Lewiƒuɔ Ɔda Bubo 15
15
Ɔda Bubo Si Ntu Buuwi Ukyuli Lɛlɔ Lɛlɔ
1Amu na Unwoti ɔ́su Mose ku Aaron ɔnini, 2“Bɛkɔ lɛsa na bɛsu Israelƒuɔ bɛnini, ‘Si ɔlɛ ntu udu ɔdi ɔɔlɛ́ ɔnana kanɔkɔ ni, ntu bɔmmɔ buusé lɛlɔ. 3Na si bɔɔyu ƒui iye bɔɔyu teekulo muedi ni, ɔ́ya na ukyuli ɔmmɔ uuuse sɛɛn.
4“ ‘Atɛla biala lɛlɔ na ɔnana ɔni ntu buuwi-nwu mmɔ watɛ adubuse lɛlɔ na lɛla biala lɛlɔ na ɔnana ɔmmɔ wayu welie lɛnɔ lɛdubuse lɛlɔ. 5Na ukyuli biala metuku ɔnana ɔmmɔ atɛla ɔlɛka ɔƒɔ nwuna adala na ɔkpi ntu na ɔmu ɔdubuse lɛlɔ utédu useyi uwi. 6Na ukyuli biala mayu melie lɛla biala lɛni lɛlɔ na ɔnana ɔmmɔ ɔ́yu úlie ni, ɔlɛka ɔƒɔ nwuna adala na ɔkpi, nsu ɔmu ɔdubuse lɛlɔ utédu useyi uwi.
7“ ‘Na ukyuli biala metuku ukyuli ɔni ntu bɔɔlɛ́-nwu lɛlɔ mmɔ ɔlɛka ɔƒɔ nwuna adala na ɔkpi, na ɔmu ɔdubuse lɛlɔ utédu useyi uwi.
8“ ‘Na si ukyuli ɔni ntu bɔɔlɛ́-nwu lɛlɔ mmɔ útuo lisuo úwi ukyuli ɔni nse sɛɛn ni, ukyuli ɔmmɔ ɔlɛka ɔƒɔ nwuna adala na ɔkpi na ɔmu ɔdubuse lɛlɔ utédu useyi uwi.
9“ ‘Na lɛla biala lɛlɔ ukyuli ɔmmɔ welie na ɔpɔnkɔ lɛlɔ lɛdubuse lɛlɔ. 10Na ukyuli biala metuku ala ani nkya kesii kani na úlie mmɔ kalɔ ɔdi ɔdubuse lɛlɔ utédu useyi uwi. Na si ukyuli ɔdi úti ala ani lɛlɔ na úlie mmɔ adi ɔlɛka ɔƒɔ nwuna adala na ɔkpi na ɔdubuse lɛlɔ utédu useyi uwi.
11“ ‘Ukyuli biala na ɔnana ɔni ntu bɔɔlɛ́-nwu lɛlɔ mmɔ wetuku na útaƒɔ kɔnu asa na utuku-nwu ɔlɛka ɔƒɔ nwuna adala na ɔkpi na ɔmu ɔdubuse lɛlɔ utédu useyi uwi.
12“ ‘Na ketubui kani na ɔnana ɔni ntu bɔɔlɛ́-nwu lɛlɔ wetuku ɔlɛka babwɛ-ka. Na ugyii lɛla ani bɔƒɔ na ɔlɛka baƒɔ-ni kaduɛ.
13“ ‘Si ɔlɛ ɔmmɔ ɔ́ba ɔnana ɔmmɔ ni, ɔka emeyi maatɛ ɔtɔ anumi asa na lɛlɔ bɔbla sɛɛn ɔdi limeyi lɛmmɔ lidu. Na ɔlɛka ɔƒɔ nwuna adala na ɔkpi ntu bɔni bédu ɔwɔdi na ɔdubɔbla sɛɛn. 14Na limeyi maanedi lɛlɔ ɔdubɔwia babloduma iye bamangbɛ inyɔ na uti usieku Unwoti anumi na Unwoti Adi Kevo mmɔ utéte ɔkpane. 15Na ɔkpane ɔmmɔ ɔdubuti baasɛ bammɔ akɔ unwi ɔbla likpidi bɔkyiɛ akpala na uti ɔkladi ɔbla akpala bɔkyula. Lɛni na ɔdubɔbla na udie Unwoti udie bɔƒiɔ biala na ukyuli ɔmmɔ lɛlɔ.
16“ ‘Si lɛlɔ líbo ɔnana ɔdi ni, ɔlɛka ɔkpi na ɔmu ɔdubuse lɛlɔ utédu useyi uwi asa na ɔbla sɛɛn. 17Na si kɔdi iye ebuo ɔku biala na ntu bɔmmɔ búwi ɔlɛka ɔƒɔ ala ammɔ na amu adubuse lɛlɔ etédu useyi uwi. 18Na si ɔnana ɔdi ku ulekudi bátɛ ni, ɔlɛka bana inyɔ ƒui bakpi na bamu badubuse lɛlɔ utédu useyi uwi.
