Yosua 3
3
Israelƒuɔ Bávia Yordan Ketu
1Amu na kadi kégye ɔtanta tutuutu ni, Yosua ku Israelƒuɔ ƒui báta Sitim na bátɔlɔ bétélie Yordan Ketudɔ kesii kani na badubulie asa na bavia ketu kammɔ. 2Nwuna emeyi atɛ kama ni, bana batɔnkune bávi bekyuli bammɔ ƒui lɛlɔ na bana kakyakɔ mmɔ. 3Na básu-ma banini, “Si uwi ɔni na bɛ́nu ka Lewiƒuɔ bakpane bammɔ béti bina Unwoti Katɔti Bunyimi Adaka béselaku ni, bɛta na bɛsiaku-ma kama. 4Ka bítebo mɛni kudii ɔsu ni, bakpane bani nti Unwoti Bunyimi Adaka ɔmmɔ ndubɔtina-mii ulu. Nsu ɔdi utakpɛ utede Bunyimi Adaka ɔmmɔ. Na bɛya na kuƒi kɔkya amii ku Bunyimi Adaka ɔmmɔ ntɛ aani liluku kakɛ na bitani bitede-nwu.”
5Ɔmmɔ kama Yosua ɔ́su bekyuli bammɔ ƒui ɔnini, “Ɔdi biala ɔbla lɛlɔ sɛɛn. Ɔsika kɔnaadi Unwoti ɔdubo akɔla bɔbla na bina akɔ.”
6Ɔmɛni kama Yosua ɔ́sɔ ɔ́su Katɔti Bakpane bammɔ ka bagyu Bunyimi Adaka ɔmmɔ beti na bagyu batɔ bekyuli bammɔ animi. Anwuɔsu ama lɛnɔ bábla kalɛ na Yosua ɔ́su-ma mmɔ.
7Mmɔ na Unwoti ɔ́su Yosua ɔnini, “Lɛla lɛni ndubo bɔbla ɔmwi kadi mɛni ɔdubɔya na Israelƒuɔ bese kalɔ bataabu-ɔ aani ukyuli ubendi na adi. Na badubo bɔnu bɔti ka nlieku-ɔ aani kalɛ kani na lílie-ku Mose. 8Anwuɔsu su Bakpane bani nti Bunyimi Adaka ɔmmɔ anini, ‘Si bídu Yordan Ketudɔ ni, na biduo ketu kammɔ kemmo na bisie anumi blii asa na bidi binye utubli ɔmmɔ kudɔ.’ ”
9Amu na Yosua ɔ́su bekyuli bammɔ ƒui ɔnini, “Bɛni bide-mi na bise atu na binu lɛla lɛni na bina Unwoti Katɔti ɔdubo-mii bɔsu. 10Ɔni na bísela mɛni ni, Bina Unwoti Katɔti ɔdubo Kanaanƒuɔ ku Hetiƒuɔ ku Hewiƒuɔ ku Perisiƒuɔ ku Girgasiƒuɔ ku Amoriƒuɔ ku Yebusiƒuɔ bɔbɔku bɔlɛku kɔlɔ kɔmmɔ lɛlɔ. Na mmɔ bɛdubo bɔnu bɔti ka Katɔti ɔni nlie ngba mmɔ ɔkya-mii akɔ sɔsɔ. 11Bɛnu! Unwoti ɔni mɔɔdi kayawi ƒui lɛlɔ Bunyimi Adaka ɔdubɔgyu bɔtɔ-mii utéduo Yordan Ketu kemmo. 12Anwuɔsu kaba leevu-inyɔ kammɔ bɛƒuna ukyuli unwi bɛsiku ɔdi biala kemmo bise. 13Na uwi ɔni kani na bakpane bani nti Unwoti Bunyimi Adaka badubɔnya ntu bɔmmɔ kemmo ni, Yordan Ketu kammɔ kadubɔda bɔgba bɔya kɔnakunwi. Na ntu bɔni mɔɔgbá taasi katɔ kakɛ bɔdubo ni, bɔdubudi bunye liku linwi.”
14Amu ka Israelƒuɔ bammɔ báta banii baavia Yordan Ketu ni, bakpane bani nti Bunyimi Adaka ɔmmɔ nágyu batɔ-ma. 15Na uwi ɔmmɔ kemmo ni, ketu kammɔ kéyi geen na ɔdi edula ɔƒɛ uwi. Nsu uwi ɔni kani na bakpane bani nti Adaka ɔmmɔ bédu ketu kammɔ na bákya-ka lɛgba ni, 16ntu bɔni nási katɔ kakɛ bɔ́da bɔgba bɔ́ya. Na bɔ́sala lisu liku linwi. Na kesii kani na ntu bɔmmɔ búdi búnye mmɔ baalɔ Adam na ude Sareta na ɔgyunku kesii kani bávia mmɔ. Na ntu bɔni nágba bɔ́yu búsela Mma Ɛpu búkulo kɔnakunwi. Anwuɔsu bekyuli bammɔ bávia Yordan Ketu na kesii kani nde Yeriko. 17Na Katɔti bakpane bani nti Bunyimi Adaka ɔmmɔ benye ketu kakwiidi kammɔ ntɛntɛ úti útédu ka bekyuli bammɔ ƒui bávia báwɔlɔ.
Currently Selected:
Yosua 3: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.