Yeremia 5
5
Ukyuli Biala Ulásu Litemi Geen Na Ɔsiaku-mi Kama Siin
1Unwoti ɔ́su-mi ɔnini, “Sie na atáwia Yerusalem ƒui na anu si bekyuli badi bakya na baasu litemi geen na baawia ka basiaku-mi kama siin. Na si ákana na ákɛ ukyuli ina unwi ni, ndubuti kɔtu bɔni bɔmmɔ lɛkyiɛ ɔma umodi ɔmmɔ. 2Ukyuli biala nése kenye kadi na mina lɛnyi kemmo ni, uládi-ka lɛlɔ.”
3Mmɔ na lɛ́su nnini, “Geen ni, ngyi ka awɔ Unwoti aawia ka butaasu litemi geen. Na ɔkɔ bɔnyi bɔmmɔ ɔsu na áni ƒula bekyuli kɔtu, nsu ɔmɛni ƒui atu ɔkplu kani na baabla teebu na bébulo ka bani bede-ɔ.” 4Na lɛ́bla kasusu nnini, “Bekyuli keeke bani mɔɔyaki ala na bádɔlɔ badi. Na balanu lɛla lɛni na bana Unwoti Katɔti ɔɔwia taasiku-ma kudɔ bati. 5Ndubusie ntátɛmiku batɔnkune bammɔ, ɔsika ama bagyi lɛla lɛni na Unwoti ɔɔwia ka babla, nsu ama muedi béni na bálɛ ugyii ka belénu Unwoti litemi. 6Bekyuli bammɔ báta bénye Unwoti lɛlɔ na béni-nwu kɔlɛ kɔlɛ na ɔ́ɔvi ntu. Anwuɔsu bekisine badubo bebekpo-ma aani bagyata bani nálɛ bási lɛku kemmo iye beƒukutu bani nási kalɔ kakwiidi kemmo. Bekisine bammɔ badubunye bataasia Yuda lɛma lɛmmɔ anu na ɔdi biala masu ɔnii ɔɔlɛ́ usie kesii kadi ni, na bani-nwu babwɛ aani bebuoƒuala.”
Bekisine Badubo Yuda Kɔtu Bɔni
7Unwoti ɔnini, “Amii Yudaƒuɔ, dɛ na ndubɔkana na liti bina kɔtu bɔni lɛkyie-mii? Líte-mii lɛla biala na bɛɛwia, nsu bíni-mi na bísie bɛɛkpá baƒiɔ. Amii banana bɛ́lɛ bina beleku kama na bísie bɛsiaku bayalɛ. 8Bítavumana ku bebuo, ɔsika lɛlɔ bɔtɛnku bɔmmɔ kani kasusu nkya-mii na biisié bekyuli bamba beleku kudɔ. 9Bi ɔsu na útalɛka lɛni Yuda kadi bekyuli kɔtu?
10“Ndubo bana bekisine bɔsu nnini, ‘Bisie mina adingyii kemo kammɔ kemmo na bikulo kɔgba kɔmmɔ ƒui biwi kalɔ mmomu bitadu kugyii kɔmmɔ ɔlati, ɔsika kɔgba kɔmmɔ ndi bekyuli bani naaadi mina badi. 11Yuda ku Israel bálɛ-mi kama ulu biala lɛlɔ.’
12“Bana kenye bediene baanyi ɔkɔ taasu banini, ‘Unwoti ɔɔɔdubo-bu kɔtu bɔni. Na bɔdubo bulie na atu bɔyɔ kemmo na bulayaki adila lɛnɔ.’ 13Ɔkɔ ɔmɛni udu na baanyi taatɔlɔ bekyuli na mina lɛnyi kemmo. Anwuɔsu ɔƒaamu badubo bukpi na kekpokɔ iye kɔka kɔdu-ma.
