Esekiel 45
45
Bédie Kalɔ Sɛsɛɛ Bése Unwoti
1Unwoti ɔnini, “Si uwi ɔni na béti Israel kalɔ kammɔ béle béte adua leevu-anyɔ ammɔ ni, ɔlɛka bidie kesii kadi bise sɛsɛɛ bite-mi. Na likpo kedee lɛmɛni bune ɔlɛka bɔbla lɛma inyɔ ntɛ eluku bɔkɔku maane na nwuna bɔbɛbɛ ɔbla eluku aku. 2Mmɔ na mina kakpakɔ kadubunye. Kalɔ kamɛni ntɛ ni, badubɔkɔku lɛgba eti leevu-maatɛ ku lɛgba aavlanyɔ-ɛlɔ. Bɔbɛbɛ ku bune ƒui likeke. Na kalɔ kani kana bɔkɔku bɔdi lɛgba liti ku avlaatɛ-maatɛ ɔ́mana kakpakɔ kalɔ kammɔ ni, kadubuwi ukpludi.
3-4“Na ndubukulo kalɔ kani na bídie bíse sɛsɛɛ mɛni kakɛ kadi kani bune ndi eluku maane úsie eluku atɛ bɔbɛbɛ lite mina bakpane bani mɔɔbla-mi kabla. Na kesii kani nse kedee mɛni ni, badubɔtu bana lɛtɔ benyene ku mina kakpakɔ.
5“Na liti kakɛ kakladi lite Lewiƒuɔ bani muubunku kabla na mina kakpakɔ na mmɔ kani na badubɔkɛ lɛma lɛni kemmo na badubulie.
6“Ɔƒɛni kalɔ kani na bídie bíse sɛsɛɛ mɛni kudɔ ni, bɛda kalɔ bamba kani bune ndi eluku maane úsie eluku anyɔ bɔbɛbɛ biwi mmɔ. Na mɛni kadubɔbla kesii kani na Israelƒuɔ ƒui bakana belie.”
Badubute Israel Lɛlɔ Ɔdine Kalɔ Kadi
7-8Unwoti ɔnini, “Ɔmii ɔni nwi mina ɔmii ɔni na bídie bíse sɛsɛɛ mmɔ ɔƒɛ katukɔ ku ɔƒɛ kanukɔ ku Yerusalem ƒui ɔdubɔbla Israel lɛlɔ ɔdine ɔdi. Na ɔ́si mina kalɔ kawɔlɔkɔ na ɔƒɛ kanukɔ kakɛ útédu Mediterenia Ɛpu ntɛ ku ɔmii ɔni nwi ɔ́si mina kalɔ kammɔ kawɔlɔkɔ na ɔƒɛ katukɔ kakɛ útédu Yordan Ketu ntɛ ƒui ɔdubɔbla anwu ɔdi. Na ɔɔtina ka kalɔ kammɔ bune ɔdubɔbla aani kesii kani na béte adua ammɔ ƒui.
“Na kese kamɛni kadubɔbla lɛlɔ ɔdine biala ɔni melie madi Israel lɛlɔ ɔdi.”
Ɔlɛka Israel Lɛlɔ Badine Basu Litemi Geen Lɛmmɔ
9Unwoti Katɔti ɔnini,
“Amii Israel batɔnkune, bíiyu na bɛ́nya mina kadi bekyuli bɛ́kya uwi útu! Na mɔɔwia ka bɛda ekpidi bɔbla bɛya na bise kalɔ bitaabla ala siin taasiaku ulu lɛlɔ. Na ɔ́sɔ útalɛka binye mina bekyuli lɛlɔ na bɛbɔku-ma na bavi balɛ bana kalɔ lɛlɔ. Ami Unwoti násu.
10“Anwuɔsu ɔ́si ɔƒɛni úsela ni, biti unu ku bumomo akɔkula abuni bitaakɔku ala teete bekyuli. 11Na biti anta lɛkyami bɔkɔku binwini lɛla lɛni biti bitaakɔku edula ebi teete bekyuli. Na ɔsii keyile kenwini lɛla lɛni na biti bitaakɔku nnɔ ku ala ani na beedú taakɔku ala ammɔ udu teete bekyuli. Na ala amɛni ƒui akana na akɔ etédu kangyi keyile.
12“Limeyi lɛyuƒɔla sika ɔƒualadi ubi ɔdubunye ute unu lɛkɔkula. Na sika ɔƒualadi ubi unwi ɔmɛni ɔdubunye egulabi aavlanyɔ kenye. Na sika ɔƒualadi ebi liti ku leevu ndi koƒo kunwi.
13“Israelƒuɔ batɔnkune, bɛya na bekyuli bammɔ bele bana anta ani na bákɛ akpa liti ku leevu na beti lɛkpa linwi beboku-mi aani bana etela. 14Na bele nnɔ bɔni na bákɛ lɛnɔ akpa eti anyɔ na beti lɛkpa linwi beboku-mi. Na nnɔ ɔsii unengudi ɔni na baakɔ́ku ala na badubuti bakɔku bumomo bɔmɛni beboku-mi. 15Kawɔlɔkɔ ni, ukyuli biala na ubo baƒonu eti ene ni, ɔlɛka uti unwi uboku-mi.
