Esekiel 20

Israelƒuɔ Bámu Benye Baata Teenye Unwoti Lɛlɔ

1Na akwa maatɛ kama ka béƒie Ɔga Yekonia ku abu bakladi aani batɔntɛne kalɛ bésienku Babilon ni, Israelƒuɔ batɔnkune badi bébo-mi kudɔ na kɔbuli kɔlɔndi limeyi leevudi kemmo. Bébelie kalɔ na béye-mi bénu si Unwoti ubo linyesia lɛdi ute-ma. 2Mmɔ kani na Unwoti ɔ́su-mi ɔnini,

3“Esekiel, ɔyawine ubi, batɔnkune bamɛni bébo banii bebenu si mbo lɛla lɛdi na masu-ma, nsu ɔni na nli uwi ƒui mɛni ni, lɛɛɛdubo-ma kenye biala udu budie bute.

4“Esekiel, énu kalɔ ka esie atálɛ-ma kpakplaa? Amu ya na benyimo bana bati kukuuku ekpidi ani na bábla na eesé-mi lɛlɔ mmɔ.

5“Na asu-ma ka ami Unwoti Katɔti náƒuna Israel ɔ́si kukuuku ka benwini mina kadi bekyuli. Na lídie lɛlɔ lɛ́tina bana bati kuuku na Egyipte kalɔ lɛlɔ na líse kenye kpakplaa líte-ma ka ami ndubɔdi bana ama ku bana bawɔ lɛnɔ Katɔti. 6Na líse kenye ka ndubudie-ma lɛlɛku Egyipte kalɔ lɛlɔ na lɛtɔnku-ma lisienku ɔmii ɔni na lɛ́ɛƒuna líse lɛlɔ. Na kalɔ kammɔ kadi kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii teetulo kɔlɔ kɔkladi ƒui. 7Lɛ́su-ma nnii bebo baƒiɔ bani na bada baavínku na beesé lɛlɔ mmɔ bevaakun na bada Egyipteƒuɔ baƒiɔ bammɔ bene bɔkpa baya. Na línyimene-ma lɛnɔ ka ami ndi Unwoti Katɔti ɔni kani nátɔnku-ma mmɔ. 8Nsu ɔmmɔ ƒui kama ni, bámu báta bénye-mi lɛlɔ. Na béni banii baaadubo-mi litemi bunu na kadi bamba ala anwidi ku avɔdi baƒiɔ bɔkpa bɔmmɔ lɛlɔ kani na benye.

“Ɔmmɔ ɔsu na lɛ́kɛku-ma kɔnyi geen na lɛ́lɛ ugyii ka nka mɔɔní-ma kɔtu na Egyipte kalɔ lɛlɔ mmɔ. 9Nsu lɛ́nu ka si lɛ́bla lɛni ni, ɔmmɔ ɔdubɔtina aani si ɔkɔ ɔnyine na ndi, ɔsika bana anumi na líse kenye ka ndubo-ma bɔkpanku bɔlɛku Egyipte kalɔ lɛlɔ. 10Anwuɔsu na lɛ́ya na bálɛ mmɔ na lɛ́tɔnku-ma lísienku kalɔ kakwiidi kammɔ kemmo. 11Lɛ́tina-ma mina ɔda bubo kalɛ na bati kalɛ na belie ngba ulu lɛlɔ siin. 12Na lɛ́su-ma kpakplaa nnii bataadi Lɛnwunameyi lɛmmɔ kaduɛ kalɛ na batina lɛlɔ ka bese kedee na ami badi na badi. 13Nsu Israelƒuɔ báta bénye-mi lɛlɔ na ketele kalɔ kakwiidi kemmo mmɔ. Na béni banii baaadubo-mi litemi bunu na badi mina ɔda bubo ku ala ani mɔɔtina-ma mmɔ lɛlɔ. Na baabla Lɛnwunameyi lɛmmɔ kalɛ kalɛ aani limeyi keeke bamba biala kalɛ.

“Mmɔ na lɛ́lɛ ugyii ka nka mɔɔyila Israelƒuɔ bammɔ ƒui udu na kalɔ kakwiidi kemmo mmɔ kɔnakunwi kani na ɔsa. 14Nsu ɔmmɔ lɛnɔ ami ɔla kɔƒa na kɔdi. Ɔsika kadi bamba bekyuli pii bánu ka ami nákpanku Israelƒuɔ lɛ́lɛku Egyipte kalɔ kemmo. 15Na ɔmmɔ ɔsu ni, lɛ́su-ma na kalɔ kakwiidi kemmo mmɔ nnii lɛɛɛdubo-ma bɔtɔnku busienku kalɔ kani kenye na líse-ma mmɔ lɛlɔ, kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii mmɔ. 16Na ɔɔɔdi ɔni na béni na baládi mina ala ani na lɛ́tina-ma ku mina ɔda bubo lɛnɔ lɛti pɛ ɔsu. Mmomu ka bákya mina Lɛnwunameyi kɔƒa na baakpá baƒiɔ ɔsu.

