Mateo 27

Yudaƒuɔ Benengu Béti Yesu Bésienku Pilato Kudɔ

1Ka kadi kégye ni, bakpane benengu ku ɔma benengu bálɛ ugyii ka badubɔdu Yesu. 2Bébo-nwu kɔgba na béti-nwu bátákya Romaƒuɔ aban unengu Pilato enu kemmo.

Yuda Ɔ́du Lɛlɔ

3Uwi ɔni na Yuda ɔni nákya-nwu kakya únu ka bádu Yesu kukpi kɔtɔ ni, ɔ́yu-nwu ɔlɛ geen. Na úti sika ɔƒualadi ebi avlaatɛ ammɔ úsienku bakpane benengu ku ɔma benengu bammɔ. 4Na ɔ́su-ma ɔnini, “Lɛ́bla likpidi ka lɛ́kya ukyuli ɔni nátaƒiɔ ɔmmɔ kakya nnii badu-nwu.”

Na bédie kenye banini, “Ɔmɛni anwu ɔɔɔkɛ-bu. Ƒula litemi na lɛdi!”

5Amu na Yuda úbo egulabi ammɔ úwi Katɔti kakpakɔ mmɔ, na úsie útákya lɛlɔ ɔbuli.

6Na bakpane benengu bammɔ bábuma egulabi ammɔ na básu banii, “Útalɛka buti egulabi amɛni bɔsalaku ani nkya Katɔti kakpakɔ kuyi kavumi kemmo, ɔsika ukyuli ubugya egulabi na adi. Na bula ɔda bubo buutile ɔmɛni kuƒi.” 7Na ka básala eli ni, bálɛ-nwu ugyii banii badubuti egulabi amɛni betéye kalɔ kani baalɔ banii Ɔvɔne Kalɔ, na bataava baƒɔ na mmɔ. 8Ɔmɛni ɔsu ni, baalɔ kalɔ kammɔ banii Ubugya Kalɔ úbalɛ ɔmwi. 9Amu na lɛla lɛni na Katɔti Kenye Udiene Yeremia ɔ́su úse úbo úte lɛni sɔsɔ ɔnii, “Béti sika aƒualadi ebi avlaatɛ ani na Israelƒuɔ bátuna ka baƒɔ na nwuna lili 10bétéye ɔvɔne kalɔ aani kalɛ na Unwoti ɔ́su-mi.”

Pilato Úye Yesu Etemila

11Na béti Yesu bényene Romaƒuɔ aban unengu Pilato anumi. Na úye-nwu ɔnini, “Awɔ ndi Yudaƒuɔ Ɔga?”

Yesu údie kenye ɔnini, “Awɔ mɔɔsu.”

12Nsu ina ka bakpane benengu ku ɔma benengu bammɔ benye baadá-nwu kenye muedi ni, Yesu útakpete-ma. 13Amu na Pilato úye-nwu ɔnini, “Etemila ani na baasu na ƒula lɛlɔ mɛni aaakɛ-ɔ yoo?” 14Nsu ɔ́bla aban unengu ɔmmɔ kalɛ kadi geen ka Yesu útakya-nwu kenye muedi.

Pilato Ɔ́du Yesu Kukpi Kɔtɔ

15Na Yudaƒuɔ emeyi ammɔ bɔdi biala kemmo ni, Romaƒuɔ aban unengu ɔmɛni ɔɔnyonu Yudaƒuɔ ɔtɔntɛne unwi ɔni lili na kadi bébevele. 16Na uwi ɔmɛni kemmo ni, na ɔtɔntɛne ɔdi ɔ́kya ɔni na bekyuli beenú-nwu kɔku, na baalɔ-nwu banii Baraba. 17Amu na uwi ɔni na bekyuli pii bamɛni bábasa ni, Pilato úye-ma ɔnini, “Ɔma na bɛɛyɔ́ bɛnii nnyonu nte-mii? Baraba munuu Yesu ɔni na bekyuli baalɔ-nwu Ukyuli Ɔƒunadi ɔmmɔ?” 18Ɔ́bla lɛni ɔsika ɔgyi ka lɛnungyie ɔsu na Yudaƒuɔ benengu bammɔ bédie-nwu béte.

