Rut 4
4
Boas Úti Rut Ɔ́bla Ulekudi
1Amu na Boas ɔ́ta úsie ulie ɔma ɔmmɔ bekyuli kasakɔ kani nkya kabanye. Na ɔ́nu ukyuli ɔni lɛlɔ kɔtɛ na ɔ́tɛmi ku Rut ka ɔlɛka ɔdi Elimelek ala. Amu na Boas ɔ́kpali-nwu ɔnini, “Mina ɔkpana, bo na ebelie-mi kudɔ mɛni.” Amu na ɔnana ɔmɛni lɛnɔ úsie útélie-nwu kudɔ mmɔ.
2Na Boas ɔ́wia ɔma ɔmmɔ benengu leevu na bébo bébelie-nwu kudɔ mmɔ. 3Amu na ɔ́su ɔtɔ bekyuli bamɛni ɔnini, “Ɔƒaani ni, Naomi ɔ́sɔ únwini ɔ́si Moab kalɔ lɛlɔ úbo. Na ɔɔyɔ́ ka uti Elimelek ɔni nékpi na ɔdi bula ɔtɔ ubi mmɔ kalɔ uye. 4Na mɔɔyɔ́ ka bɛti ɔmɛni.”
Amu na ɔ́su ɔnana ɔni na ɔlɛka ɔdi Elimelek ala mmɔ ɔnini, “Si aayɔ́ ka eye kalɔ kammɔ ni, na eye-ka na benengu bani nlie mɛni anumi. Nsu si alayɔ ka eye-ka lɛnɔ ni, na aya na bati. Ɔsika awɔ ndi ɔnanabi udeedi ɔni ntɔ na ebo kuƒi ka eye-ka asa na nsia.” Amu na ɔnana ɔmmɔ ɔ́su-ma ka ɔdubuye kalɔ kammɔ.
5Amu na Boas ɔ́su ɔnana ɔmmɔ ɔnini, “Si éye kalɔ kammɔ ásiku Naomi kudɔ ni, na ɔlɛka eti Rut abla ƒula ulekudi. Na si awɔ ku-nwu bɛ́wɔ bebi badi ni, na ƒula akɛla ammɔ ƒui adubɔbla Rut ɔgyani udeedi adi.” 6Amu na ɔnana ɔmmɔ ɔ́su ɔnini, “Na si lɛni na ala ammɔ ese bɔdi ni, lɛɛɛdubo kalɔ kammɔ buye. Ɔsika ɔmɛni ɔdubo lɛsɛ bɔkya na mina bebi ntɛ, na lɛyila mina kadikɔ kani na ami ɔlati lɛ́bla.” Ɔmɛni ɔsu ni, ɔ́su Boas ɔnini, “Awɔ akana na eye kalɔ kammɔ. Ami lɛɛɛdubo-ka buye.”
7Na lɛla lɛni na ndubo bɔsu mɛni ndi lɛla lɛni na Israelƒuɔ baabla teeti taatina si ukyuli úye akɛla adi. Ukyuli ɔni muuti nwuna akɛla uye ni, uudie nwuna lɛgbanvuo na uti-ni ute ukyuli ɔni muuye akɛla ammɔ. Na ɔmɛni mɔɔtina ka ukyuli ɔmmɔ únu kalɔ ka úti nwuna akɛla adi uye. 8Amu ka ɔnana ɔmɛni ɔ́su Boas ɔnii ɔkana na uye kalɔ kammɔ ni, ɔnana ɔmɛni údie nwuna lɛgbanvuo na úti-ni úte Boas. 9Amu na Boas ɔ́su benengu bani ƒui nli mmɔ ɔnini, “Amii ndi mina kenye bediene. Ɔmwi limeyi lɛmɛni, líye ala ani ƒui na Elimelek ku Kilion ku Mahlon bebo lɛ́siku Naomi kudɔ. 10Ɔƒɛni Rut ɔni ndi Moabni na ɔdi Mahlon ukpinele lɛnɔ ɔdubunwini mina uleku kalɛ na Mahlon lɛnyi lilayi ɔtɔ ɔmmɔ kemmo. Na amii ndi ala amɛni ƒui kenye bediene ɔmwi limeyi lɛmɛni lɛlɔ.”
11Amu na benengu bammɔ ku bekyuli bani ƒui nli mmɔ básu banini, “Ɛɛn, bɔdi kenye bediene bute-ɔ. Na buuvele Unwoti bɔnii ulekubi ɔni ndubo ubelie-ɔ kaduli mmɔ ni, ɔbla-nwu aani Rahel ku Lea kalɛ. Rahel ku Lea bamɛni náwɔ bebi pii béte Israel. Na buuvele bɔnii kɛ akɛla pii na Eƒrata ɔtɔ ɔni kemmo na Unwoti ɔ́bla-a ukyuli ɔni náƒɔ kuye na Betlehem. 12Na buuvele Unwoti lɛnɔ bɔnii bebi bani na ɔdubo-ɔ bute ɔsiku ulekubi ɔmɛni lɛlɔ ni, ɔya na bina bebi bammɔ babla bebi bani náƒɔ kuye na babla aani bebi bani Peres ɔ́wɔ kalɛ ɔni bawɔne ndi Tama ku Yuda.”
Boas Ku Nwuna Kaba Bekyuli Lɛlɔ Kɔtɛ
13Amu na Boas úti Rut ɔ́bla nwuna ulekudi. Na Unwoti únyeku-nwu na Rut ɔ́da kaƒɔ na ɔwɔ ɔnanabi. 14Liku lɛmmɔ beleku bammɔ básu Naomi banini, “Buumwi Unwoti ɔni náya na ákɛ uwɔ ɔmwi limeyi lɛmɛni. Anwu ndubo-ɔ lɛlɔ bɔnu, ɔya na ubiwɔ ɔmmɔ ɔƒɔ lɛnyi na Israel kalɔ lɛlɔ. 15Ƒula ubile ɔmɛni ɔɔyɔ́-ɔ litemi geen na ɔdubɔya na lɛlɔ litaayɔ-ɔ, na ɔdubo-ɔ lɛlɔ butaanu uwi ɔni na énwini unengu geen. Na ubiwɔ ɔni na ákɛ mɛni ubo kɔsia utulo si ina bebi pii na ebo.” 16Amu na Naomi ɔ́gyu ubiwɔ ɔmɛni ɔ́talaku katɔ na úti-nwu ɔ́mana kayi na úse kalɔ ɔɔnu-nwu lɛlɔ.
17Amu na liku bekyuli beleku bani nli mmɔ básu banini, “Naomi ɔ́kɛ ubi ɔnanabi.” Na beleku bammɔ básia ubi ɔmmɔ lɛnyi banii Obed. Na Obed ɔmɛni náwɔ Yisai, na Yisai lɛnɔ ɔ́wɔ Dawid.
Obed Kaba Kasikɔ Bekyuli
18Ɔmɛni ndi Obed kaba kasikɔ ɔ́si Peres lɛlɔ.
Peres ɔ́wɔ Herson, 19na Herson ɔ́wɔ Ram, na Ram ɔ́wɔ Aminadab, 20na Aminadab ɔ́wɔ Nahson, na Nahson ɔ́wɔ Salmon, 21na Salmon ɔ́wɔ Boas, na Boas ɔ́wɔ Obed, 22na Obed ɔ́wɔ Yisai, na Yisai ɔ́wɔ Dawid.
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.