Yeesu a yi Mucɗohi Gapohse.

6Waaye Yawuut ca hiñoheeɗa ɗe, ɓa ɓaseeɗa ɗe. Wa raakka mbeh, a irippa kulɓaacaŋ ɗe, a woosa ɓa ne : « Ɗu sooƴ ɗah, e ɗu ɓeka haf ɗu ! Mi nak, ŋ hooliɗ nga. Ini kooɗoh woti mi yii kaɗ ŋ ɓi nikɗi Yawuut. »

7A pulla ndaam, a kaɗta kahan ƴaar teeku Ticiyus Yustus, ƴaareem nikee ñaamkoh Kooh te kahan ce nikee ŋ sero sinaagoga. 8Ƴaara adgohee sinaagoga teeksee Kirispus, a yi na ɓi kahan ce jen, kossa Heɗi, laayiɗ ŋ ɓi Korenta ɓi sikɗukee Pool nameeɗa kos, ɓa ɓoktasseeɗa.

9Wa raakka wek, Heɗi teeɓukka Pool findi heeƴ, a woosa ɗe ne : « Kana neƴƴoh, kana ɗek, woya, 10laam mi yii na ɗa. Ali ɓo' deganɗi ɗa yaah, ali ɓo' tumanɗi ɗa miskiɗ, laam ɓooɓiŋ ngo laayiɗ ŋ kur kii, ɓi joy kerah woo kiŋ ɗa ne ɓa kos. » 11Ŋ ineem, Pool nikka ŋ Korenta kiis na camban, a jangɗeeɗa ɓooɓa woo kiŋ Kooh.

Pool ŋ fiki Galiyoŋ, goornoora

12Ŋ jamanoonaam, Galiyoŋ tumuusa goornooraŋ Rom ngaŋ Akaay, jaarra Yawuut ca hunnda, ɓa hiñoheeɗa Pool, ɓa ɓayya ɗe ŋ atte'ohaana, 13ɓa woosa ne : « Ƴaarii na ɓeke ɓooɓi ŋ ñaamuk Kooh ñaamuk ɗalohiɗ na wi waasi nakoh. »

14Pool heeɗa woye, hennda Galiyoŋ woosa Yawuut ca ne : « Sikɗukaat to ɗu ɓi Yawuut ci, nikee ne a tum njaahum wala ro' yakak ɗah, ŋ heen ɗu ɓoofɗe ŋ sikɗuk ɗu ; 15waaye wii, wa taastiɗoh ŋ woo na tiik ŋ ini kaɗ ŋ waasiŋ ɗu. Weem wa wuu ɗu, ŋ waaɗɗi nik atte'oh ŋ ini kaɗ ŋ in ceem. » 16Ŋ ineem, a aannja ɓa ŋ atte'ohaana.

17Weɗ ɓa hunoh jen, ɓa ammba Sosten ya adgohee sinaagoga, ɓa laɓeeɗa ɗe ŋ fiki atte'ohaana, waaye Galiyoŋ faaleeɗi ɓa.

Pool dokkiɗ Añcos

18Pool tassa ŋ Korenta in samiɗ maañ, ƴutta a askohha na kosiɗ ca, a aassa ŋ batoona na kaɗe Siri, a hunnda na Pirisil na Akilaas. Waaye bala a aasan batoona ɗah, a nenukka#Kind ci 6:9-12 ŋ Señsare, laam a tumeen ina a giñee po ƴutta#18:18 Ŋ Yawuut ci, ɓo' giñeen tum in nga ɓa ɗah, a meeɗɗi nenuk feeh a tumɗi ini a giñ ɗah..

19Wa ɓa kaɗ po ɓa reesa Efes, a saɓsukohha na ɓa ndaam ; a yi ŋ haf ce, a kaɗta ŋ sinaagoga, a ɓeesɗoheeɗa na Yawuut ca, 20ɓeem kiimeeɗa ɗe ne a ɓaat nik nga ƴissuut, waaye a teyɗukɗi. 21A askohha na ɓa, a woosa ɓa ne : « Ŋ hey ɗu hayisse marke, ne wa neɓ Kooh ɗah. » A aassa bato, a kurkohha Efes, a taalndiɗta ɓaaɓaŋ ɗe.

22Wa ɓa ree Seesare, Pool ruhussa, a kaɗta Yerusalem ne a kañɗa ɓi Janguuna, ƴutta a nammba kaɗ Añcos. 23A nikka nga in samiɗ maañ, ƴutta a kaɗeeɗa kur na kur ŋ ɓakaŋ Galaat na Firisi, a ndengɗeeɗa taalubeeca jen ŋ kosi ɓa kos.

Apolos ŋ Efes na Akaay

24Raakeen Yawuut na woyse Apolos a genee Aleksandiri, a hayya Efes. A nikee ɓo' miniɗ woo, te a inheen Fiis ci baahiɗ. 25A jangɗasseen waasiŋ Heɗi te a sawareen lool. A woyeeɗa, a jangɗoheeɗa hooliɗ ŋ ini kaɗ ŋ Yeesu. Waaye a inhee ɓoktiŋ Yahya dong. 26A cammba woo na ooluk ŋ sinaagoga.

Wa Pirisil na Akilaas sikɗuk jangɗohiŋ ɗe, ɓa hotta ɗe ŋ pet, ɓa ɓaatta ɗe pooksohiɗ hooliɗ waasiŋ Kooh. 27Ƴutta, a waaɗta kaɗ Akaay, ɓaah caŋ ɓoo kosiɗ ca ñaahha ɗe nga. Ɓa fiissa kayit wuu taalubeeca nikee ŋ Akaay ne ɓa taambkoh ɗe baahiɗ.

Wa a ree, Kooh baahohha ɗe po a raakiɗta kosiɗ ca njiriñ keeh-keeh. 28Laam a ɓuree Yawuut ca ɓur keeh-keeh ŋ fiki ɓooɓa jen, te a taambohee ŋ Fiis ci, a teeɓoheeɗa ne Yeesu a yi Mucɗohi Gapohse.

Currently Selected:

Tum ci 18: YM

Highlight

Copy

Compare