Esekiel 41

1Ɔmmɔ kama bútéduo kakpakɔ ɔtɔ geen kemmo na ɔnana ɔmɛni ɔ́kɔku ɔtɔ ɔmmɔ kayakun. Na bɔbɛbɛ bɔdi lɛgba leevu, 2na bɔkuku bɔdi lɛgba leevu-maatɛ. Na ɔtɔ ɔmmɔ ɔlati ɔdi lɛgba liti ku leevu-maane. Na ɔ́si kayakun mmɔ úsie kowodu kudɔ ubo lɛgba maane ɔvi ɔni ku ɔni.

3-4Ɔnana ɔmɛni úsie útédu ɔtɔ ɔmmɔ kawɔlɔkɔ ƒui na ɔ́su-mi ɔnini, “Si ávia kayakun kamɛni ni, ésela kesii kani ndi kakpakɔ katɔma kedee.” Ɔ́ka kayakun kammɔ bɔkɔku na bɔbɛbɛ bɔdi lɛgba lɛgba ɛtɛ na bɔkuku bɔdi lɛgba leevu. Na ɔ́si kayakun mmɔ úse kowodu kudɔ ɔvi ɔni ku ɔni ubo lɛgba leevu-inyɔ. Ɔmmɔ kama ɔ́kɔku katɔma kedee kammɔ na ubo lɛgba avlaatɛ-ine ɔƒɛni unwi ɔkladi lɛnɔ lɛni kani.

Lɛ́nu Kakpakɔ Ala Kesekɔ

5Ɔnana ɔmmɔ ɔ́kɔku kakpakɔ kowodu kɔmmɔ na nwuna bugbigbli bɔdi lɛgba leevu. Na bátu ala kesekɔ bámana kowodu kɔmadi lɛlɔ na nwuna bɔbɛbɛ ubo lɛgba maatɛ. 6Katu taamana kɔtɛ na ɔdi. Na bɔmana biala bɔda lɛtɔ avlaatɛ. Na bátu lɛtɔ wɛlɛ lɛmɛni básia atabi kɔlɛkɛ kɔni ndanku awodu ammɔ lɛlɔ na bátatu ala kusekɔ kɔmɛni bátakya awodu ammɔ kemmo. 7Kakpakɔ awodu ammɔ égbigbli na kalɔ kakɛ utulo katɔ kakɛ, anwuɔsu ala kusekɔ kɔni nkya katɔ kemmo kúwi kutulo kɔni nkya kada kakɛ. Na ubo kɔnyakɔ kanyakɔ ɔ́si bamana budeedi ku unyɔdi útédu ɔtɛdi lɛlɔ.

8Kakpakɔ kammɔ ɔlati kenye atabi ɔka ɔni nákuku lɛgba leevu lɛlɔ. Na ɔmmɔ kani ndi ɔka ute ala kusekɔ lɛtɔ lɛmmɔ lɛnɔ. 9Ala kusekɔ lɛtɔ lɛmmɔ awodu amadi égbigbli lɛgba maane na lɛla lɛdi liiibo awodu ammɔ ntɛ. 10Na ɔtɔ ɔni nákpɛ úde kakpakɔ kamɛni bɔgyu bɔdi lɛgba avlaatɛ-ine. 11Kayakun kenwi kani na adubɔsia étéduo ala kusekɔ kɔni nkya kusie kakpakɔ kammɔ katɔ kakɛ kemmo. Na kabambadi lɛnɔ kakya késie ala kusekɔ kɔni nkya kakpakɔ kammɔ kada kakɛ kemmo. Na lɛtabi ɔka ɔni lɛlɔ na kakpakɔ kammɔ kenye kábɛbɛ kávia késie kama lɛgba maane úbo ɔ́vi ala kusekɔ awodu amadi ammɔ.

12Ɔmmɔ kama ni, lɛ́nu ɔtɔ bamba ɔdi ka unye na nwuna anumi aatina kakpakɔ kammɔ ɔƒɛ kanukɔ kakɛ. Nwuna bɔbɛbɛ ubo lɛgba eti anyɔ ku leevu-maatɛ na úne lɛgba eti atɛ na awodu ammɔ butigbli ɔdi lɛgba maane.

