Esekiel 37

Bekyuli Ekubi Ani Nátɔ Ásɔ Énwini Ébo Ngba

1Na uwi ɔdi kama ni, lɛ́nu lɛ́ti ka Unwoti ɔyikun ɔ́ƒɔ-mi lɛlɔ kemmo ƒui na nwuna Kɔyu kúti-mi kúsienku kɔwɛ kɔdi kemmo na kesii kadi na bekyuli ekubi éyii tɛtɛɛtɛ mmɔ. 2Unwoti úti-mi ɔ́vinku mmɔ bene ƒui. Na ka lɛ́sia anumi lɛ́nu ni, lɛ́nu ka bekyuli ekubi akwiidi áƒɔ kesi kesii. 3Na úye-mi ɔnini, “Esekiel, ɔyawine ubi, ekubi amɛni adubɔsɔ akana na enwini ebo ngba?”

Mmɔ na lídie kenye nnini, “Unwoti Katɔti, awɔ lɛti kani ndubɔkana lɛmɛni ani kenye budie.”

4Amu na ɔ́su-mi ɔnini, “Su ekubi akwiidi ammɔ anii, ‘Binu lɛla lɛni na Unwoti ɔɔsu-mii! 5Ami Unwoti Katɔti ndubuti ɔƒɛƒɛɛ lɛkya-mii kemmo na bɛsɔ bibelie ngba. 6Na ndubɔya na ɔlɔna ku nti ɔsɔ ubama-mii lɛlɔ na lɛnwuna ngba ɔƒɛƒɛɛ lɛnya-mii lɛlɔ kemmo. Na bɛdubɔnu bɔti ka ami ndi Unwoti.’ ”

7Lɛ́bla lɛla lɛni na Unwoti ɔ́su-mi. Na asa na ndubɔwɔlɔ ni, líse kalɔ muunú kɔku kɔdi aani kalɛ na ala adi eekuonku lɛlɔ. Na lɛ́nu ka ekubi ammɔ aasála lɛlɔ! 8Na lɛ́nu ka ɔlɔna ku nti ɔɔma ekubi ammɔ lɛlɔ. Nsu ngba buuubo-ma tɔ kemmo.

9Amu na Unwoti ɔ́su ɔnini, “Esekiel, ɔƒaani ni, su ɔƒɛƒɛɛ anini, ‘Unwoti uudie lɛdi teete-ɔ ɔnii kpo si lɛƒɛnyi ƒui lɛlɔ na anwuna ngba ɔƒɛƒɛɛ akya bekpine bamɛni kemmo kalɛ na basɔ benwini bebelie ngba.’ ”

10Mmɔ kani ka lɛ́su lɛni lɛ́wɔlɔ ni, ɔƒɛ úkpo ɔ́vi bekyuli bamɛni kemmo na bénwini bébo ngba! Na bana ƒui báta bénye na bemomo geen kalɛ na babla bekpone lisu bonwu lɛdi.

11Ɔmmɔ kama Unwoti ɔ́su ɔnini, “Esekiel, Israel kadi bekyuli bese aani bekpine. Baadɔ taasu banii bákwii bakɛ aadi bekpine ekubi na basɔ beeebo ngba lɛnunsia lɛdi bete uwi ɔni ndubo. 12Anwuɔsu su-ma anini, ‘Ami Unwoti Katɔti muusé kenye ka ndubɔlɛmi bina kɔƒiɔtɔ na lite-mii bɔnwuna. Na ndubɔsɔku-mii liboku Israel kalɔ lɛlɔ. 13Na si uwi ɔni na ɔmɛni ɔ́lɛ lɛni ni, na bɛnu bɛti ka ami ndi Unwoti. 14Mina Kɔyu kɔdubɔya na ɔƒɛƒɛɛ ɔsɔ uduo-mii lɛlɔ kemmo na bɛsɔ bibelie ngba. Ami Unwoti násu. Ndubɔsɔku-mii liboku bina ɔma na bɛti ka lɛ́di mina linyese lɛlɔ. Ami Unwoti násu.’ ”

Yuda Ku Israel Básɔ Básala

15Unwoti ɔnini,

16“Esekiel, ɔyawine ubi, wia ugyii ɔdi na enweni asia-nwu lɛlɔ anini, ‘Yuda lɛga kadikɔ.’ Na asɔ awia ugyii bamba na enweni asia-nwu lɛlɔ anini, ‘Israel lɛga kadikɔ.’ 17Ti ligyii inyɔ bɔmɛni eli danku lɛlɔ na ɔbla aani ugyii unwi. 18Na si ƒula bekyuli béye-ɔ lɛla lɛmɛni kalɔ ni, 19na asu-ma anii, ‘Ami Unwoti ndubo Israel ku Yuda ligyii inyɔ bɔmɛni bɔsala bɔda mina kɔnu kemmo na bana inyɔ benwini bekyuli benwi.’

20“Da ligyii inyɔ bɔmɛni na kesii kani na ukyuli biala ɔnu-ni 21na asu-ma anii, ‘Ami Unwoti Katɔti ndubo Israel bekyuli bɔsala na lɛkpanku-ma baƒɔ kɔlɔ lɛlɔ kesii kani na belie ɔƒɛni liboku ɔma. 22Ndubo-ma bɔbla na benwini kalɔ kenwi kadi bekyuli na belie Israel kalɔ lɛlɔ. Na ɔga unwi kani ndubo-ma lɛlɔ bɔdi na bɔsɔ baaadubo lɛlɔ kemmo bule bɔbla kɔlɔ akpa anyɔ kudii. 23Basɔ baaadubo baƒiɔ bɔkpa na bataabla ala ani ndubɔya na naaakana-ma bɔƒɔ aani mina bekyuli. Ndubɔƒɔ bana ekpidi lidie-ma lɛlɔ ƒui na babla sɛɛn. Na ndubo-ma bɔgyumana bɔsiku lɛla biala na mɔɔyá na beesé-mi lɛlɔ kudɔ. Na benwini mina bekyuli na ami lɛnɔ linwini bana Katɔti.

24-25“ ‘Na ɔga biala na badubɔƒuna ɔdubɔsi mina kabla ɔblane Dawid ɔtɔ kemmo, na ɔdubo-ma lɛlɔ bɔnu aani baƒonu ɔdane buni kalɛ. Israel kadi bekyuli badubɔdi mina litemi lɛlɔ siin na basɔ balálɛ-mi kama. Na ama ku bana bawɔ bawɔ badubulie ɔmii ɔni na líte mina kabla ɔblane Yakob kemmo aani kalɛ kani na bana banana bábla. 26Na líse kenye kpakplaa ka ndubute Israel kusɛ kusɛ na belie ku keyi buɛɛ kani udu nsɔ naaadubo bɔsa lɛnɔ kudii. Ndubo-ma bɔgyumana na lɛya na babla kadi bekyuli bani ndubɔkɛ ɔyikun geen. Na mina kakpakɔ kadubunye Israel uwi ndi uwi. 27Ndubulie mina kadi bekyuli akɔ na lɛbla bana Katɔti.

28“ ‘Kalɔ lɛlɔ kadi biala bekyuli badubɔnu ka mina kakpakɔ kenye Israel, na ami náƒuna-ma ka babla mina kadi bekyuli.’ ”

Currently Selected:

Esekiel 37: lef

Highlight

Copy

Compare