19“ ‘Na si uleku ɔ́lɛ ɔtɔ ni, emeyi maatɛ kemmo ƒui na uuuse sɛɛn. Na ukyuli biala metuku-nwu lɛnɔ uuuse sɛɛn na ɔɔɔdubo buse sɛɛn wetédu useyi uwi.
20“ ‘Na lɛla biala lɛlɔ na welie iye watɛ na nwuna ɔtɔ bɔlɛ uwi lɛdubuse lɛlɔ. 21Na ukyuli biala metuku uleku ɔmmɔ lɛla lɛdi na nwuna katɛnkɔ ɔlɛka ɔkpi na ɔƒɔ nwuna adala na useyi uwi asa na ɔdubɔbla sɛɛn. 22Na ukyuli biala metuku lɛla biala lɛlɔ na welie ɔlɛka ɔƒɔ nwuna adala na ɔkpi na useyi uwi asa na ɔdubɔbla sɛɛn. 23Nwuna atɛla na adi o-o, kesi kesii na úlie na ɔdi útuku ala ammɔ o-o ni, ukyuli ɔmmɔ ɔdubuse lɛlɔ utédu useyi uwi.
24“ ‘Si uleku ɔ́lɛ ɔtɔ na anwu ku ɔnana ɔdi bátɛ na uleku ɔmmɔ ɔtɔ bɔlɛ bútuku ɔnana ɔmmɔ ni, ɔnana ɔmmɔ ɔdubuse lɛlɔ emeyi maatɛ. Na atɛla biala lɛlɔ watɛ lɛnɔ adubuse lɛlɔ.
25“ ‘Si uleku ɔtɔ bɔlɛ butulo kalɛ na ɔɔyɔ́ bɔlɛ ni, iye uwi bamba ɔdi kemmo na ubugya uuwi-nwu ni, ɔdubuse lɛlɔ aani kalɛ kani na si ɔ́lɛ ɔtɔ na uusé lɛlɔ emeyi bumomo bɔni na ubugya ɔmmɔ uuwi-nwu. 26Na atɛla biala lɛlɔ watɛ iye lɛla biala lɛlɔ welie na nwuna ubugya buwi bɔmmɔ kemmo ni, adubuse lɛlɔ aani kalɛ kani na si ɔ́lɛ ɔtɔ na ala ammɔ eesé lɛlɔ. 27Na ukyuli biala meti kɔnu metuku ala ammɔ adi ɔdubuse lɛlɔ. Na ɔlɛka ɔƒɔ nwuna adala na ɔkpi na ɔmu ɔdubuse lɛlɔ utédu useyi uwi.
28“ ‘Na uleku ɔni na ubugya uuwi mmɔ si nwuna ɔlɛ ɔ́ba-nwu ni, ɔlɛka ɔka emeyi maatɛ ɔsiku uwi ɔni na ubugya ɔmmɔ ukulo na ɔmmɔ kama ɔdubɔbla sɛɛn. 29Na limeyi maanedi lɛlɔ ɔlɛka ɔwia babloduma iye bamangbɛ inyɔ na uti-ma usienku ɔkpane na Unwoti Adi Kevo anumi. 30Na ɔkpane ɔmmɔ ɔdubuti baasɛ bammɔ unwi ɔbla likpidi lili buvele akpala na uti ɔkladi ɔbla akpala bɔkyula. Na lɛni na ɔkpane ɔmmɔ ɔdubɔbla akpala ammɔ na Unwoti udie kɔtu bɔni biala na uleku ɔmmɔ lɛlɔ.
31“ ‘Ɔdi ka aya na Israelƒuɔ bada lɛlɔ bedie ala ani muusé lɛlɔ kudɔ kalɛ na beléteese lɛlɔ na bekpi na ɔmmɔ ɔsu ka badubɔya na mina keliekɔ kani nkya-ma akɔ keteese lɛlɔ ɔsu.’ ”
32Ɔda bubo bɔmɛni ndanku ɔnana ɔni na ntu bɔdi bɔɔyu-nwu lɛlɔ iye lɛlɔ líbo-nwu na ɔ́ya na uusé lɛlɔ, 33ku uleku ɔni nálɛ ɔtɔ iye ɔnana ku uleku ɔni na ntu bɔdi buuwi-ma iye ɔnana ɔni na anwu ku uleku ɔni nálɛ ɔtɔ na uusé lɛlɔ bátɛnku lɛlɔ.
Currently Selected:
Lewiƒuɔ Ɔda Bubo 15: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