“Na etela amɛni ni, adubunwini adila bɔsia lɛkpabi lɛlɔ teete-mi kalɛ na kaƒɔ kayɔ-mi na bevele kusɛ kusɛ basiku-mi kudɔ. Na akpala amɛni adubɔyɔ ami Unwoti kaƒɔ na liti mina bekyuli ekpidi lɛkyiɛ-ma.
16“Israel kadi bekyuli ndubuti etela amɛni beboku-ɔ. 17Nsu kɔbuli kɔwɔdi bɔlɛ emeyi bɔdi ku Lɛnwunameyi ku emeyi kedee bamba bɔdi ni, amii batɔnkune bammɔ na ɔlɛka bite bebuo bani na badubuti babla akpala ammɔ. Na amii kani ndubute kamu ku antabi udu biala ku ntɛ bɔni na badubuti babla akpala ammɔ. Na ala amɛni ƒui na badubuti babla adila bɔsia lɛkpabi lɛlɔ teete-mi ku ekpidi lili buvele ku unwi bɔbla akpala ku kalɛ na bevele kusɛ kusɛ basiku-mi kudɔ. Na ɔmɛni ɔdubɔyɔ-mi kaƒɔ na liti mina bekyuli ekpidi lɛkyiɛ-ma.”
Kalɛ Na Ɔlɛka Badi Emeyi Buni
18Unwoti ɔnini,
“Na kɔbuli kudeedi kɔni baalɔ Abib iye Nisan na Hebri lɛdi kemmo limeyi lideedi lɛlɔ ni, ɔlɛka beti ɔmantɛ akɔ ɔkɔdi ɔni na útasɔ kesii kadi badu babla akpala na babla kakpakɔ kammɔ sɛɛn. 19Na ɔkpane ɔmmɔ uti ebuo ɔmmɔ ubugya ɔdi ɔkwaa kakpakɔ kammɔ kɔyakun ligyii lɛmmɔ lɛlɔ ku lɛkpabi lɛmmɔ lɛƒɛnyi ine bɔmmɔ ƒui. Na ɔkwaa ɔban kɔyakun kɔni na baasia teeduo kakpakɔ kaduli geen kani nkya-ka kemmo mmɔ ligyii lɛlɔ.
20“Na ɔdi ka babla limeyi bɔdi ablala amɛni na kɔbuli kɔmmɔ limeyi maatɛdi lɛnɔ lɛlɔ. Ɔmmɔ ɔdubɔya na si ukyuli ɔdi ɔ́bla likpidi lɛdi na tati tati kemmo iye likpidi lɛmmɔ líyu-nwu lɛ́tu ni, na liti lɛkyiɛ-nwu kalɛ na kakpakɔ kammɔ kedee.
21“Na ɔ́si kɔbuli kudeedi kɔmɛni limeyi leevu-linedi lɛlɔ ni, ɔlɛka ukyuli biala use kalɔ ku Kukpi Lili Bɔvia limeyi bɔdi utálɛ limeyi maatɛdi lɛlɔ. Na bodobodo ɔni kemmo na bátakya bɔnyii na ukyuli biala ɔdubɔdi. 22Na limeyi lideedi lɛlɔ ni, ɔtɔnkune ɔmmɔ ɔdubuti ɔmantɛ akɔ uboku na bakpa aani anwu ɔlati ekpidi lili buvele ku bekyuli bammɔ ƒui ekpidi lili buvele. 23Na limeyi biala na emeyi amɛni bɔdi kemmo ni, ɔdi ka uboku ɔmantɛ bakɔ maatɛ ku baƒonu maatɛ na beti babla akpala ani ndubɔyɔ-mi kaƒɔ. Na uboku ese lɛnɔ na beti-nwu babla ekpidi lili buvele akpala. Na ɔdi ka banu ka bebuo bamɛni ƒui ɔdi útasɔ na kesii kadi. 24Na ɔdi ka uboku edula ebi ɔlaaƒɔ akyami aani leevu ku nnɔ lɛsii ine na beti bakpa ku ɔmantɛ akɔ unwi ku koƒonu kunwi biala.
25“Nvo kemmo bɔkya emeyi bɔdi bɔdubuse kalɔ na kɔbuli maatɛdi kɔni baalɔ na Hebri kemmo banii Tisri iye Etanim limeyi leevu-lɛlɔndi lɛlɔ. Na badubɔdi limeyi lɛmmɔ lɛni laa emeyi maatɛ. Na bebuo bani kani na úboku ku atabi ku ɔlaaƒɔ ku nnɔ bumomo bɔmmɔ kani na ɔdi ka uboku na beti babla akpala ammɔ.”
Currently Selected:
Esekiel 45: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
