Bumomo Bɔka 25
25
Israelƒuɔ Lɛsɔnɔdi Ku Bana Lɛƒiɔkpa
1Uwi ɔni na Israelƒuɔ bákya Sitim ni, na ama ku Moab belekubi bése kalɔ baatɛ. 2Na ɔkɛnku ɔmmɔ ɔsu beleku bamɛni baakpanku banana bammɔ teesienku bana lɛƒiɔkpa emeyi bɔdi kalɔ. Na Israelƒuɔ baadi adila ani béti bákpa béte baƒiɔ na baalɛ-ma akɔnkɔ kalɔ. 3Anwuɔsu Israelƒuɔ béti lɛlɔ bébunku Moabƒuɔ na baakpá baƒiɔ bani baalɔ banii Baal-Peor. Ɔmmɔ ɔ́ya na Unwoti úti kɔnyi kati kati ɔ́kya-ma.
4Amu na Unwoti ɔ́su Mose ɔnini, “Kpanku Israelƒuɔ batɔnkune bammɔ ƒui lɛku na adu-ma ɔƒiiwi ketee na bekyuli bammɔ anumi na ukyuli biala ɔnu kalɛ na Unwoti kɔnyi kati kati kɔni na úti mmɔ kenye kayɔ na Israelƒuɔ lɛlɔ.”
5Anwuɔsu Mose ɔ́su Israelƒuɔ litemi batɛne ɔnini, “Bina akɔ ukyuli biala ɔdu nwuna lɛlɔ bekyuli bani ndi banana bani néti lɛlɔ bákya Baal-Peor lɛƒiɔkpa kemmo.”
6Amu na Israelni ɔnana ɔdi ɔ́kpanku Midiani ulekubi ɔdi úboku nwuna kaduli na Mose ku Israelƒuɔ ƒui anumi uwi ɔni na básala lisu na Unwoti Adi Kevo anumi beewulo. 7Na ka Pinehas ɔni ɔti ndi Eleasar ɔni ɔti ndi Aaron ɔ́nu lɛla lɛni na ɔnana ɔmmɔ ɔ́bla ni, ɔ́ta mmɔ na útéti lɛtula 8na utéduo Israelni ɔmmɔ kevo kemmo na ɔ́tu Israelni ɔmmɔ na ɔ́ƒuala-nwu útalɛku uleku ɔmmɔ lɛnɔ. Na mmɔ kani na Israelƒuɔ ɔlɛ ɔmmɔ kenye kékulo. 9Nsu bani békpi na ɔlɛ ɔmmɔ kemmo bábla aani nkyuli mpim aavlanyɔ-ine (24,000).
10Amu na Unwoti ɔ́su Mose ɔnini, 11“Ɔsi lɛla lɛni na Pinehas ɔ́bla mɛni ɔsu mina kɔnyi kenye káyɔ na Israelƒuɔ bamɛni lɛlɔ. Ɔsika údie ɔ́tina ka utalɛka ukyuli ɔdi ɔkpa bamba utulo ami Unwoti. Na ɔmɛni ɔsu lɛ́sɔ ńteti kɔnyi na lɛyila-ma udu. 12Anwuɔsu su Pinehas ka ni, keyi buɛɛ bunyimi bɔdubɔkya ami ku-nwu ntɛ. 13Na nwuna bekyuli ndubo bakpane kabla bɔbla usela uwi ƒui. Ɔsika úkpo kɔgyulo úte-mi na ɔkɛnku ɔmmɔ ɔsu ɔ́ya na líti likpidi lɛni bekyuli bammɔ babla lɛkyiɛ-ma.”
14Na Israelni ɔni bádu ku Midiani uleku ɔmmɔ lɛnyi ndi Simri ɔni ndi Salu ubidi na ɔdi Simeon kaba ɔtɔnkune. 15Na Midiani ulekubi ɔni bádu mmɔ lɛnyi ndi Kosbi, Sur ɔni ndi Midianƒuɔ kaba kadi unengu ubidi.
16Amu na Unwoti ɔ́su Mose ɔnini, 17“Ti Midianƒuɔ bammɔ bla ƒula bekisine na adu-ma, 18ɔsika bábla-mii likyulikpi ala aani bekisine na bátɔlɔ-mii na bítákpa baƒiɔ na Peor ku Midiani ɔtɔnkune ubidi ulekubi ɔni baalɔ Kosbi na bádu-mmɔ kalɛ na ɔ́blaku-mii unwi ɔsu.”
Currently Selected:
Bumomo Bɔka 25: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