13Ɔnana ɔmmɔ ɔ́kɔku kakpakɔ kammɔ na nwuna bune ubo lɛgba eti atɛ ku aavlanyɔ. Amu na úsie útákɔku kakpakɔ kammɔ kowodu kɔmadi ɔ́vi kaduli kani nwi kakpakɔ kama mmɔ úsie útédu ɔtɔ ɔni nnye ɔƒɛ mmɔ kowodu kama na ubo lɛgba eti atɛ ku aavlanyɔ. 14Kalɔ ƒiaa kani nwi kakpakɔ kaduli geen kammɔ anumi ku lɛƒɛnyi ƒui bɔkɔku lɛnɔ bubo lɛgba eti atɛ ku aavlanyɔ.

15Kawɔlɔkɔ ni, ɔnana ɔmmɔ ɔ́kɔku ɔtɔ ɔni nnye ɔƒɛ kanukɔ mmɔ bune ku lɛtɔ lɛni na mma lɛƒɛnyi inyɔ bɔmmɔ na ɔmmɔ lɛnɔ ubo lɛgba eti atɛ ku aavlanyɔ.

Kalɛ Na Bábla Kakpakɔ Kemmo

Kakpakɔ kammɔ lɛgbanya kemmo awodu ku kesii kani ndi ɔtɔ keliekɔ geen ni, 16ligyii sɔɔn na bákana bámana awodu ammɔ lɛlɔ ku kalɔ ƒui útédu ƒansili. Na kayakun ku lɛƒansili wɛlɛ wɛlɛ lɛmmɔ ku lɛtɔ lɛni na lɛƒɛnyi ni, baakana na beebi-ni ligyii lɛmmɔ. 17Na kalɛ na béti ligyii bákana bámana awodu ammɔ lɛlɔ ni, kayakun katɔ kani na ɔ́wɔ. Na bákya awodu ammɔ akya geen 18-20ku ala ani na bánwi na bebweyi badi mbo avwi udu kenye na bánwi ebo udu bényene-ma ntɛ. Na bebweyi bani mbo avwi mɛni bebo anumi lɛtɔtɔ ku kama. Ukyuli anumi aanu ebo ani bényene mmɔ kakɛ kenwi na gyata anumi lɛnɔ aanu ebo ani nnye ɔvi unyɔdi. Na bánwi ala amɛni bákya ligyii lɛkanadi lɛmmɔ kemmo na awodu ammɔ lɛlɔ ɔ́ka ɔ́ma lɛtɔ inyɔ lɛmmɔ kemmo.

21Na kakpakɔ kammɔ kayakun ugyii ɔni bákya kesii kani geen ndi ɔtɔ keliekɔ ni, nwuna bɔnu kemmo use aani adaka gyɔlɔɔ ɔni mbo lɛƒɛnyi ine.

Bábla Ugyii Lɛkpabi

Na kayakun kani néti késela kakpakɔ katɔma kedee kemmo ni, lɛla lɛdi linye na ɔɔtina aani 22ugyii lɛkpabi. Ɔ́kuku lɛgba ɛlɔ na nwuna bune ku bɔbɛbɛ ƒui bɔdi lɛgba ine ine. Na akpa ani nda nwuna lɛƒɛnyi ine bɔmmɔ na ɔda kalɔ aani ɔka ni, ligyii na béti bábla-ni. Mmɔ na ɔnana ɔmmɔ ɔ́su-mi ɔnini, “Ɔmɛni mɔɔtina ka Unwoti ɔɔsia nwuna kakpakɔ kammɔ anu uwi ndi uwi.”

Kakpakɔ Kɔkalɛkɔ

23Kakpakɔ ɔtɔ geen ɔmmɔ ku kakpakɔ katɔma kedee ƒui ni, ubo kɔlɛmikɔ lɛvi inyɔ. 24Na kɔlɛmikɔ kɔmɛni kubo ntɛ bule ɔni na bakana na báƒɛ-nwu basia ɔkpanadi lɛlɔ. 25Na ɔtɔ keliekɔ geen kammɔ kɔlɛmikɔ kɔmmɔ lɛlɔ ni, bánwi bebweyi ku avwi ku ebo udu básia aani kalɛ na bábla na awodu ammɔ lɛlɔ na ɔtɔ kemmo. Na asa na adubuduo ɔtɔ kemmo kayakun anumi kesii kani ndi lɛgbanya mɛni ni, ligyii na béti bébi mmɔ. 26Na lɛgbanya awodu ammɔ ni, lɛƒansili lɛkya na bánwi bebweyi ku avwi bammɔ ku ebo udu bákya ani lɛnɔ akya.

Currently Selected:

Esekiel 41: lef

Highlight

Copy

Compare