19Na uwi ɔni na Pilato ɔkya ɔɔtɛ litemi ni, ulekudi ɔ́tala ɔtu ɔ́kya-nwu ɔnii, “Die enu na ukyuli ɔni nátaƒiɔ ɔmɛni litemi kemmo. Ɔsika kamaadi usien lígye kɔna na nwuna lɛlɔ kɔni náya na liƒu lɛ́da-mi geen!”

20Na bakpane benengu ku ɔma benengu bammɔ bébile bekyuli lisu lɛmmɔ atu ka beye Pilato na ɔnyonu Baraba na badu Yesu.

21Amu na Pilato úye bekyuli lisu lɛmmɔ ɔnini, “Nkyuli inyɔ bamɛni kemmo ɔmani na bɛɛyɔ́ bɛnii nnyonu nte-mii?”

Bédie kenye banii, “Baraba!”

22Na Pilato ɔ́sɔ úye-ma ɔnini, “Bi na mbla Yesu ɔni na baalɔ-nwu banii Ukyuli Ɔƒunadi ɔmmɔ ɔƒɛni?”

Bana ƒui bédie kenye banii, “Kana-nwu mana ugyii lɛlɔ!”

23Nsu Pilato ɔ́sɔ úye-ma ɔnini, “Na bi likpidi na ɔ́bla?”

Mmɔ ni, bése kalɔ baava momoomo banii, “Kana-nwu mana ugyii lɛlɔ!”

24Uwi ɔni na Pilato ɔ́nu ka ɔ́sɔ ulakana lɛla lɛdi bɔbla, na mmomu unyeƒi kpakplaa ndubo bɔlɛ ni, úti ntu na ɔ́ƒɔ enu na bekyuli bammɔ anumi na ɔ́su-ma ɔnini, “Ukyuli ɔmɛni kukpi kɔɔɔsia-mi lɛlɔ! Bina litemi na lɛdi.”

25Amu na bekyuli lisu lɛmmɔ ƒui bédie kenye banii, “Nwuna kukpi kɔsia abu ku bula bebi lili!”

26Amu na Pilato ɔ́nyonu Baraba úte-ma. Na ka ɔ́ya na béti kɔbuli kɔni na bélii básala na bébo Yesu kaduɛ ni, ɔ́nyonu-nwu úte aban bekpone ɔnii bakana-nwu bamana ugyii lɛlɔ.

Romaƒuɔ Bekpone Béwi Yesu Anumi Kalɔ

27Amu na nwuna bekpone bammɔ béti Yesu bésienku Pilato kaduli na bekpone bani nkya mmɔ ƒui báka bámana-nwu. 28Bédie nwuna awu na béti awu ugyiedi ɔdi bákya-nwu. 29Na bédi liyu kabwa bébi-nwu lili asa na béti ugyii bákya-nwu kɔdianu lɛkɔkɔ. Bábla-nwu ala amɛni ƒui aani ɔga kalɛ. Na bálɛ akɔnkɔ na nwuna anumi, na baamá-nwu taasu banii, “Yiidu! Yudaƒuɔ Ɔga ulie ngba gyɔlɔɔ!” 30Bétuo lisuo béwi-nwu lɛlɔ na báƒɔ ugyii ɔmmɔ báƒiɛmi-nwu lili. 31Uwi ɔni na báma-nwu lɛni báwɔlɔ ni, bédie-nwu awu ugyiedi ɔmmɔ na básɔku nwuna lɛwu bákya-nwu. Amu na bétiku-nwu bátɔlɔku banii batákana-nwu bamana ugyii lɛlɔ.

