Kɔgya 141
141
1Unwoti Katɔti, awɔ na muuwulo taakpali.
Se atu na enu-mi bɔkpali na ebo pla.
2Ya na mina katɔ bɔkpali bunwini
aani oloƒui ƒɛƒɛɛ ɔni baakyula na ƒula anumi.
Na si lɛ́kɔliku mina enu katɔ ni,
na ɔbla aani useyi uwi akpala ani na baabla teete-ɔ.
3O Unwoti, ya na lɛti mina kenye bɔda
na lɛkɔsi bɔtɛmi!
4Taya na mina kayi kasia likpidi lɛdi bɔbla lɛlɔ.
Na taya na liti lɛlɔ lɛkya bekyuli bekpidi ablala kemmo.
Na taya na bana adila adi ada-mi ɔkwɛ.
5Taya na lini ka ukyuli ɔni nse siin ɔni-mi kɔtu iye ɔdɔnku-mi.
Ɔsika ɔmmɔ ɔdubunwini lɛƒɔndia mmomu ute-mi.
Taya na lɛƒɔ bumwi bɔdi lɛsiku bekyuli bekpidi kudɔ
aani kalɛ na beewi ukyuli lili nnɔmii,
ɔsika mɔɔkpali katɔ uwi biala nnii
utatɛ utete bekyuli bani mbo likyulikpi.
6Si uwi ɔni na béƒwimi bana lɛlɔ badine
básiku atakpɛ eli bátáva kalɔ ni,
uwi ɔmmɔ na bekyuli bammɔ badubɔnu bɔti
ka mina etemila adi sɔsɔ.
7Na badubo bana ekubi bugyingya buwi kɔƒiɔtɔ atu
aani atakpɛ kɔkɛ, kalɛ kalɛ.
8Nsu mina anu asia awɔ mina Unwoti Katɔti lɛlɔ kani.
Gyumana-mi na lɛkɛ kabɛkɔ na ƒula kudɔ
kalɛ na neeeduo ɔgbankpi ɔdi kemmo.
9Kɔkpagyuɛ kɔni na mina bekisine bákywɛ-mi ƒui ni,
da-mi die-ku kemmo.
10Na aya na balalane banu beduo ama alati
bana kɔkpagyuɛ kɔmmɔ kemmo
uwi ɔni na áya-mi na lɛ́lɛ sɛɛn na bana enu kemmo.
Currently Selected:
Kɔgya 141: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
