Hebriƒuɔ 3
3
Yesu Kenyekɔ Ketulo Mose Kadi
1Anwuɔsu ni, banwa kedee bani na Katɔti ɔ́lɔ ka bɛdi Katɔ Ɔga Ɔma ala, biti bina anu bɛsia Yesu ɔni ndi ɔtalane ku ɔkpane unengudi ɔni kenye na buudie lɛlɔ. 2Ɔ́bla ala ulu lɛlɔ úte ukyuli ɔni náƒuna-nwu úse aani kalɛ na Mose ɔ́bla ala ulu lɛlɔ na Katɔti kaduli. 3Yesu ɔ́manku ɔbu útulo Mose aani kalɛ kani na ukyuli ɔni nátu ɔtɔ ɔ́ƒɔ lɛnyi útulo ɔtɔ ɔni na ɔ́tu mmɔ. 4Ɔsika ɔtɔ biala ubo ukyuli ɔni nátu-nwu. Nsu Katɔti nátu lɛla biala.
5Mose ɔ́bla lɛla biala ulu lɛlɔ na Katɔti kaduli aani kabla ɔblane. Na údie ala ani na Katɔti ɔdubo ubasu ɔ́tina. 6Nsu Kristo anwu ni, ɔ́bla ala ulu lɛlɔ aani ubi ɔni ntɔnku Katɔti kaduli. Na abu ndi nwuna ɔtɔ ɔmmɔ si búse kayi na búƒie lɛnunsia lɛni kudu na buubó bɔ́da kpakplaa.
7Anwuɔsu na Katɔti Kɔyu kɔ́su kɔnini,
“Si bínu Katɔti lɛdi ɔmwi ni,
8bitabla atuɔkplu
aani kalɛ na bɛ́bla
uwi ɔni kemmo na bɛ́ta
bínye-mi lɛlɔ na bɛ́kɔku-mi bɛ́nu na ketele mmɔ.
9Mmɔ na bina bati kuuku
bákɔku-mi bánu banii baanu lɛla lɛni mabla
ina ka bánu ala ani na lɛ́bla na akwa aavlene kemmo.
10Ɔmmɔ ɔsu na líti kɔnyi lɛ́kya kaba kammɔ.
Na lɛ́su nnini, ‘Bana kayi ƒui kakɛ ulu bamba lɛlɔ,
na bátanu mina lilu bátati kudii.’
11Anwuɔsu na lɛ́kpali lɛlɔ lɛ́su na mina kɔnyi kemmo nnii
baláni beléde-mi na bakɛ bɔnwuna kudii!”
12Banwa, bɛnu lɛlɔ kemmo kaduɛ kalɛ na ɔdi uleti likpidi kasusu na kayi kemmo na unwini ukyuli ɔni naaaƒɔ taadi na walɛ Katɔti ɔni muute ngba kama. 13Mmomu bɛkya lɛlɔ ogya limeyi ndi limeyi si kadi biala kégye-mii na baalɔ-ka banii ɔmwi. Ɔmmɔ ndubɔya na likpidi lilátɔlɔ ɔdi na wenwini ukyuli ɔni mɔɔbla atuɔkplu.
14Bubo kadikɔ ɔkɛnku Kristo lɛlɔ si búƒie-nwu bɔ́da kpakplaa na búti bula lɛlɔ ƒui bɔ́sia-nwu lɛlɔ útédu kawɔlɔkɔ. 15Lɛni na básu bábavi ɔƒɛni banini,
“Si bínu Katɔti lɛdi ɔmwi ni,
bitabla atuɔkplu
aani kalɛ na bɛ́bla uwi ɔni na
bɛ́ta binye Katɔti lɛlɔ.”
16Na ɔma bene na bɛɛkali ka ama nénu na báta bénye Katɔti lɛlɔ mmɔ? Ɔɔɔdi bekyuli bani ƒui na Mose ɔ́tɔnku ɔ́lɛku Egyipte kalɔ lɛlɔ mmɔ badi yoo?
17Na ɔma bene na Katɔti úti kɔnyi ɔ́kya akwa aavlene sɔɔn mmɔ? Ɔɔɔdi bekyuli bani nábla ala ekpidi na Katɔti ɔ́yila-ma udu na ketele kemmo mmɔ badi yoo? 18Na ɔma bene na Katɔti ɔ́kpali lɛlɔ ɔ́su ka baláni beléde-nwu na bakɛ bɔnwuna si ɔɔɔdi bekyuli bani nétenu-nwu litemi mmɔ? 19Anwuɔsu bɔ́nu bɔ́ti ka ɔni na bátaƒɔ-nwu bátadi ɔsu na bátakana-nwu bɔni bude na bakɛ bɔnwuna.
Currently Selected:
Hebriƒuɔ 3: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
