Budie Taatina 10

Katɔti Ɔtu Ɔda Kakunkɛ Blii Suɛ Kadi

1Amu na lɛ́nu Katɔti ɔtu ɔyikune ɔbambadi ka ɔ́si katɔ ɔɔyu. Na ɔ́ka ɔ́mana-nwu aani kɔdi, na bukeye bɔ́ka bɔ́mana-nwu lili. Nwuna anumi eekeye aani ɔƒɛ kalɛ, na nwuna lɛgba lise aani akpa ani nnye kalɔ na aada aani ogya. 2Kakunkɛ blii suɛ kadi kébimi kakya-nwu kɔnu. Na úti nwuna kɔdianu ɔgba únyene ɛpu lɛlɔ, na úti kɔmiinu ɔgba únyene kalɔ lɛlɔ. 3Amu na údie lɛdi momoomo aani gyata kalɛ. Na ka ɔ́va ni, kayaa kábwɛ ogya ku kɔku bonwu maatɛ! 4Ka línu kɔku bonwu kɔmɛni ni, líse kalɔ nnii muunweni lɛla lɛni na línu. Nsu lɛdi lɛdi lɛ́si katɔ na lɛ́su-mi lɛnini, “Ɔlɛka abɛla lɛla lɛni na énu na kɔku bonwu kɔmmɔ kemmo ese, na tenweni-nya.”

5Amu na lɛ́nu ka ɔtu ɔni nnye kalɔ ku ɛpu lɛlɔ mmɔ ɔ́talaku kɔdianu kɔnu katɔ. 6Na ɔ́kpali ala ɔ́lɔ Katɔti lɛnyi. Ɔ́lɔ Anwu ɔni nli ngba ɔ́si ɔƒɛni úsela ƒui ɔni nédie katɔ ku kalɔ ku ɛpu ku ala ani nkya-nya kemmo ƒui. Na ɔ́su ɔnini, “Katɔti ɔsɔ ulebile uwi! 7Kabla kabɛdi kani na ɔ́su nwuna kenye bediene bani ndi nwuna kabla bablane ka kadubɔlɛ ni, kadubo kete lɛni si Katɔti ɔtu maatɛdi ɔmmɔ ɔ́vwi nwuna kakpɛɛ.”

8Ɔmmɔ kama ni, lɛdi lɛni nátɛmiku-mi lɛ́si-ku katɔ mmɔ lɛ́sɔ lɛ́su-mi lɛnini, “Sie na atáƒɔ kakunkɛ kani nkya Katɔti ɔtu ɔni nnye ɛpu ku kalɔ lɛlɔ mmɔ kɔnu kemmo.”

9Amu na lísie ɔtu ɔmmɔ kudɔ na lɛ́su-nwu nnii uti kakunkɛ kammɔ ute-mi. Amu na ɔ́su-mi ɔnini, “Ƒɔ, na eti-ka akun! Mɔɔsu-ɔ ka ɔdubo ɔdu bɔyu na ƒula kaƒɔ kemmo, nsu ɔdubɔyu-ɔ emini aani uwɔ na ƒula kenye kemmo.”

10Amu na lɛ́ƒɔ kakunkɛ kammɔ, na lɛ́kun. Na ɔ́yu-mi emini na kenye kemmo. Nsu ka líbweli-ka lɛ́wɔlɔ ni, ɔ́yu ɔdu na mina kaƒɔ kemmo. 11Nwuna kama ni, ɔtu ɔmmɔ ɔ́su-mi ɔnini, “Ɔlɛka asɔ esie anumi eteedie Katɔti litemi lɛni ndanku bekyuli lidu lidu na kalɔ pii lɛlɔ ku adi lidu lidu batɛmine ku baga pii lɛlɔ ete bekyuli.”

Currently Selected:

Budie Taatina 10: lef

Highlight

Copy

Compare