Bákana Yesu Bámana Ugyii Lɛlɔ

32Uwi ɔni na bási ɔma kemmo bakɛ bésela ni, básiaku ɔnana ɔdi ɔni nási Kirene na baalɔ-nwu banii Simon. Bekpone bammɔ béƒie-nwu banii ɔlɛka ubunku Yesu ugyii ɔmmɔ buti. 33Na béti Yesu bésienku kataku kadi baalɔ Golgota ɔni kalɔ budie ndi Opokuo. 34Béte Yesu ntɛ bɔni na básala ku kuvo kɔni mbo ɔdu kati kati banii ɔni. Nsu ka útu-mu ɔnu ni, útani. 35Amu na bekpone bammɔ bákana-nwu bámana ugyii lɛlɔ na bátu egulabi asa na béti nwuna lɛwu béle béte lɛlɔ. 36Nwuna kama ni, básɔ bélie kalɔ na bágyumana-nwu. 37Na bébo kegyiikɛ kadi bámana-nwu eli. Na bénweni lɛla lɛni ɔsu na bádu-nwu básia-ka lɛlɔ banii, “Yesu, Yudaƒuɔ Ɔga, mɛni.” 38Bákana beyune inyɔ badi lɛnɔ bámana ligyii lɛlɔ bébunku Yesu. Unwi ɔma-nwu kɔdianu kakɛ na unwi lɛnɔ ɔma-nwu kɔmii kakɛ. 39Bekyuli bani návi mmɔ ƒui bákunku bana eli na bédumi Yesu. 40Básu banii, “Awɔ násu ka adubɔƒɛ Katɔti kakpakɔ na asɔku-ka atu emeyi atɛ kama! Si adi Katɔti Ubidi ni, yu na aƒɔ lɛlɔ asiku kukpi enu kemmo.”

41Lɛni kani na bakpane benengu ku ɔda bubo ala batinane ku ɔma benengu bammɔ lɛnɔ báma-nwu banini, 42“Úbunku badi, nsu ulákana na ubunku lɛlɔ. Ɔɔɔdi anwu ndi Yudaƒuɔ Ɔga ɔmmɔ? Ɔyu ɔsi ugyii ɔmmɔ lɛlɔ na bɔnu na bɔƒɔ-nwu bɔdi! 43Ɔ́sia Katɔti anu, na ɔɔlɔ lɛlɔ ɔnii Katɔti Ubidi. Na si Katɔti ɔɔyɔ́ ni, ɔdubɔƒɔ-nwu ɔƒɛni kani bɔnu!” 44Lɛni kani na beyune bani na bákana-ma bámana ligyii lɛlɔ bébunku Yesu lɛlɔ mmɔ bédumi-nwu.

Yesu Úkpi

45Amu na kalɔ kammɔ ƒui kábla suu ɔ́si lɛdɔ leevu-inyɔ uwi útalɛ lɛdɔ ɛtɛ kemmo. 46Na ɔdɔ ɔtɛdi ɔmɛni kemmo ni, Yesu ɔ́va momoomo ɔ́su ɔnini, “Eli, Eli, lama sabaktani?” Ɔni kalɔ ndi, “Mina Ɔti, mina Ɔti! Bi ɔsu na áda-mi ányonu?”

47Na ka bekyuli bani nnye mmɔ bénu lɛni ni, básu banii, “Ɔɔkpali Elia!”

48Bana akɔ unwi úkeli útéti unwo ɔni na béti bákya ntɛ bɔni nányi kemmo na úti ɔ́tu ugyii ɔdi lɛlɔ úboku-nwu ɔnii ɔni. 49Nsu bekyuli bakladi básu banii, “Sɔ nye! Bɛya na bɔnu si Elia ɔdubo ubamami-nwu ugyii ɔmɛni lɛlɔ.”

50Yesu ɔ́sɔ ɔ́va momoomo na ɔ́yula.

