Agba 18
18
1Ukyuli ɔni muudie lɛlɔ
lɛti ni,
nwuna lɛla biala lɛ́ƒɔ-nwu anu.
Na ngba ulu buni bamba biala kasusu na baakya-nwu ni,
ulátunaku-mu munu munu!
2Ala kalɔ bunu ogya ɔdi ulákya badɔlɔdi kudi kudii!
Ama bana kasusu kani na beebó kudu.
3Kesii kani na bekyuli bekpidi báda bálɛ ni,
ukyuli tabu ku kɔƒa ala ku anumi kalɔ buwi ala kani
mɔɔsia-ma kama.
4Ukyuli etemila akana na enwini ntu bɔnidi
bɔni nete ukyuli ngba.
Na lɛnunda etemila aayu kayi buɛɛ
aani libiɔ ntu bamamba bɔni mɔɔyu.
5Ɔɔɔdia ka litemi ɔtɛne unye ukyuli
ɔni na nwuna litemi liiibo ubo kama
iye ɔdu ukyuli ɔbuni kɔtɔ.
6Badɔlɔdi beeebo kadɔ bɔdɔ,
na bana kama ku ugyii.
7Badɔlɔdi kenye muubó-ma kalɔ,
na bana enyekpi mɔɔkya-ma lɛbibo kemmo.
8Ɔkɔ etemila ani nse aani lɛna wɛlɛ wɛlɛ ebo emini
na anya mɔɔyu teduo ukyuli kayi kemmo.
9Ɔkɔsɔne ɔdi ukyuli ukpidi
aani ukyuli ɔni muubile bekyuli ala.
10Unwoti lɛnyi lɛdi lɛtakpɛ bonwu
lɛni na ukyuli ukpo kama.
Na nwuna kudɔ na bekyuli babuni beekeli
teesie na baakɛ́ bɔƒɔ.
11Balakɛne baanu bana lɛlakɛ aani kɔbi bonwu
kɔni na ukyuli ɔdi ulakana bɔƒuaala.
Baanu-ni aani kowodu kangyaa kɔni na kɔ́da ama
ku bekyuli ntɛ na balakana-ma.
12Lɛlɔ bɔtina ku ukyuli tabu mɔɔgyú taatɔ
asa na ukyuli ɔɔyii udu.
Na lɛlɔ kalɔ buboku mɔɔtɔ asa na ɔbu ɔɔsia.
13Baláka ukyuli bɔlɛ asa na enu lɛla lɛni nébo,
amu kɔƒa kɔdubo-ɔ bukpo na abla lɛlɔ ɔdɔlɔdi.
14Ukyuli kɔyu kɔɔkya ɔlɔna ɔni muuƒi kemmo.
Nsu ni, ɔma na si nwuna kɔyu kɔ́yii udu
na nwuna ɔlɔna ɔdubɔkana bunye?
15Banundane baawia kpakplaa ka baƒɔ bekyuli bamba kasusu.
Na sɔsɔ na ɔdi ka baawia ka bekyuli bete-ma kasusu.
16Ukyuli ala bute bɔdanku ala enengudi.
Ɔkana na uti-ɔ usienku benengu bani mbo kenyekɔ geen anumi.
17Kenye biala na ukyuli ɔsu ni,
bekyuli beenú-ka aani litemi geen,
wetédu uwi ɔni na lɛla lɛni geen nálɛ ni,
básɔku-ni básu kaduɛ.
18Baakana na baatu egulabi taanu
na bayikune inyɔ bani mɔɔkya unyeƒi ɔdi lɛlɔ
na unyeƒi ɔsa.
19Si bɔƒiɔ búduo awɔ ku ƒula ɔkpana ntɛ ni,
ubo ɔkplu ka abla lɛla lɛdi ete-nwu na bɛsɔ bɛbla unwi
utulo kalɛ na ekpo adi ɔma unengudi
ɔni na bátu bámana lɛlɔ.
Unyeƒi kpakplaa uule bakpana inyɔ ntɛ
aani kalɛ na baakalɛ ɔban kenye na babala.
20Etemila aayá na kɔyu kuumó
aani kalɛ na adila aayá na kaƒɔ keemó.
Lɛni na etemila ani mɔɔlɛ́ ukyuli kenye
na uwi ɔni na ɔ́manku lɛlɔ eemó ukyuli.
21Bekyuli bani na atɛ aayu emini
ku lɛla lɛni mɔɔsiáku akpanabi,
ɔsika unyemi ɔɔkana na ɔdu ukyuli
iye ubunku ukyuli ulu ɔbuni lɛlɔ.
22Ukyuli ɔni nákɛ uleku ɔ́kɛ lɛlakɛ,
na lɛƒɔndia lɛmmɔ lɛ́si Unwoti kudɔ.
23Ɔwabane muuvele ka banu-nwu kɔnyana,
na ɔlakɛne uudie kenye ku edumi.
24Bakpana badi bakya bani ɔbladu mɔɔyila lɛlɔ udu.
Nsu badi beebó taada lɛlɔ geen utulo banwa muedi.
Currently Selected:
Agba 18: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
