Kɔgya 147
147
1Bɛya na bumwi Unwoti!
Ɔsika ɔdia ka bumwi bula Katɔti.
Ɔdi lɛla lɛbuni, na ɔ́manku lɛnɔ.
2Unwoti Katɔti ɔ́sɔku Yerusalem ɔ́tu,
na ɔ́sala bani na béƒie bátɔlɔku ƒui
ɔ́sɔku-ma úboku ɔma.
3Bani na bana enu áƒɛ ni,
ɔ́ya na bákɛ lɛnunsia lɛwɔdi.
Na ɔ́mana-ma alɛbi ƒui na ása.
4Ɔgyi ayabi ani ƒui na udie kalɛ na emomo.
Na ubo ɔ́di biala ku nwuna lɛnyi.
5Bula Unwoti Katɔti úbomo na ubo ɔyikun geen.
Nwuna lɛnunda lɛni na ɔda ɔɔnu ala kemmo
kágyu geen, na uuubo kawɔlɔkɔ.
6Unwoti Katɔti ɔɔkɔliku bekyuli
bani muubo-ku lɛlɔ kalɔ katɔ.
Na bekyuli bani mɔɔkɔliku lɛlɔ katɔ ni,
uuboku-ma kalɔ.
7Bidie enugya lɛnu bimwi Unwoti.
Na bɛgya lɛbentaa bidie bumwi lɛnu bite bula Katɔti.
8Anwu náya na ulɔyɔ ɔ́ƒɔ kayaa ƒui.
Na ɔɔyá na ɔnantu ɔɔna teewi kalɔ,
na livo lɛɛkwɛ́ abi lɛlɔ.
9Uute beƒiebuo adila na baadi,
na ɔɔnyuɛ baasɛ bebi bani muuwulo kɔka lɛnɔ.
10Bekyuli bani néti bana anu básia bapɔnkɔ ɔyikun
iye bekpone bani nkɛ lɛgba lɛlɔ ka wedie-ma,
balayɔ Unwoti Katɔti kaƒɔ.
11Na bani mɔɔyia Katɔti
na benye baanu ulu teete nwuna bɔyɔ bɔni naaasa kudii ni,
bana lɛlɔ mɔɔda Katɔti kubiti.
12Amii Yerusalem kadi bekyuli ƒui, bimwi Unwoti Katɔti
na bɛkɔliku-nwu lɛnyi katɔ,
13ɔsika abuala na úti ɔ́kalɛ bina ɔba kenye kpakplaa.
Na úte ƒula ɔma kemmo bebi kusɛ kusɛ.
14Ɔ́ya bɛ́kɛ atu bɔyɔ ɔ́ka ɔ́mana ƒula ntɛ mmɔ.
Na anta ku kamu káƒɔ ɔma ɔmmɔ kemmo.
15Na lɛla biala na Unwoti ɔ́su ni,
liigyingya teesie kesi kesii kɔnakunwi.
16Ɔɔyá na etubankɛ aayu taaƒɔ kalɔ ƒui
na eekeye ƒututuu aani bebuo linwini.
Na nwuna kɔkɛ wɛlɛ wɛlɛ kɔɔƒɔ́ kalɔ ƒui aani ntɔ kalɛ.
17Na ɔdi ɔɔyu aani abanta bonwu bonwu.
Na ɔdi biala ulakana kɔyɔ kɔmmɔ kenye bunye.
18Ɔɔyɛɛlɛ abanta amɛni ƒui si údie lɛdi,
na eenwíni ketu taagba
si ɔƒɛƒɛɛ úkpo ɔ́vi-nya lɛlɔ.
19Unwoti úti nwuna ɔda bubo
ku ala bɔtina ƒui úte Yakob kaba kemmo bebi
bani ndi Israelƒuɔ.
20Útabla ɔmɛni útete kadi bamba bekyuli badi kudii.
Na baaagyi kalɛ na ɔɔtɛ litemi lɛnɔ.
Bɛya na bumwi Unwoti.
Currently Selected:
Kɔgya 147: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
