Yesaia 9
9
Báwɔ Ubi Béte-bu
1Nsu kalɛ na báyila lɛnunsia na beli lɛdisa kemmo mmɔ ni, ulése lɛni uwi ƒui. Uwi ɔni návi ni, bátabu Sebulon ku Naƒtali bátakya lɛla lɛdi kemmo. Nsu uwi ɔdi ɔdubo ɔni na Katɔti ɔdubuti bukeye ute kadi bamba bekyuli bani nlie Galilea na Yordan Ketu ulu lɛlɔ úti útédu ɛpu kɔtu.
2Bekyuli bani na nka beli
baabla ala na lɛdisa kemmo
badubɔnu bukeye.
Na bani na belie kukpi ɔgbankpi kemmo ni,
Katɔti bukeye bɔdubuwi-ma lɛlɔ.
3Na Israel kadi badubɔsɔ balɛ lili
na baƒɔ lɛnyi na lɛlɔ lɛyɔ-ma
aani kalɛ na lɛlɔ lɛɛyɔ́ bekyuli si báƒɛ edula awɔdi.
Na badubo kudu bubo geen ku lɛlɔyɔ
aani bekpone muule ala
ani na béƒie báƒɔ bana bekisine kudɔ.
4Ɔsika lɛbibo ku ukyuli kalala bɔbla
bɔni nénwini lɛbibo kɔgba na kɔda ƒula bekyuli ni,
adubo-ku bɔƒɛ ƒui,
aani kalɛ na áyila Midianƒuɔ bekpone udu ƒui.
5Na bekpone adala ku agbanvuo
ani nákpi ubugya na kekpo ni,
ala ammɔ bene ƒui adubunwini ala ani
na badubo ogya bɔkya.
6Ɔsika báwɔ ubi ɔnanabi béte-bu.
Na bekyuli ƒui lɛlɔ bɔdi lɛdubɔsia-nwu lɛlɔ.
Na badubɔlɔ-nwu banii
Kasusu Buni Ɔkyane
ku Katɔti Ɔyikune
ku Ati Ɔni Nli Uwi Ƒui
ku Keyi Buɛɛ Ɔga Ubi.
7Na nwuna lɛga kadikɔ
kadubo katɔ butaakɔ
ku keyi buɛɛ,
na kaaadubo ulu bɔwɔ kudii.
Na ɔdubulie Dawid lɛgaboku lɛlɔ utaadi lɛga lɛmmɔ,
na nwuna lɛgadi lɛdubunye uwi ƒui.
Na ɔdubɔtɛ litemi ulu lɛlɔ,
na nwuna ablala ƒui
adubuse siin.
Na Katɔti ɔdubɔya na ɔmɛni
ubo-nwu kemmo
ɔkɛnku nwuna ɔyikun lɛlɔ!
8Unwoti ɔdanku linyesia kpakplaa ute Yakob kaduli bekyuli,
na lɛla lɛmmɔ lɛdubo Israel lɛlɔ.
9Na bekyuli ƒui badubo-ni bɔnu bɔti,
Eƒraim ku Samaria kalɔ lɛlɔ bekyuli ƒui.
Ama mɔɔkun lɛmɛnɛ
na baakɔliku lɛkɔ katɔ taasu banii,
10“Unwoti ɔkɛnku bula bekisine
lɛlɔ na ɔ́ya na báƒɛ bula
awodu atimbɔ lɛtɔ ƒui
béwi kalɔ,
nsu bɔdubo lɛni ndia ntulo
lɛmmɔ bɔtu
ku atabi abwɛdi ani na bánwi kaduɛ.
Na báƒɛ ɔtɔ ɔmmɔ ligyii ka liiibo ɔkplu ɔsu,
nsu bɔdubɔvumana-ni ku ligyii kpakplaa geen.”
11Nsu bana lɛlɔ katɔ bɔkɔliku bɔmɛni ɔsu ni,
Unwoti ɔdubɔya na bana bekisine
bani ndi Resin ku Asiria bekpone
basala bata babasiaku-ma.
12Na Siriaƒuɔ badubɔsi ɔƒɛ katukɔ,
na Ƒilistiƒuɔ basi ɔƒɛ kanukɔ
na bebebweli-ma aani
eƒiebuo kalɛ.
Nsu ina ɔmmɔ ƒui ni,
Unwoti kɔnyi kútayɔ tɔ,
mmomu ɔ́mu únene kɔnu
unye ka ɔƒiɛmi-ma.
13Nsu bekyuli bamɛni belenu kalɔ
ka benwini bebo ukyuli ɔni mɔɔní-ma kɔtu kudɔ,
bana Unwoti Ɔyikune Ƒui kudɔ.
14Anwuɔsu limeyi linwi kani
na Unwoti ɔdubɔyila Israel kadi bekyuli udu
ɔ́si lili útédu lɛgba,
aani kalɛ baamɛnɛ kubo kɔɔƒɛkɛ
ku livo alakpi ƒui teewi kalɔ limeyi linwi.
15Ɔma benengu ku batɔnkune
ndi lili.
Na ɔkɔ kenye bediene ndi lɛgba lɛmmɔ.
16Batɔnkune bamɛni baatɔnku-ma taatáyila,
na bani batɔnku mmɔ lɛnɔ baayii ulu.
17Anwuɔsu na lɛlɔ lilayɔ
Unwoti Katɔti
na bana bakɔdi lɛlɔ
munu munu,
na bekpinebi ku bekpinele basɔ baládu-nwu kaƒɔ,
ɔsika bana ƒui basɔ balábla Unwoti lɛyɔla,
na baabla kalala na baanyi ɔkɔ.
Nsu ina ɔmmɔ ƒui Unwoti kɔnyi kútayɔ tɔ,
mmomu ɔ́mu únene kɔnu unye ka ɔƒiɛmi-ma.
18Geen ni, kalala bɔbla buse aani lɛku kemmo ogya.
Ɔɔkyula liyu ku alakpi bamba,
na lɛku limodi lɛmmɔ lɛɛkywí,
na uudie uyɔ litigbli
taakɔliku kayaa.
19Unwoti Ɔyikune Ƒui kɔnyi kpakplaa ɔsu ni,
kalɔ kammɔ kadubɔkula lɛlɔ geen,
na bekyuli bénwini ekyweni bete ogya ɔmmɔ,
na ɔkpanadi kɔnyana bɔnu buuubo.
20Benye kesi kesii beemú taadi,
nsu belemo na kɔka kɔsa.
Ama alati bebi na badubo bɔkun ɔƒɛni amu.
21Manase ɔdubo Eƒraim badi bɔkun,
na Eƒraim ɔ́kun Manase badi aani beƒiebuo kalɛ.
Na bana inyɔ benwini benye Yuda lɛlɔ.
Nsu ina ɔmmɔ ƒui Unwoti kɔnyi kútayɔ tɔ,
mmomu ɔ́mu únene kɔnu unye ka ɔƒiɛmi-ma.
Currently Selected:
Yesaia 9: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
