Yeremia 42
42
Bekyuli Bammɔ Bévele Yeremia Banii Ɔkpali Katɔti Bana Lili
1Mmɔ na Karea ubidi Yohanan ku Hosaia ubidi Yesenia ku bekpone bamba bakladi ƒui na kasala kammɔ kemmo bébo-mi kudɔ, 2na básu-mi banini, “Buvele, kpali Unwoti, ƒula Katɔti, na bula lili te-bu. Agyi ka nka bekyuli bakya Yuda kalɔ mɛni kuuku, nsu bula ɛlɛɛ kani nébu ɔƒɛni aani kalɛ na awɔ ɔla aanu. 3Anwuɔsu ye Unwoti kesii kani na ɔɔwia ka buteesie ku lɛla lɛni na ɔɔyɔ́ ka bɔbla.”
4Amu na lídie kenye nnini, “Ɔdia, ndubo Unwoti bina Katɔti bɔkpali na livele, na lɛla biala na ɔ́su-mi ni, ndubɔya na bɛti.”
5Mmɔ na ama lɛnɔ báƒɔ banini, “Unwoti ɔlati ndubo-bu kenye budie ka búse kenye ka lɛla biala na ɔ́su-bu ni, bɔdubɔbla bɔsiaku lɛni kani. 6Ina ɔɔɔdi bula lɛƒɔyɔ muedi ni, bɔdubunu-nwu litemi na bɔdi-ni lɛlɔ kalɛ na ala asɔ adianku-bu.”
7Emeyi leevu kama ni, Unwoti úte-mi bɔti na lɛla lɛni na 8lɛsu Yohanan ku bekpone benengu ku bekyuli bakladi bammɔ ƒui lɛlɔ. Anwuɔsu lɛ́lɔ-ma ƒui lɛ́sala, 9na lɛ́su-ma ka Unwoti, Israel Katɔti ɔnini, “Bɛ́su Yeremia bɛnii ɔkpali-mi na uye-mi lɛla lɛni na ɔlɛka bɛbla. 10Nsu muute-mii bɔbuɛ, ɔsika bina ɔbladu náya na ɔdi ka lɛni-mii kɔtu kɔmmɔ udu. Na mɔɔsu-mii ɔƒaani nnii bɛsɔ bilie Yuda mɛni kani na ndubɔsɔku-mii lɛlɛ aani kalɛ na baalɛ lɛla lɛdi na lɛnu-mii lɛlɔ na bɛbi lɛlɔ. Na ɔɔɔdi ɔni na lɛgyingya-mii iye lɛgyu-mii lidie bina kenyekɔ ku ligyiitu. 11Bitayia Babilon ɔga, ɔsika ndububo-mii bɔgyumana bɔsiku nwuna bukpoku kudɔ. 12Na ndububo-nwu lɛlɔ bunye muedi na ɔsɔku bina mmo ute-mii.
13“Ɔƒɛni kalɛ ɔdubo-mii bɔbla kalɛ kadi na bɛsu bɛnini, ‘Bɔɔɔdubo Unwoti bula Katɔti litemi lɛmɛni bunu na bɔsɔ bɔkya Yuda mɛni. 14Bɔ́tɔlɔ búsela Egyipte kesii kani na adila akya kaduɛ na kekpo ɔgbankpi ɔdi uuubo.’ 15Yuda kadi bekyuli, uwi ɔni na kekpo kamɛni kébo na bina bekisine békpo-mii ni, bítekpi bilie ngba. Na ɔƒɛni amu binye bɛɛbla kasusu ka biteesie Egyipte. Na mɔɔyá na bɛti lɛla lɛni ndubo-mii bɔlɛku si bísie mmɔ. 16-17Kekpo ku kɔka ku lɛlɛ na bɛɛyia na Yuda kalɔ lɛlɔ mɛni, nsu ala amɛni adubo-mii bɔsiaku buteesie Egyipte mmɔ na abadu-mii. Na ɔgbankpi ɔni na ndubɔya na ubo-mii lɛlɔ na mmɔ ni, ɔdi biala ɔɔɔdubo-nwu kemmo bɔlɛ.
18“Ami Unwoti néti kɔnyi lɛ́kya Yerusalemƒuɔ na lɛ́ni-ma kɔtu. Na si bísie Egyipte kalɔ lɛlɔ ni, ndubo kɔnyi buti bɔkya-mii na lɛni-mii kɔtu lɛni kani na bɛsɔ bɛɛɛdubo bina ɔma bɔnu limeyi lɛdi. Liƒu bonwu lɛdubo bekyuli bɔda na lɛla lɛni lɛ́bla ɔsu. Na badubo bina lɛnyi bɔlɔ aani ewida bakya bekyuli.”
Yeremia Úbo Bekyuli Bammɔ Ɔda Kpakplaa
19Lɛ́su bekyuli bammɔ nnini, “Amii bíkeli ɔgbankpi ɔni nálɛku Yuda, nsu ɔƒɛni amu ni, Unwoti uubó-mii ɔda ɔnii bitanya Egyipte ɔgba. 20Bɛ́su-mi bɛnii nkpali Unwoti bula Katɔti na livele-nwu na ɔtina-mii lɛla lɛni na ɔlɛka bɛbla na bíse kenye ka bɛdubɔdi nwuna litemi lɛlɔ. Nsu ɔmmɔ ɔdi-mii bɔƒiɔ bubendi. 21Ɔsika ɔni na lɛ́su-mii lɛla lɛni na Unwoti ɔɔwia ka bɛbla ni, bíni na bɛnii bilenu-nwu litemi. 22Anwuɔsu na kekpo ku kɔka ku ɔlɛ ɔdubo-mii bɔdu na Egyipte kalɔ lɛlɔ.”
Currently Selected:
Yeremia 42: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
