Agba 17
17
1Si ákɛ lɛla lɛni uwi utu-ni lɛlɔ ádi ku kayi ƒaa ni,
ɔdia utulo si ésie kadikɔ bonwu ku ala lidu lidu
na kadɔ kakya mmɔ.
2Kabla ɔblane ɔni na ɔ́da anu ni,
ɔɔdi ɔtɔlati bebi bani mɔɔbla kɔƒa ala lɛlɔ,
na anwu ku bebi bammɔ muule bana ɔti ala.
3Ogya kemmo baakya sika ugyiedi ku ɔƒualadi taanu-nwu bɔdia.
Nsu Unwoti ni, ukyuli kayi na ɔɔkɔ́ku taanu-nwu bɔdia.
4Alaekpidi bablane ni, likyulikpi atɛ na beesé atu teenu.
Na ɔkɔ banyine ni, beesé atu teenu atɛ ani muubile ala.
5Bekyuli bani muudumi bawabane taama ni,
bana Unwoti ɔni nédie-ma na beedumi.
Na bani mɔɔmá bekyuli na bana ɔgbankpi kemmo ni,
Unwoti ɔdubo-ma kɔtu bɔni.
6Bawɔ bani na ukyuli ɔ́bi lɛlɔ ɔ́ƒɔ ni,
ama ndi-nwu kagabwa kani muukeye.
Na bebi bani mbo bawɔne babune ni,
kɔƒa kulekpo-ma na bekyuli akɔ.
7Kɔtɛ bɔtɛmi pii ni, útamanku ɔdɔlɔdi.
Na ukyuli ɔni mɔɔdi bekyuli lɛlɔ lɛnɔ ni,
ɔkɔ bɔnyi bútamanku-nwu.
8Ala ani beete ukyuli na bɔbɛ kemmo ni,
etulo kuvo ete bani mɔɔbla udu ɔmmɔ.
Baasia ɔmmɔ lɛlɔ na ala aatɛ teete-ma.
9Si alásia ukyuli bamba alaekpidi anu ni, bɔyɔ buláyii udu.
Na si aaká ukyuli bamba ekpidi taasu bekyuli ni, eegyingya bakpana babuni muedi ntɛ.
10Si ádɔnku ukyuli ɔni muunú ala kalɔ kunwi pɛ ni,
uubunku-nwu teetulo si ébo ɔdɔlɔdi kugyiimi eti anyɔ.
11Bekyuli bekpidi baawia bata benye lɛlɔ badine lɛlɔ,
nsu badubo-ma kɔtu bɔni geen.
12Si awɔ ku ebuo ukpidi ɔni na lɛla lɛdi líƒie-nwu bebi bɛ́sa ni,
ebo bɔƒɔ utulo ka enwini ɔdɔlɔdi kasusu na nwuna kɔdɔlɔ ulu lɛlɔ.
13Si éti likpidi áƒɔ lɛbuni lɛni na ukyuli ɔdi ɔ́bla-a kayu ni,
ɔgbankpi ulása-a kaduli kudii.
14Si ése kadɔ kalɔ ni, use aani kalɛ na baalɛmi kuƒi teete ketu
kani báda-ka kavinkɔ ulu na kéyi.
15Unwoti ulayɔ bekyuli bani mɔɔyá na
baanyonu bekyuli bani litemi neeebo ubo
na baadú bekyuli babuni kɔtɔ.
16Si ɔdɔlɔdi ulásia lɛnunda ulu ni,
ɔɔɔdi kasusu buni ka ebile egulabi anii ɔtɛya lɛla lɛdi.
17Ɔkpana buni ɔɔdi nwuna litemi lɛlɔ uwi ndi uwi.
Na ukyuli ɔnwani ni, bɔwɔ na báwɔ-nwu ka
ute kebunku uwi ɔni na ɔnwani ɔɔwia lɛla lɛdi.
18Si átákya kɔnu ɔku kemmo éte ƒula ɔkpana anii
eenye-nwu kayu kenye ni,
kasusu kammɔ kétedu-ɔ.
19Ukyuli biala mɔɔyɔ́ kadɔ ni, ɔɔyɔ́ likpidi.
Na ukyuli biala mɔɔtɛmi taakun lɛmɛnɛ ni,
ɔgbankpi na ɔɔwia.
20Kayi kani naaasia ulu unwi lɛlɔ ni, ala alátɛku-nwu.
Na unyemi ɔni mɔɔtu ala teenwini ni,
ukyuli ɔmmɔ ɔɔbla gyoli gyoli teetéduo lɛbibo kemmo.
21Si áwɔ ɔdɔlɔdi ni, ɔdi lɛla lɛni muukpóku ukyuli.
Na lɛlɔ lilayɔ ubi ɔti ɔni ubi mɔɔta teenye bekyuli lɛlɔ.
22Ebiti bɔkɛ na kayi kemmo ɔdi kuvo ute ukyuli ɔmmɔ.
Nsu kɔyu kɔni nsɔ neeebo lɛnunsia
ɔɔyá na ɔyikun ɔɔsá ukyuli ɔmmɔ.
23Bekyuli bekpidi baabɛ́ taaƒɔ ala bekyuli kudɔ
kalɛ na batu litemi benwini.
24Bekyuli bani mɔɔbla kasusu buni ni,
bana anu aasia lɛnunda lɛlɔ uwi ndi uwi.
Nsu badɔlɔdi ni, bana kasusu kelélie liku linwi,
mmomu kakɛ ala ƒui lɛlɔ ɔɔwia lɛla lɛni na ɔɔɔdubo bɔkɛ.
25Ubi ɔdɔlɔdi ni, ɔɔyá na ɔti uunú ɔlɛ na kayi kemmo.
Na ngba bɔɔyu uni ɔdu.
26Ɔɔɔdia munu munu ka ebo ukyuli ɔbuni kayu
ka ɔsiaku lɛbuni ɔsu,
iye ani ɔyikune kɔtu ka ɔ́di nwuna litemi lɛlɔ geen ɔsu!
27Ukyuli ɔni náda anu geen ni, ɔɔkɔ́si bɔtɛmi.
Na ukyuli ɔni mbo lɛlati na uunú ala kalɔ ni,
nwuna kɔnyi kuse buɛɛ.
28Badɔlɔdi muedi baatina-ma kalɛ na bada anu si bába lɛsɛ.
Na si báda bana inye ni, baatina aani si bebo kasusu.
Currently Selected:
Agba 17: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