51Kɔnakunwi na Katɔti kakpakɔ na ɔma kemmo ni, kakpakɔ bule kɔdi kɔmmɔ kɔ́bwɛ kemmo inyɔ ɔ́si katɔ úbedu kalɔ. Na kalɔ kammɔ ƒui kákunku, na atakpɛ ábwɛ. 52Na kɔƒiɔtɔ kúbimi, na bekyuli kedee bani nékpi báta bálɛ bekpine akɔ. 53Na ka bávi bálɛ bana kɔƒiɔtɔ kemmo na Yesu bɔsɔ bɔta kama ni, bésie Yudaƒuɔ ɔma unengudi ɔmmɔ kemmo, na bédie bana lɛlɔ keyi bátina bekyuli pii.

54Na uwi ɔni na bekpone unengu ku bekpone bani nnye mɔɔgyumana Yesu bánu kalɛ na kalɔ kákunku ku ala ani nálɛ ƒui na mmɔ ni, ɔtɔtɔ ɔ́gyu-ma na liƒu lɛ́da-ma geen! Na básu banii, “Sɔsɔ na ukyuli ɔmɛni ɔdi Katɔti Ubidi.”

55Amu na beleku pii bani nási Galilea na badi Yesu bebunkune bákya mmɔ. Na benye ɔgyu baanu ala ani nálɛ. 56Bana badi ndi Maria Magdalene, ku Maria ɔni ndi Yakobo ku Yoseƒ uni, ku Yohane ku Yakobo uni.

Yoseƒ Ɔni Nási Arimatea Ɔ́va Yesu Ukpine

57Uwi ɔni na useyi uwi údu ni, ɔnana ɔlakɛne ɔdi baalɔ Yoseƒ na ɔdi Yesu ɔtɛyane ɔ́si Arimatea úbo. 58Úsie Pilato kudɔ na útéye-nwu ɔnii uti Yesu ukpine ute-nwu. Pilato úte kuƒi ka beti ukpine ɔmmɔ bete-nwu. 59Amu na Yoseƒ úti kɔdi kɔƒualadi kɔdi na úti únyimi ukpine ɔmmɔ. 60Na úti-nwu útáva lɛtakpɛ ubu kaƒiɔtɔ kawɔdi kani na ɔ́ya na béku béte-nwu kemmo. Na ɔ́ya na béminime lɛtakpɛ lɛdi bétile-ka kenye na ɔ́tɔlɔ. 61Na Maria Magdalene ku Maria unyɔdi básɔ bélie kaƒiɔtɔ anumi mmɔ.

Bagyumanane Bénye Yesu Kaƒiɔtɔ Kudɔ

62Na kadi kégye ɔni ndi lɛnwunameyi ni, bakpane benengu ku Ƒarisiƒuɔ bésie Pilato kudɔ. 63Na básu-nwu banini, “Unengu, uwi ɔni na ɔkɔ ɔnyine ɔmmɔ úlie ngba ni, ɔ́su ɔnini, ‘Si líkpi ni, nsɔ ndubɔta lɛlɛ bekpine akɔ emeyi atɛ kama.’ 64Anwuɔsu su kpakplaa anii bagyumanane banu kaƒiɔtɔ kammɔ kaduɛ utálɛ limeyi lɛtɛdi lɛmmɔ lɛlɔ kalɛ na nwuna batɛyane bammɔ beléyu ukpine ɔmmɔ na basu banii ɔ́ta ɔ́lɛ bekpine akɔ. Ɔsika buláwia ka katɔlɔ kani masia ketulo kedeedi.”

65Amu na Pilato ɔ́su-ma ɔnini, “Biti bekpone bisienku na bitágyumana kaƒiɔtɔ kammɔ kalɛ biala bɛdubɔkana.” 66Amu na bésie bátábala lɛtakpɛ lɛmmɔ kenye na bése-ni likpo kalɛ na si ukyuli ɔdi útuku-ka na banu bati. Na báda bekpone bése mmɔ na baagyumana kaƒiɔtɔ kammɔ.

Currently Selected:

Mateo 27: lef

Highlight

Copy