Yesaia 38
38
Hesekia Ɔ́nu Ɔlɛ
1Uwi ɔmmɔ kemmo ni, Ɔga Hesekia úbo uuƒi ɔlɛ kpakplaa ɔdi ɔni na ubu bli na ukpi. Amu na Amos ubidi Kenye Udiene Yesaia úsie utánu-nwu, na ɔ́su-nwu ɔnini, “Unwoti ɔnii klibi ƒula kaduli ala ƒui se, ɔsika adubo bukpi na aaadubo bɔta ɔlɛ ɔni na eeƒi.”
2Mmɔ na Hesekia úti nwuna anumi ɔ́tina kowodu na ɔ́kpali Katɔti ɔ́su ɔnini, 3“Unwoti, nyimo ka lɛ́bla ala siin na ulu lɛlɔ na ƒula anumi. Na líti mina kayi lɛnɔ lɛ́sia awɔ lɛti lɛlɔ. Na lɛ́kya ɔkplu ka lɛ́bla lɛla lɛni na aayɔ́.” Ɔmmɔ kama úsie kalɔ uuwulo momoomo. 4Ɔmmɔ kama linyesia lɛdi lɛ́si Unwoti kudɔ líbo Yesaia kudɔ ɔnini, 5“Sie na atásu Hesekia anini, ‘Lɛni na Unwoti ɔni ndi ƒula ɔti Dawid Katɔti ɔɔsu. Línu ƒula bɔkpali ku keku kani na éwulo ku imii. Na ndubuti akwa leevu-alɔ libunku ƒula ngba emeyi. 6Na ndubukpo lɛƒɔ awɔ ku Yerusalem ɔma unengudi ɔmɛni lɛlɛku Asiriaƒuɔ ɔga enu kemmo.’
7“Na likposela lɛni na adubuti anu ati ka Unwoti ɔdubo lɛla lɛni na ɔ́su bɔbla ni, ani ndi lɛla lɛni na ɔ́su ɔnini,
8“ ‘Ɔyuli ɔni na ɔƒɛ ɔmmɔ bulii buuboku
na Ɔga Ahas kakɔkɔ ubili ɔni na ɔ́tu mmɔ lɛlɔ ni,
ndubɔya na ɔyuli ɔmmɔ udi usie kama lɛgba leevu.’ ”
Na mmɔ mmɔ ni, ɔyuli ɔmmɔ údi úsie kama lɛgba leevu lɛmmɔ.
9Uwi ɔni na Ɔga Hesekia ɔ́ta nwuna ɔlɛ ɔni na uuƒi ni, únweni bumwi etemila adi ɔnini,
10“Lɛ́kali ka uwi ɔni na mina ngba búle ntɛ ni,
líduo kekpine lɛ́wɔlɔ
na nsɔ lɛɛɛdubo mina ngba emeyi akladi bɔnu.
11Na lɛ́su nnii nsɔ lɛɛɛdubo Unwoti ɔni nli ngba bɔnu
na bayawine bani nli ngba akɔ.
Na nsɔ lɛɛɛdubo bekyuli bayawine badi lɛnɔ bɔnu,
ɔsika nsɔ lɛɛɛdubo-ma akɔ bɔkya na kayawi kamɛni kemmo.
12Lɛ́nu ka mina ngba bɔdubo liku bɔda
aani kevo kani na báda bágyu
na báƒɛ kevo adi ammɔ,
iye aani kɔdi kɔni na békulo bédie bedine kevo.
Na ɔ́bla-mi aani Unwoti bɔwɔlɔ na ɔdaku-mi.
13Líwulo usien umodi na
muunú ɔlɛ
aani gyata mɔɔbwɛ-mi lɛlɔ ekubi.
Na ɔ́bla-mi aani Unwoti náda-mi ngba uudie.
14Mina lɛdi lɛ́sani, na lɛsɔ lilalɛ
aani lɛsɛɛmɛɛ mɔɔva,
na muudumo aani abloduma.
Mina anumi asɔ alanu kaduɛ,
anwuɔsu lɛ́kɔliku anumi mɔɔnu katɔ.
Ala eekpóku-mi,
O Unwoti, bo na ebebunku-mi.
15Bi na mbo na masu ka
Unwoti ɔlati nábla ɔmɛni.
Bɔkɛ kani na ndubɔkɛ nteekpuulo ku ɔlɛ bunu
wetédu mina kawɔlɔkɔ,
na mina kɔnyana kɔmɛni ɔsu.
16O Unwoti, ƒula ablala
ku kenye litemi kemmo na ukyuli ɔɔkɛ́ ngba.
Na mmɔ kani na ami lɛnɔ ndubɔkɛ
mina kɔyu kemmo ngba.
Anwuɔsu muuvele-ɔ nnii bwi-mi
na ásɔku ɔlɔkplu éte-mi.
17Geen ni, ami mina bɔdia
ɔsu na lɛbibo lɛmɛni
líbo-mi lɛlɔ.
Nsu na ƒula lɛƒɔndia ɔsu ni, ánu-mi lɛlɔ,
na áda-mi édie kaƒiɔtɔ
kani mɔɔyila ukyuli udu kemmo.
Na énwini kama ákya mina alaekpidi.
18Ɔsika ukyuli ɔdi ulakana
kaƒiɔtɔ kemmo bɔkya na wemwi-ɔ.
Na baaadubo kekpine mmɔ bɔkya
na bakɛ lɛnunsia lɛdi
na kalɛ na aadi ƒula litemi lɛlɔ
teete bekyuli lɛlɔ.
19Bayawine kani ndubɔkana-a bumwi
aani kalɛ na ndaku bɔbla ɔƒɛni.
Na bebi bati mɔɔsu bana bebi
kalɛ na aadi ƒula litemi lɛlɔ teete bekyuli.
20“Awɔ Unwoti ndubudie-mi,
na bɔdubo-ɔ buteemwi limeyi ndi limeyi
lɛni na buli ngba
na ƒula kakpakɔ kedee ku lɛbentaa.”
21Amu na Yesaia ɔ́su Ɔga Hesekia kabla bablane ɔnini, “Biti kɔnwingyie ebi bodobodo ɔdi na bɛnwu bɛsia-nwu liƒula lɛmmɔ lɛlɔ na ɔdubɔba-nwu.”
22Mmɔ ni, Hesekia úye ɔnini, “Bi ndi likposela lɛni na ndubɔtina ka ndubɔkana na lisie Katɔti kakpakɔ?”
Currently Selected:
Yesaia 38: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
