Esekiel 14

Esekiel Ɔ́kya Bekyuli Bammɔ Ogya Ka Basɔku Lɛlɔ Bete Unwoti

1Limeyi linwi ni, Israel kadi batɔnkune badi bébo-mi kudɔ bébeye-mi si Unwoti ubo kenye kadi ute-ma. 2Na uwi ɔni na bakya-mi kudɔ mmɔ ni, Unwoti ɔ́su-mi ɔnini,

3“Esekiel, ɔyawine ubi, bekyuli bamɛni béese kalɔ baakpá baƒiɔ ina ka bagyi nwaa ka ɔmmɔ adubɔya na beduo ekpidi pii bamba bɔbla kemmo. Anwuɔsu líni nnii lɛɛɛdubo-ma kenye kadi bɔkya! 4Su Israel kadi bekyuli anini, ‘Si baaƒiɔ́-mi na bana baƒiɔ bɔkpa kemmo asa na básɔ báta bésie kenye udiene ɔdi kudɔ banii betéye-nwu si mbo kenye kadi nte-ma ni, ndubo-ma kenye kani na bana ekpidi ani na bábla bɔ́manku búte. 5Na si bénu-mi kenye kamɛni ni, ɔƒɛni kalɛ badubo kasusu bɔsɔku bɔbla na bada baƒiɔ bammɔ bɔkpa baya na benwini bebo-mi kudɔ.’

6“Ɔƒɛni ni, Esekiel, su Israelni biala anini, ‘Ami ndi Unwoti Katɔti. Bɛda bina baƒiɔ bani muusé-mi lɛlɔ mmɔ bɔkpa bɛya.

7“ ‘Si amii Israelƒuɔ iye baƒɔ bani na bakya-mii kudɔ ɔdi úni-mi na úse kalɔ ɔɔkpá baƒiɔ ɔmmɔ kama na ɔ́sɔ úsie kenye udiene ɔdi kudɔ ɔnii mina kenye kadi na ɔɔwia unu ni, kenye kani na ndubo-nwu budie ndi ka 8ndubo bunwini bunye bɔsiaku-nwu na liti-nwu linwi lɛla lɛni na bakladi bani makali banii ama lɛnɔ baabla lɛni banu batɛya. Na ukyuli ɔmmɔ ɔsɔ ulabla mina kadi bekyuli akɔ unwi. Na ɔdubɔnu ɔti ka ami ndi Unwoti Katɔti na ɔ́bla likpidi ɔ́ƒiɔ-mi sɔsɔ.

9“ ‘Si kenye udiene ɔdi ɔ́su ɔkɔ kenye kadi ni, ami náya na ɔ́nyi ɔkɔ. Nsu ina amu ni, ndubuni-nwu na likulo kɔna kɔni nkya anwu ku mina kadi bekyuli ntɛ. 10Na ukyuli biala ɔni mesie kenye udiene ɔmmɔ kudɔ ɔnii utáƒɔ mina linyesia lɛdi lɛnɔ ni, ndubo-nwu kɔtu kɔmmɔ udu kani bɔni. 11Ɔsika mɔɔwia ka binwini bibo-mi kudɔ na bɛsɔ bilayila lɛlɔ udu na ekpidi ani muusé-mi lɛlɔ mɛni bɔbla kemmo. Anwuɔsu binwini bibo-mi kudɔ! Na lɛbla bina Katɔti na amii bɛbla mina kadi bekyuli. Ami Unwoti Katɔti muusé-mii kenye kamɛni.’ ”

Unwoti Ɔ́tɛku Kadi Bani Mɔɔbla Likpidi Kɔtu

12Unwoti ɔnini, 13“Esekiel, ɔyawine ubi, si úbo úte ka kadi ƒui bekyuli badi báƒiɔ-mi ni, ndubo-ma kɔtu bɔni na bana edula áyii udu na lɛ́ya na kɔka kɔ́du bekyuli bammɔ ku bana bebuo ƒui. 14Ina Noa ku Daniel ku Hiob bakya kalɔ kammɔ kemmo ni, kalɛ na basiaku-mi kama siin ɔɔɔdubo kalɔ kammɔ bɔƒɔ, mmomu ama alati kani ndubɔkɛ bɔƒɔ.

15“Na lɛnɔ ni, ndubɔkana na lɛni kadi bekyuli badi kɔtu si báƒiɔ-mi na lɛya na beƒiebuo beduo-ma lɛlɔ na bakun-ma na babɔku belusiene bani ƒui nkɛ mmɔ kalɛ na kalɔ kammɔ ƒui kenwini kalɔ kakwiidi kani kemmo lɛla lɛdi liiibo. 16Na muusé kenye ka ɔni na ami Unwoti nli uwi ƒui mɛni ni, ina nkyuli ɛtɛ bani na lɛ́su mɛni bakya mmɔ ni, bana babi muedi balákɛ bɔƒɔ. Na nkyuli ɛtɛ bammɔ ama badubulie ngba, nsu kalɔ kammɔ aka kadubɔyii udu kenwini kalɔ kakwiidi.

17“Na lɛkana na limene bekisine bekpone na bebekpo ɔmii ɔni bekyuli mɔɔbla ekpidi mmɔ na badu bekyuli bammɔ ku bana bebuo ƒui. 18Na si nkyuli ɛtɛ bamɛni bakya mmɔ ni, bana bebi muedi ɔdi ulálɛ-nwu kemmo, mmomu ama alati kani.

19“Na kɔnyi kɔkana na kɔkɔ-mi na lɛya na ɔlɛ ukpidi ɔkyula kadi bani náƒiɔ-mi mmɔ bekyuli ku bebuo ƒui. 20Na lɛni kani na si Noa ku Daniel ku Hiob bakya mmɔ ni, ami Unwoti muusé kenye ka bana bebi muedi badubo bukpi na balákɛ bɔƒɔ.

21“Ami ndi Unwoti Katɔti na muusé kenye ka ndubo Yerusalem kɔtɔ bɔni geen. Ndubo bɔya na kekpo ku kɔka ku lɛlɛ likpidi ku beƒiebuo bebo babadu bekyuli ku bebuo bammɔ ƒui. 22Na bani na bétekpi na ɔgbankpi ɔmmɔ kemmo ni, ndubo bɔya na bakpanku-ma batɔlɔku mmɔ aani bekyuli beƒiedi beboku Babilon kalɔ lɛlɔ mɛni. Na awɔ Esekiel ɔlati adubɔnu ati lɛla lɛni ɔsu na lɛ́bla Yerusalem ala amɛni ƒui si banii ánu alaekpidi ani udu na baabla taaƒiɔ-mi. 23Na ɔdubo-ɔ bɔbla nwaa na atunaku-mi ka lɛla lɛni na ami Unwoti Katɔti lɛ́bla lɛdi ulu lɛlɔ.”

Currently Selected:

Esekiel 14: lef

Highlight

Copy

Compare