Bumomo Bɔka 13
13
Bekyuli Badi Bátávi Kanaan Kalɔ Kemmo Bánu
1Amu na Unwoti ɔ́su Mose ɔnini, 2“Die ukyuli unwi unwi na Israel kaba leevu-anyɔ ammɔ batɔnkune akɔ, na besie batánu Kanaan kalɔ kani na lɛ́su ka meti mete Israelƒuɔ mmɔ kemmo banu kalɛ kalɔ kammɔ kese.”
3Ɔmmɔ ɔsu Mose ɔ́di ɔda bubo bɔni na Unwoti úte-nwu mmɔ lɛlɔ, na ɔ́tala-ma uwi ɔni na bákya Paran ketele kalɔ kakwiidi kemmo mmɔ. Na bekyuli bani Mose ɔ́tala mmɔ ƒui badi Israelƒuɔ batɔnkune. 4Na bekyuli bani bátala mmɔ anyi ndi amɛni.
Ruben kaba kemmo ukyuli ndi Sakur ubidi Samua.
5Simeon kaba kemmo ukyuli ndi Hori ubidi Saƒa.
6Yuda kaba kemmo ukyuli ndi Yeƒune ubidi Kaleb.
7Isakar kaba kemmo ukyuli ndi Yuseƒ ubidi Igal.
8Eƒraim kaba kemmo ukyuli ndi Nun ubidi Hosea.
9Benyamin kaba kemmo ukyuli ndi Raƒu ubidi Palti.
10Sebulon kaba kemmo ukyuli ndi Sodi ubidi Gadiel.
11Yoseƒ kaba kemmo ndi Manase kaba ukyuli ndi Susi ubidi Gadi.
12Dan kaba kemmo ukyuli ndi Gemali ubidi Amiel.
13Aser kaba kemmo ukyuli ndi Mikael ubidi Setur.
14Naƒtali kaba kemmo ukyuli ndi Woƒsi ubidi Nahbi.
15Gad kaba kemmo ukyuli ndi Maki ubidi Geuel.
16Banana bamɛni na Mose ɔ́tala ɔnii batánu kalɔ kammɔ. Na Mose násia Nun ubidi Hosea lɛnyi Yosua.
17Uwi ɔni na Mose ɔ́tala bekyuli bammɔ ɔnii batávi banu Kanaan kalɔ kammɔ ni, ɔ́su-ma ɔnini, “Si bísela ni, na bɛsia Negev kalɔ kemmo na biti bɛkɔ bisie abi lɛma kalɔ kammɔ kemmo. 18Na bɛnu kalɛ kalɔ kammɔ kese ku bekyuli bammɔ si badi bekyuli bani mbo ɔlɔkplu iye beeebo ɔlɔkplu, ku si bemomo iye beeemomo. 19Na bɛnu bɛnii bi kalɔ udu lɛlɔ belie? Na bɛnu si kalɔ kammɔ kadia iye kaaadia? Na bɛnu bɛnii bi lɛma udu kemmo na bélie? Bátu awoduku bámana-ni munuu bátatu? 20Na kalɔ kammɔ lɛti nɔɔ, dɛ na lise, lɛdia munuu lɛɛɛdia? Na egyii akya kalɔ kammɔ kemmo munuu eeebo? Bɛsia ulu biala lɛlɔ na biti adingyii ebi adi bɛsiku kalɔ kammɔ kemmo biboku si bɛdubo.” Na uwi ɔmmɔ ɔdi adingyii ebi edeedi bugyie uwi.
21Ɔmɛni ɔsu bekyuli bamɛni báyu ulu na bátávi bánu kalɔ kammɔ ɔ́si Sin ketele kalɔ kakwiidi kemmo útédu Rehab, kesii kani baasia teesie Hamat. 22Na básia Negev kalɔ kemmo na bákɔ bétédu Hebron, kesii kani na Anak kaba kemmo bekyuli bani ndi Ahiman ku Sesai ku Talmai bélie. Báada Hebron ɔma akwa maatɛ kama asa na báda Soan ɔma ɔni nkya Egyipte. 23Uwi ɔni bédu Eskol ɔni kalɔ ndi kɔkpasa kɔwɛ kemmo ni, békulo egyiibi adi kagba ku kɔkpasa yuu kɔdi. Bákya-nwu ugyii na nkyuli inyɔ básia-nwu amangba ku kɔnwingyie ebi ku egyiibi abambadi lɛnɔ. 24Na kesii kammɔ baalɔ banii Eskol Kɔwɛ, ɔsika mmɔ na Israelƒuɔ békulo egyiibi kɔkpasa. 25Na emeyi aavlene kama ni, bávi kalɔ kammɔ kemmo báwɔlɔ na bénwini bébo bana kakyakɔ.
Batalane Bammɔ Bédie Kenye Lɛla Lɛni Na Bánu
26Amu na batalane bammɔ ƒui bénwini bébo na básala Mose ku Aaron ku Israelƒuɔ ƒui lisu na Paran ketele kalɔ kakwiidi kemmo na Kedes. Mmɔ na básu-ma ala ani bánu na béti egyiibi ani béde na kalɔ kammɔ lɛlɔ adi bátina-ma. 27Amu na básu Mose banini, “Kalɔ kani lɛlɔ na átala-bu mmɔ ni, sɔsɔ búsie bútéduo-ka kemmo na kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii. Na aanu kana egyiibi ammɔ adi muedi. 28Nsu bɔɔsu-ɔ ka bekyuli bani nlie mmɔ ni, bebo ɔyikun geen, na bana lɛma linengudi ƒui lɛnɔ bátu awodu bámana-ni. Na mmɔ muedi na bɔ́nu Anak kaba bekyuli. 29Amalekƒuɔ belie bésie Negev kalɔ kemmo na Hetiƒuɔ ku Yebusiƒuɔ ku Amoriƒuɔ ama belie abi eli. Na Kanaanƒuɔ belie bésie ɛpu amadɔ na Yordan kakɛ.”
30Mmɔ na Kaleb údie lɛdi na ɔ́ya na bekyuli bammɔ bába lɛsɛ na Mose anumi na ɔ́su-ma ɔnini, “Bɛya na busie butéti kalɔ kammɔ, ɔsika bɔdubɔkana bukpo na bɔdi-ma lɛlɔ.”
31Nsu bekyuli bani na ama ku Kaleb bésie mmɔ bénye momoomo básu banii, “Bulakana-ma bukpoku, ɔsika bebo ɔyikun betulo-bu.” 32Na batalane bamɛni bégyingya bana etemila ekpidi amɛni bákya Israelƒuɔ akɔ. Na básu-ma banini, “Kalɔ kammɔ muedi kalákana edula bɔnwu kaduɛ. Na bekyuli bani udu nli kalɔ kammɔ kemmo bákuku na bébomo. 33Na bɔ́nu bekyuli bani náta katɔ na bási Anak kaba kemmo muedi na mmɔ. Na abu buse na buse aani bakpɔtilikpɔ na bana anumi. Na lɛni na badubo-bu bɔnu.”
Currently Selected:
Bumomo Bɔka 13: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
