Bumomo Bɔka 27
27
Seloƒehad Bebi Belekubi Kadikɔ Lɛlɔ Kɔtɛ
1Uwi ɔmmɔ ni, Seloƒehad ɔ́wɔ bebi belekubi. Na Seloƒehad ɔmɛni ɔ́si Yoseƒ ubidi Manase kaba kemmo na Manase náwɔ Makir na Makir ɔ́wɔ Gilead na Gilead ɔ́wɔ Heƒer na Heƒer ɔ́wɔ Seloƒehad. Na Seloƒehad bebi belekubi bamɛni anyi ndi Mahla ku Noa ku Hogla ku Milka ku Tirsa. Na limeyi lɛdi ni, belekubi bamɛni 2bákpɛ béde Unwoti Adi Kevo anumi na béténye Mose ku ɔkpane Eleasar ku Israelƒuɔ batɔnkune ku Israelƒuɔ ƒui anumi na básu-ma banini, 3“Bula ɔti úkpi na ketele kalɔ kakwiidi kemmo ɔni na útawɔ ubi ɔnanabi ɔdi. Na lɛnɔ uuubunku Kora kama basiakune bani náta bénye Unwoti lɛlɔ. Na anwu ɔlati likpidi kukpi na úkpi. 4Na buuye-mii bɔnii ɔlɛka nwuna lɛnyi lɛyii lɛkya Israelƒuɔ akɔ? Ɔmɛni ɔsu bite-bu bula bati kadikɔ kadi.”
5Anwuɔsu Mose úti bana litemi lɛmɛni útáva Unwoti anumi. 6Na Unwoti ɔ́su Mose ɔnini, 7“Lɛla lɛni na Seloƒehad bebi belekubi baasu mɛni lɛdi sɔsɔ. Anwuɔsu ɔlɛka ete-ma bana bati kadikɔ kadi na kabla bana ɔdi. Anwuɔsu sɔku bana ɔti kadikɔ te-ma.”
8Na úsie anumi ɔ́su Mose ɔnini, “Su Israelƒuɔ ka si ɔnana ɔdi úkpi na utawɔ ubi ɔnanabi ɔdi ni, ya na ukpine ɔmmɔ bebi belekubi badi bana ɔti ala. 9Na si ukpine ɔmmɔ útawɔ bebi belekubi badi ya na nwuna banwani badi nwuna ala. 10Na si ukpine ɔmmɔ uuubo banwani bananabi badi ya na nwuna ɔti banwani bananabi badi nwuna ala. 11Na si uuubo ɔti banwani badi ya na nwuna ukyuli ɔni na ude-nwu na nwuna ɔtɔ kemmo ɔdi nwuna ala. Na ɔda bubo bɔmɛni bɔdi Israelƒuɔ ɔda ɔni ɔlɛka badi-nwu lɛlɔ geen. Na lɛni na Unwoti úbo Mose ɔda.”
Yosua Úti Mose Keliekɔ
12Amu na Unwoti ɔ́su Mose ɔnini, “Kɔ sie Abarim Kɔbi kɔmɛni lili na atánu kalɔ kani líti muute Israelƒuɔ mmɔ. 13Na si ánya ánu-ka áwɔlɔ ni, awɔ lɛnɔ adubusie atátɛ ƒula bati kudɔ kalɛ kani na ƒula ɔnwani Aaron lɛnɔ úsie ɔtɛ nwuna bati kudɔ, 14ɔsika awɔ ku Aaron ƒui bɛ́ta bínye mina ɔda ɔni líbo-mii lɛlɔ na Sin ketele kalɔ kakwiidi kemmo uwi ɔni na Israelƒuɔ ƒui báta bénye-mi lɛlɔ na bítabu-mi na bana anumi ka nse kedee.” Ala amɛni álɛ na Meriba Ketudɔ na Kades na Sin Ketele kemmo.
15Amu na Mose ɔ́pkali Katɔti ɔ́su-nwu ɔnini, 16“Unwoti Katɔti, awɔ ndi bayawine ƒui ayu ngba kasikɔ, muuvele-ɔ nnii die ɔtɔnkune te ƒula kadi bekyuli bamɛni 17ɔni ndubo butaakpanku-ma teesienku taasɔku teeboku kalɛ na belénwini aani baƒonu bani neeebo ɔdane.”
18Ɔmɛni ɔsu Unwoti ɔ́su Mose ɔnini, “Ti Nun ubidi Yosua, ukyuli ɔni na mina kɔyu kɔ́ƒɔ-nwu lɛlɔ kemmo, na eti ƒula kɔnu asia-nwu lɛlɔ. 19Na aya na unye ɔkpane Eleasar ku Israelƒuɔ ƒui anumi asa na ese-nwu ƒula kenye unyene. 20Na ete-nwu ƒula ɔyikun ɔmmɔ ɔdi kalɛ na Israelƒuɔ ƒui babu-nwu. 21Na uténye ɔkpane Eleasar anumi na uye Unwoti kasusu ute-nwu na ulu sɛsɛɛ lɛlɔ. Na si Yosua údie lɛdi asa na anwu ku Israelƒuɔ ƒui badubɔlɛ busie kesii kadi na si ɔ́sɔ údie lɛdi na basɔ benwini bebo.”
22Na Mose ɔ́bla ɔ́sia aani kalɛ na Unwoti úbo-nwu ɔda. Na úti Yosua na ɔ́ya na úténye ɔkpane Eleasar ku Israelƒuɔ ƒui bammɔ anumi. 23Na bana anumi mmɔ na úti kɔnu ɔ́sia-nwu lɛlɔ na úse-nwu nwuna kenye unyene aani kalɛ na Unwoti úbo-nwu ɔda.
Currently Selected:
Bumomo Bɔka 27: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
