Sakaria 14

Kekpo Ku Lɛlɔ Bɔdi

1Unwoti ubo nwuna limeyi. Na si limeyi lɛmɛni lídu ni, badubuti lɛla biala bátɔlɔku Yerusalem na bele-ni bete lɛlɔ. 2Nsu ɔdubo bɔya na baka Yerusalem bubekpoku na beyu bekyuli kɔduli ala na beƒie beleku batɛ-ma kudɔ ku ɔkplu, na betiku ɔma ɔmmɔ bekyuli kakɛ kenwi ƒui batɔlɔku ina ka badubɔya na badi bebu bakya kama.

3Na Unwoti ɔdubo kadi kammɔ bukpoku aani kalɛ na ukpone uukpó na kekpokɔ. 4Ɔdubusie utáwia kenyekɔ na Nnɔ Egyii Kɔbi lili na Yerusalem ɔƒɛ katukɔ kakɛ. Na kɔbi kɔmmɔ kɔdubɔbwɛ kemmo kule akpa anyɔ usie ɔvi ɔni ku ɔni, na ɔdubɔbla kɔwɛ bonwu ɔsi ɔƒɛ katukɔ úsie ɔƒɛ kanukɔ.

5Na bɛdubukeli bɛsia kɔwɛ kɔmmɔ kemmo útédu Asal. Na bɛdubɔwia kasiakɔ kesii biala aani kalɛ na ɔ́bla uwi ɔni na kalɔ kákunku na Yudaƒuɔ Ɔga Usia uwi. Na ɔmmɔ kama ni, Unwoti Katɔti ɔdubɔda ɔlɛ ku nwuna batu.

6Limeyi lɛmmɔ lɛdubɔbla nwaa na liƒlukutu lɛdi lilakya kayaa. 7Na Unwoti ɔlati ɔ́ɔlɛ-ni ugyii úse na ɔƒɛ ulása ulakya-ni uwi ɔdi.

8Na liwulu uwi ku kɔyɔ uwi ƒui ni, ntukpa bɔni mbo ntu buni bɔdubo butaagba taasi Yerusalem, na kakɛ kenwi kadubusie ketéduo Ɛpugyie kemmo na ɔƒɛ katukɔ na kakɛ kenwi ketéduo Mediterenia Ɛpu kemmo na ɔƒɛ kanukɔ.

9Na ɔmmɔ kama ni, Unwoti unwi pɛ kani ndubo bɔkya aani lɛlɔ ɔdine ɔni mɔɔdi kalɔ kammɔ ƒui lɛlɔ. Na nwuna lɛnyi lɛti na bekyuli ƒui badubɔkya lili kalɔ bete na kalɔ kammɔ lɛlɔ kesii biala.

10Na ɔ́si ɔma ɔni baalɔ Geba ɔ́yu útédu Rimon na Yerusalem kada kakɛ ni, kalɔ kammɔ ƒui kadubo bunwini kalɔ kani na katɛ kalɔ ƒiaa. Nsu Yerusalem anwu ɔmu ɔdubɔkuku utulo kesii biala. Na bekyuli badubɔƒɔ ɔma ɔmmɔ kemmo tɛtɛɛtɛ ɔ́si kesii kani baalɔ Benyamin Ɔban Kayakun útédu kesii kani na ɔban kayakun kedeedi kákya útédu Okodo Ɔban kenye. Na ɔ́sɔ ɔ́si kagyumanakɔ ɔtɔ ɔni baalɔ Hananel útédu ɔga ntɛ kebulokɔ. 11Na Yerusalem ɔdubunye kpakplaa na lɛla lɛdi lilétuku-nwu iye bebile lɛla lɛdi na mmɔ.

12Binu lɛla lɛni na Unwoti ɔdubo bekyuli bani mekpoku Yerusalem bɔbla. Ɔdubɔya na bana ɔlɔna ubu uwi ɔni na bamu benye bana lɛgba lɛlɔ, na bana anumi akpa álɛ ébo ási ana evuo kemmo, na bana linyemi lɛnɔ libun na bana inye kemmo. 13Na Unwoti ɔdubɔya na bataayia lɛlɔ ɔni na badubɔta beteekpoku lɛlɔ lɛlɔ taabla lɛlɔ kalala 14-15útédu ka Yudaƒuɔ bata na benye Yerusalemƒuɔ kama na bekpoku bekisine bammɔ. Na ɔgbankpi ɔmɛni kani ndububo bebuo bani nlie amadɔ mmɔ ƒui lɛnɔ lɛlɔ bani ndi bapɔnkɔ ku bebuo ala betine beblidi ku benengudi ku baƒlumu lɛnɔ lɛlɔ. Na kawɔlɔkɔ ni, lɛla biala na lɛ́ƒɔ kadi kani náka bámana mmɔ kuye ni, ku bana sika ugyiedi ku ɔƒualadi ku adala esu esu ammɔ ƒui ni, badubɔla-nya beboku Yerusalem.

16Ɔmmɔ kama ni, bekyuli bani nébu na kadi kani nékpoku Yerusalem mmɔ ni, badubusie Yerusalem mmɔ lɛkwa ndi lɛkwa batákya lili kalɔ Ɔga ɔni ndi Unwoti Ɔyikune Ƒui na badi Kevo Kemmo Bulie Emeyi na mmɔ. 17Na kadi kani bekyuli ndubuni ka besie Yerusalem mmɔ na batákpali Ɔga Unwoti Ɔyikune Ƒui ni, ɔnantu ɔɔɔdubo bɔna na bana ɔdi kalɔ lɛlɔ. 18-19Na ɔgbankpi bonwu ɔmɛni ɔdubɔlɛku Egyipteƒuɔ na ama lɛnɔ baaadubo ɔnantu bɔkɛ. Lɛni na Unwoti ɔdubo bekyuli bamba biala na baaadubo mmɔ busie butádi Kevo Kemmo Bulie Emeyi lɛnɔ kɔtu bɔni. 20-21Na uwi ɔmmɔ kemmo ni, bekyuli badubo etemila adi bunweni bɔsia abontolobi ani nda bapɔnkɔ bammɔ ɔkwɛ banini, “Ɔmɛni na búdie sɛsɛɛ búse búte Unwoti.” Na geen ni, libui lɛnwandi biala na Yerusalem ni, lɛdubɔbla kedee lite Unwoti Ɔyikune Ƒui aani akpala ebui ani nsia lɛkpabi lɛlɔ kalɛ. Na bakana beti lɛdi biala beƒulo ebuo biala na béti bákpa béte Unwoti. Na ɔɔɔdi banii ntu libui lɛƒunadi bamba na béye béte ukyuli ɔni mɔɔwia ɔbla akpala adi. Na uwi ɔmmɔ ni, ama bani naaaƒɔ taadi basɔ baaadubo Unwoti Katɔti kakpakɔ bɔkya.

Currently Selected:

Sakaria 14: lef

Highlight

Copy

Compare