14“Yeremia, ami ndi Unwoti Katɔti Ɔyikune Ƒui, na lɛla lɛni geen na mɔɔwia ka asu ni, ndubo-ɔ lɛla lɛmmɔ bɔsu. Ƒula etemila adubo buse aani ogya kalɛ na Yuda ku Israel badubo buse aani ekyweni. 15Binu amii Israel kadi bekyuli, lɛ́ɛbla mina kasusu líse. Na bekpone badubo bɔsi kalɔ ɔgyu kakaaka bebo na bebekpo-mii. Na bekyuli bammɔ badi bekyuli bani lɛdi na bilenu na bakya ɔ́si kukuuku. 16Bekpone na bana ƒui badi na bana atula adanku kukpi. 17Bina edula na kadi bekyuli bamɛni badubo bɔdi na bakun bina bebuo. Na adingyii ebi adi elébu na bina adingyii mmo. Na ina ka bɛɛkali bɛnii bɛ́kɛ kakyakɔ na bina awodu kpakplaa ani na bɛ́tu bɛ́mana bina ɔma ɔmmɔ kama ni, badubo-mii lɛma bubo bɔbwɛ na badu bina bebi.”
Israel Kadi Bekyuli Béni Ka Bakpa Unwoti
18Unwoti ɔ́su ɔnini, “Yeremia, bekisine bekpone bammɔ baaadubo ukyuli biala bɔdu na Yuda. 19Na bani ndubo bubu bulie ngba badubuye banini, ‘Bi ɔsu na Unwoti, bula Katɔti, ɔ́bla lɛla linengudi lɛni muukpóku-bu mɛni udu?’ Na adubudie-mi kenye asu anini, ‘Ami ndi Unwoti, nsu bíni-mi na bísie bítétiku baƒiɔ bamba bíbo bɛɛkpá na amii alati bina kalɔ. Anwuɔsu badubo-mii buƒie bɔtɔlɔku na biténwini bekyuli bamba kabla bablane na kaƒɔ.’
20“Amii Yudaƒuɔ bani ɔti kuuku ndi Yakob bibo ɔmɛni kudu bite lɛlɔ na ukyuli biala unu. 21Bi ɔsu na bilenu ala kalɔ si mɔɔtɛmiku-mii, amii badɔlɔdi? 22Bi ɔsu na útalɛka lɛlɔ litaatɔ-mii na bitaayia-mi ku ɔbu? Ami násia ubili líte ɛpu na ɔ́bala ntu bɔmmɔ. Ntu bɔmmɔ buubó taababwɛ teewi ubili kowodu kɔmmɔ, nsu bulávia teebo kama teetulo kesii kani na lɛ́sia-mu ɔmii. 23Amii batuɔkplune bɛ́ta bínye-mi lɛlɔ na bínwini kama bɛ́kya-mi. 24Bíbulo bɔsu bɛnini, ‘Bɛya na bɔbu Unwoti! Anwu ndi ukyuli ɔni mɔɔyá na ketudi ɔnantu ku kaƒɛndi ɔnantu ɔɔna teete-bu. Na ɔɔyá na edula aadia-bu na bɔƒɛ.’ 25Anwuɔsu na naaakana na mete-mii kusɛ kusɛ.
26“Ɔgbini ɔɔkywɛɛ kamia teeƒie aasɛ taakya lɛyu kemmo. Nsu bina badi ni, bekyuli na bɛɛkywɛɛ kɔkpagyuɛ na biiƒie-ma teenwini bina kabla bablane. 27Bibo likyulikpi na bɛɛnyi ɔkɔ na bɛɛnya bekyuli taakya kalɛ na amii binwini balakɛne na bɛɛdi-ma lɛlɔ ku ɔyikun 28na ala adianku-mii, nsu bíni na bilébunku bekyuli bamba. Na bɛɛbla bawabane lɛla lɛni na bɛɛkali ka lɛ́manku-ma. 29Ɔlɛka bani-mii kɔtu, anwuɔsu ndubo-mii kasi budie.
30“Ɔƒɛ ɔɔdá-mi na likyulikpi ala bonwu bonwu ani udu na binye bɛɛbla na kalɔ kammɔ lɛlɔ na eekpóku bekyuli ɔsu. 31Kenye bediene baakɔ́ bana etemila lɛsa na baƒiɔ lɛnyi kemmo. Na mina bakpane baláwia ka babla-mi kabla. Na amii mina kadi bekyuli lɛnɔ bɛɛyɔ́-nwu lɛni! Na ɔgbankpi limeyi ni, ɔma na bɛdubo bukeli bɔtamiku bɛnii ubunku-mii?”
Currently Selected:
Yeremia 5: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
