Yesaia 64
64
1O Unwoti, bɔɔyɔ́ ka aya
na kayaa kabwɛ kemmo
na ayu ebo kalɔ.
Na abi ƒui ataakunku na ƒula anumi!
2Na lɛla biala lɛbla aani kalɛ na
baatu ogya taakya alakpi
na aada.
Na aya na ntu ƒui buteeƒuƒuo.
Yu bo na aya na ƒula bekisine ƒui banu
kalɛ na ƒula lɛnyi lɛɛda liƒu.
Na aya na kadi bekyuli ƒui bayia-a,
na benye-ɔ anumi bataatɔ kpakpaakpa!
3Ɔsika uwi ɔni na ábla liƒu ala
ani na bɔɔɔsia anu muedi ni,
bɔyu na áyu ébo na abi
ammɔ ƒui
ákunku na ƒula anumi.
4Na ɔ́si bati kuuku uwi ƒui ni,
ukyuli biala útenu
ku nwuna kɔtu
iye ɔnu ku nwuna lɛnumi
ka Unwoti bamba ɔdi ɔkya aani ƒula kalɛ
na uukpó teete bekyuli
bani na béti bana anu ƒui básia-nwu lɛlɔ lɛni.
5Bekyuli bani ƒui na béti bana kayi ƒaa baabla lɛbuni
na beenyimo taasia ƒula lilu
lɛlɔ ni,
aayu teebo teebebunku-ma.
Nsu uwi ɔni na búsie anumi na bɔɔbla alaekpidi
na bɔɔta teenye ƒula lilu lɛlɔ ni,
éti kɔnyi ákya-bu.
Na dɛ na bɔdubɔsɔ bɔbla na bɔkɛ bɔƒɔ?
6Bula ƒui bɔ́ƒiɔ na buuuse sɛɛn.
Na lɛla lɛbuni lɛni na bɔɔnu ka bɔɔbla muedi ni,
lɛ́dɔli aani adikpi ani muusé lɛlɔ.
Bula ƒui bɔ́yɛyɛ aani livete lɛnudi.
Na bula alaekpidi énwini
aani ɔƒɛƒɛɛ
na ada-bu eebó taavinku.
7Ukyuli ndi ukyuli ɔsɔ
ulákpali-ɔ lɛnyi
iye unye kpakplaa ute-ɔ,
ɔsika ábɛla-bu ƒula anumi.
Na bubie kani náƒɔ-bu keliela ƒui
na bɔɔyii udu na bula alaekpidi ammɔ ɔsu.
8Nsu ni, Unwoti awɔ ndi bula ɔti.
Lɛvɔti na abu bɔdi na awɔ ndi ɔvɔne ɔmmɔ.
Ɔsika bula ƒui ƒula enu kabla na bɔdi.
9Unwoti, teti kɔnyi takya-bu tetulo kalɛ na ɔ́manku.
Na sɔ tenyimo bula ekpidi eteesienku ƒui.
Mmomu ni, Ati, bɔɔkpali-ɔ
ka anu-bu kɔnyana,
ɔsika awɔ ɔdi kani na bula
ƒui bɔdi.
10Ƒula lɛma linengudi lɛni na
áƒuna ése sɛsɛɛ ƒui
línwini ketele kalɔ kakwiidi.
Sion únwini kalɔ kakwiidi
na Yerusalem ɔsɔ ɔɔɔdi
kesii kani madia lɛla
lɛdi bɔbla.
11Na bula kakpakɔ kedee kani muukeye
na bula bati kuuku
bátaakpa-a ni,
bákya-ka ogya bákyula.
Na ala ani náƒɔ-bu kuye geen ƒui
áyii udu atɛ kalɔ na asɔ eeebo lɛblakula.
12Ati, ala ani ƒui na awɔ ɔlati aanu mɛni kama ni,
bulie na adubɔsɔ elie kpoo ataanu na alakya-bu kenye?
Na ani-bu kɔtu mmomu avili?
Currently Selected:
Yesaia 64: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