17“Nsu bana lɛlɔ lɛ́sɔ lɛ́bla-mi kɔnyana ka lɛya na bekpi na kalɔ kakwiidi kammɔ kemmo lɛni. 18Anwuɔsu na lɛ́lɛ bana bebi bammɔ kpakplaa nnii ama batalɛ bana bati na basiaku bana ɔbladu buɛ ɔmmɔ kama iye bakpa baƒiɔ lɛnɔ. 19Línyimene-ma ka ami kani ndi bana Unwoti Katɔti ɔni ndanku-ma mmɔ na ɔdi ka benu-mi ala bɔtina na badi mina ɔda bubo lɛlɔ. 20Lɛ́su nnii bataabu mina Lɛnwunameyi na ɔtina ka badi mina bekyuli ɔ́si kuuku na ami lɛnɔ ndi-ma Unwoti Katɔti ɔ́si kukuuku. 21Nsu bana bebi lɛnɔ báta bénye-mi lɛlɔ. Na béni banii belenu mina ala bɔtina ku ɔda bubo lɛlɔ na badi-mu lɛlɔ. Na baabla mina Lɛnwunameyi kalɛ kalɛ aani limeyi keeke biala kalɛ.

“Amu na ḿbeti kɔnyi geen na lɛ́su kpakplaa nnii ndubo-ma kɔtu bɔni na kalɔ kakwiidi kammɔ kemmo mmɔ. 22Nsu ńtabla ńtasiaku lɛni. Ɔsika nka ɔmmɔ ɔdubɔbla-mi kɔƒa na kadi bekyuli bani nánu-mi ka lɛ́kpanku Israelƒuɔ lɛ́lɛku Egyipte kalɔ kemmo. 23Anwuɔsu na lɛ́kanku mina lɛlɔ kpakplaa ka ndubo Israelƒuɔ bugyingya bɔkya kadi bamba bekyuli akɔ na kalɔ kammɔ ƒui lɛlɔ, 24ɔsika béni na bátadi mina ɔda bubo ku ala bɔtina lɛlɔ na bákya mina Lɛnwunameyi kɔƒa na bakya baakpá kadi bamba baƒiɔ bani na bávɔ mmɔ. 25Líte-ma ɔda bubo kpakplaa bɔni ndanku kɔtu bɔni na lɛla lɛni nebunku-ma na bakɛ ngba kenye. 26Na lɛ́ya na baabla akpala ani nátamanku na beeti bana bebi bananabi bedeedi muedi taakpa. Nsu lɛ́bla-ma ala amɛni kalɛ na liƒu lɛƒɔ bana keliela ƒui kemmo na bati lɛnɔ ka ami Unwoti mɔɔní-ma kɔtu.

27“Esekiel, su Israelƒuɔ anii lɛni na bana bati kuuku lɛnɔ béni-mi na bédumi-mi 28na uwi ɔni na béteeti akpala ku oloƒui ku ntɛ teete baƒiɔ lidu na abi ammɔ lɛlɔ na egyii enengudi ammɔ kalɔ. Na lɛ́kɛ kɔnyi geen, ɔsika ɔmii ɔni na líti líte-ma lɛlɔ na baabla ala amɛni udu! 29Mmɔ na líye-ma línu kesii kani na bátákpa baƒiɔ bammɔ na bédie kenye banini, ‘Baƒiɔ kɔdu.’ Na bamu baalɔ kesii kani na baakpá baƒiɔ bamɛni banii aƒiodu.

30“Ɔmmɔ kama ni, ye Israelƒuɔ lɛla lɛni ɔsu na basiaku bana bati kuuku ulikplu ɔbladu ɔmmɔ kama, 31na baakpá baƒiɔ na beeti ama alati bana bebi taabla akpala teete baƒiɔ bammɔ. Ala ekpidi amɛni udu na benye baabla na basɔ baakali ka bebenu-mi kenye kadi. Nsu ɔni na ndi Unwoti Katɔti na nli uwi ƒui mɛni ni, lɛɛɛdubo-ma kenye kadi budie bute. 32Baakali ka badubuti lɛlɔ benwini aani kadi bamba bekyuli na bataakpa ala ani na béti ligyii ku atabi bánwi na balɛ-mi enu sɛɛn na balákɛ kɔtu bɔni. Nsu ɔkɔ na ɔdi batatɔlɔ lɛlɔ!

