Budie Taatina 11

Katɔti Úte Kenye Bediene Inyɔ Ɔyikun

1Ɔmmɔ kama ni, Katɔti úti ugyii ɔdi úte-mi ɔni nse aani lɛkɔkula. Na ɔ́su-mi ɔnini, “Sie na atákɔku mina kakpakɔ ku lɛbi lɛni lɛlɔ na baakpá na katɔ mmɔ, na aka bekyuli bani ƒui nkya mmɔ beemwi-mi. 2Nsu takɔku keyi, ɔsika béti mmɔ béte bekyuli bani naaadi Yudaƒuɔ. Badubo mmɔ ku ɔma ɔmmɔ ƒui lɛgba butu bɔvi abuli aavlene-anyɔ. 3Ndubute mina kenye bediene inyɔ ɔyikun na bedie-mi kenye na emeyi apim unwi ku emeyi eti alɔ ku leevu kemmo. Badubunyimi adala ani mɔɔtina ka beewulo kɔnyana na bekyuli alaekpidi ɔsu.”

4Ɔkya Bunweni Kedee Ɔku kemmo ka nnɔ egyii anyɔ ku sika ugyiedi ligyii inyɔ lɛni lɛlɔ na asogya ɔsia ni, linye Kayawi Ƒui Unwoti anumi na katɔ. Na akpa anyɔ amɛni enye ete Katɔti kenye bediene inyɔ bamɛni. 5Si ukyuli ɔdi ɔ́kya ɔkplu ɔnii ɔɔbla-ma kalala ni, ogya ɔdubo bɔlɛ bɔsi bana kenye kemmo na ɔkyula bekisine bammɔ. Na ukyuli biala ɔni mɔɔwia ɔnii ɔɔbla-ma kalala ni, ulu ɔmmɔ lɛlɔ kani na ɔdubɔsia ukpi. 6Bebo ɔyikun ka betile ɔnantu na ɔsɔ ulana na uwi ɔni kemmo na beedie Katɔti kenye mmɔ. Na bebo ɔyikun lɛnɔ na ntukpa ƒui lɛlɔ kalɛ na baya na bunwini ubugya. Na bebo ɔyikun lɛnɔ na baya na lɛlɛ lidu lidu libo kayawi ƒui lɛlɔ uwi biala na baayɔ́.

7Ɔƒɛni si bédie Katɔti kenye báwɔlɔ ni, eƒiebuo ɔni nási ɔɔlɛ́ kasuudikɔ ubu bonwu ɔmmɔ kemmo ɔdubukpoku-ma na ɔdi-ma lɛlɔ na ɔdu-ma lɛnɔ. 8Bana ɔlɔna ɔdubɔtɛ lɛblɔnu lɛlɔ na ɔma unengudi ɔni baalɔ na lɛsugba kemmo banii Egyipte iye Sodom. Mmɔ na bákana Blɔti bámana ugyii lɛlɔ. 9Ama bani nási bekyuli ku kadi ku adi lidu ƒui akɔ ku kalɔ ƒui lɛlɔ ni, badubo bekyuli bamɛni ɔlɔna bɔnu emeyi atɛ ku kakɛ sɔɔn. Nsu badubuni na baláva-ma. 10Na bekyuli bani nlie kalɔ lɛlɔ badubo kubiti bɔkɛ na nkyuli inyɔ bammɔ kukpi ɔsu. Badubo limeyi bɔdi na bete lɛlɔ ala, ɔsika kenye bediene inyɔ bammɔ béti lɛbibo pii béboku kayawi bekyuli lɛlɔ.

11Na emeyi atɛ ku kakɛ kama ni, ɔƒɛƒɛɛ ɔni muute ngba ɔ́si Katɔti kudɔ úbo na úduo-ma lɛlɔ kemmo na báta bénye. Na bani ƒui nánu-ma ni, liƒu lɛ́da-ma. 12Mmɔ na kenye bediene inyɔ bammɔ bénu lɛdi bonwu lɛdi ka lɛ́si katɔ na lɛ́su-ma lɛnini, “Bibo katɔ mɛni!” Ka bana bekisine baanu ni, bákɔ bésie katɔ na kemmo.

13Kɔnakunwi ni, kalɔ bɔkunku kpakplaa bɔdi bɔ́lɛ na ɔma ɔmmɔ lɛkpa leevudi lɛ́bwɛ, na bekyuli mpim maatɛ békpi. Liƒu pim líƒie bekyuli bakladi, na bákɔliku Ati ɔni nkya katɔ lɛnyi katɔ!

14Bɔbuɛ lɛla linyɔdi lɛ́vi, na lɛtɛdi lɛdubo lɛmmɔ kama bɔsia uwi klukui.

Bávwi Kakpɛɛ Maatɛdi

15Ɔmmɔ kama ni, Katɔti ɔtu maatɛdi ɔ́vwi nwuna kakpɛɛ. Na línu ka bekyuli pii báva na katɔ mmɔ básu banini,

“Kayawi lɛga kadikɔ ƒui

kénwini bula Unwoti Katɔti

ku nwuna Ukyuli Ɔƒunadi kadi!

Na ɔdubo lɛlɔ bɔdi ɔ́si ɔƒɛni úsela ƒui!”

16Amu na benengu aavlanyɔ-ine bani nlie Katɔti anumi na bana agaboku lɛlɔ báyu bébi kalɔ na bémwi Katɔti. 17Na baasu banini,

“Blɔti ɔni mbo ɔyikun ƒui,

ɔni nli na úlie,

bɔɔgyá-a enu,

ɔsika áƒɔ ƒula ɔyikun ubendi

na ése kalɔ aadi lɛlɔ!

18Bekyuli bani ƒui nátaƒɔ-ɔ

bátadi ni, béti kɔnyi.

Anwuɔsu ƒula kɔtu bɔni

kúbo-ma lɛlɔ.

Ɔsika uwi údu ka atɛku

bekyuli bekpine litemi.

Ɔdi uwi ɔni na adubɔƒɔ

kayu kabuni ete ƒula kabla bablane

ku kenye bediene ku ƒula bekyuli ƒui.

Na benengu ku banamu bani ƒui

mɔɔbu-ɔ ni,

adubɔƒɔ-ma kayu kabuni.

Na adubɔkyula bekyuli bekpidi

bani nádu ƒula bekyuli na kalɔ lɛlɔ!”

19Amu na bálɛmi Katɔti kakpakɔ kedee, na bánu Bunyimi Adaka kedee ka use mmɔ. Na kayaa kábwɛ ogya ku kɔku bonwu. Na katɔ keedu taasia kama. Kalɔ kákunku, na etubankɛ áyu pii!

Currently Selected:

Budie Taatina 11: lef

Highlight

Copy

Compare