Unwoti Úse Kenye Ka Ɔdubɔya Na Israel Ɔsɔ Ubese Kalɛ Na Úse

33“Ɔni na ami ndi Unwoti Katɔti ɔni na nli ngba uwi ƒui ɔsu ni, ndubo-mii lɛlɔ bɔdi ku ɔyikun kpakplaa. Na bɛdubo mina kɔnyi ala bɔbla bɔnu. 34Na bɛdubo mina ɔyikun lɛnɔ bɔnu bɔti si uwi ɔni na lɛ́sala-mii lɛ́siku kesii biala na bígyingya bɛkya. 35Na ndubo-mii bɔkpanku busienku kalɔ kakwiidi lɛlɔ kesii kani na kadi bamba bekyuli lidu lidu badubɔka bamana-mii. Na ami ku-mii bɔdubɔsa anumi ku anumi. Na nwuna kama na lɛtɛku-mii litemi na lɛdu-mii kɔtɔ. 36Na ndubo-mii kɔtu bɔni kalɛ kani na lɛ́ni bina bati kuuku kɔtu na kalɔ kakwiidi kemmo kesii kani nde Egyipte kalɔ. 37Ndubo-mii lɛlɔ bunye kpakplaa na bɛdi ɔda bubo bɔni nkɛnku lɛla kedee lɛni na búnyimi lɛlɔ. 38Ndubo bekyuli bekpidi bani mɔɔta teenye bekyuli lɛlɔ bule bɔsiku bina bakladi kudɔ. Nsu ina ka ndubo-ma bɔkpanku bɔsiku kesii kani na bákpanku-mii bésienku aani bekyuli beƒiedi kalɛ muedi ni, lɛɛɛdubo bɔya na beduo Israel kalɔ lɛlɔ. Na mmɔ na bɛdubo-mi bɔnu bɔti ka ami ndi Unwoti.

39“Amii Israelƒuɔ bɛsɔ binye bina baƒiɔ bɔkpa lɛlɔ kani, ɔsika lɛɛɛdubo bɔya na binye biteedie-mi lɛlɔ ɔbu na biteeti etela teete baƒiɔ bammɔ lɛni, ɔsika biiibo lɛla bamba lɛdi na bɛƒuna bite lɛlɔ utulo ka binu-mi litemi! 40Na si limeyi lɛmmɔ lídu ni, ukyuli biala na Israel ɔdubo-mi bɔkpa na Sion Kɔbi kedee kɔmmɔ lɛlɔ na Yerusalem. Na ndubɔsɔ lɛlɔ-mii mina kadi bekyuli na ndubɔƒɔ bina akpala ku etela ani ndubɔbla kedee mmɔ. 41Na uwi ɔni na ndubo-mii bɔkpanku bɔsiku kesii kani na bígyingya bɛkya liboku ɔma ni, bina ala adubɔda-mi kubiti na bina ala ani na bɛdubo bɔkyula bute-mi ɔnyi lɛnɔ ɔdubɔbla-mi ƒɛƒɛɛ. Na kadi biala bekyuli badubɔnu ka nsi kedee. 42Amii lɛnɔ bɛdubo bɔnu bɔti ka ami ndi Unwoti ɔni nákpanku-mii úboku Israel ɔmii ɔni kenye na lɛ́su bina bati kuuku líse. 43Mmɔ na bɛdubo bina alaekpidi ku kalala kani na bɛ́bla bunyimo na bina lɛlɔ lɛdubo-mii lɛlɔ buse na kɔbɔ ala ani na bɛ́bla na aladia bɔnu munu munu ɔsu. Na ɔmmɔ ɔsu na bítamanku ka lɛƒɔ-mii, 44anwuɔsu na bɛ́manku kɔtu bɔni. Nsu ndubo-mii buti bɔsiaku ulu ɔdi lɛlɔ kalɛ na ɔkɛnku ɔmmɔ ɔsu na bekyuli beti ɔbu bete-mi. Na ɔmmɔ ɔdubɔya na bɛti ka ami ndi Unwoti Katɔti.”

Katɔti Ɔdubɔya Na Ogya Ubebile Ala

45Unwoti ɔnini, 46“Esekiel, ɔyawine ubi, nwini anumi tina kada kakɛ na ete aku ani nwi mmɔ bɔti kpakplaa 47anii ami Unwoti Katɔti ndubo ogya ɔdi bɔtu bɔkya lɛku lɛmmɔ na ɔkyula kugyii kɔwɔdi ku kɔkwiidi biala. Na lɛla lɛdi lɛɛɛdubo ogya ɔmmɔ bɔkana bunine. Na ɔdubo bɔkywi busie katɔ kakɛ na ɔkyula lɛla biala na kesii kani na ɔ́sia úsela mmɔ. 48Ukyuli biala ɔdubo bɔnu bɔti ka ami náya na ogya ɔmmɔ ɔɔda lɛni na ɔdi biala ulakana-nwu kenye bukulo.”

49Nsu lɛ́kya unyeƒi na lɛ́su nnini, “Unwoti Katɔti, naaayɔ ka lɛbla lɛla lɛmmɔ udu! Bekyuli ƒui baasu ɔ́si kukuuku banii muuƒú-ma taakya ku mina linyesia lɛni na muuti teeboku-ma.”

Currently Selected:

Esekiel 20: lef

Highlight

Copy

Compare