Israelƒuɔ Bɔlɛ 38

Batu Akpala Bɔkyula Lɛkpabi

1Na ɔ́bla akpala bɔkyula lɛkpabi ku akasia kugyikɛ na nwuna bune bɔdi lɛgba maatɛ ku kakɛ na nwuna bɔbɛbɛ bɔdi lɛgba maatɛ ku kakɛ na nwuna bɔkuku bɔdi lɛgba ine ku kakɛ. 2Na ɔ́nwi bebuo ese ɔ́lɛ ekpo ene ammɔ ƒui na ana ƒui adanku lɛlɔ ábla lɛla linwi. Na úti abuala egyiedi ɔ́kwa-nwu lɛlɔ. 3Na ɔ́vɔ akyami ku soƒi ku ogya akyami ku kɔbuɛlɛmii lidu lidu. Na ala amɛni ƒui abuala egyiedi na úti ɔ́vɔ-nya. 4Na úti abuala egyiedi na ɔ́bla lɛla lɛni kemmo na ntɔ bɔdubo butaalɛ ɔ́kya lɛbi lɛmmɔ kalɔ na ɔ́kuku úbedu-ni nte bule. 5Na ɔ́bla kɔkwɛnimi ine ɔ́da ntɔ lɛƒɔla lɛmmɔ atu ene ammɔ kalɛ na ɔdia na beti ligyii bavinku-nwu kemmo. 6Na ɔ́nwi akasia ligyii na úti abuala egyiedi ɔ́kwa-ni lɛlɔ. 7Na úti ɔkya kɔkwɛnimi kɔmmɔ kemmo kalɛ na ɔdia na bataagyu lɛkpabi lɛni bábla ku kugyikɛ na liƒi lɛtɛ-nwu kemmo mmɔ.

Bávɔ Lɛlɔ Bɔƒɔ Lɛkyami

8Amu na úti beleku bani mɔɔbla kabla na kasakɔ kedee kayakun kenye mmɔ abuala egyiedi kanu ɔ́vɔ lɛkyami bonwu lɛdi ku nwuna ɔka.

Katɔti Kevo Kaduli

9Ɔmmɔ kama ni, ɔ́bla kaduli ɔ́kya kevo kammɔ. Na úti aduni kpɛtɛ kpɛtɛ abuni geen ɔ́ƒala ɔ́mana úti úsie kada kakɛ. Na nwuna bune bɔdi lɛgba eti atɛ (150). 10Na akpa aavlanyɔ ammɔ ku ana aka ƒui adi abuala egyiedi ku sika ɔƒualadi abalala na úti ligyii aavlanyɔ lɛni na úti abuala egyiedi ɔ́kwa-nya lɛlɔ ɔda-nwu lɛlɔ. 11Katɔ kakɛ lɛnɔ kadi lɛgba eti atɛ (150) ku nwuna abuala egyiedi akpa aavlanyɔ ku ana ɔka ku sika ɔƒualadi abalala.

12Na ɔƒɛ kanukɔ ni, ɔdi lɛgba liti ku aavlanyɔ-ɛlɔ na aduni leevu aƒa akpa leevu ammɔ ku ana ɔka lɛlɔ ku sika ɔƒualadi abalala. 13Na kawɔlɔkɔ kani nésie ɔƒɛ katukɔ kakɛ ni, ɔdi lɛgba liti ku aavlanyɔ-ɛlɔ. 14Na aduni ani bune ndi lɛgba aavlanyɔ-inyɔ nƒa kayakun kammɔ ɔvi unwi ku akpa atɛ ani nnye ana ɔka lɛlɔ. 15Lɛni kani na kayakun ɔvi unyɔdi lɛnɔ aduni lɛgba aavlanyɔ-inyɔ ku kakɛ bune bɔƒa ku akpa atɛ ani nnye ana kalɔ ɔka lɛlɔ. 16Na aduni ani ƒui nƒa ámana kaduli kammɔ adi adi abuni kpɛtɛ kpɛtɛ ani na bédi ku unwo ɔƒualadi. 17Na ligyii lɛmmɔ ɔdi biala kalɔ ɔka ɔdi abuala egyiedi. Na akpa ammɔ abalala ani ƒui nda-nya lɛlɔ adi sika ɔƒualadi.

18Na kaduli kammɔ kayakun aduni ni, unwo buluu ku ugyiedi ɔni náƒɔ kuye geen na béti bédi-nya. Na ana bune bɔdi lɛgba avlaatɛ na bɔbɛbɛ bɔdi lɛgba maatɛ ku kakɛ aani kaduli kammɔ aduni akladi kalɛ. 19Na ligyii lɛmmɔ libo ine ku nina abuala egyiedi ɔka ine. Na akpa ammɔ eli ku abalala ani nda-nya lɛlɔ adi sika ɔƒualadi. 20Na Adi Kevo ku kaduli kammɔ ewele ani nda-nwu ámana adi abuala egyiedi.

Katɔti Kevo Atula

21Amɛni ndi Katɔti Bunyimi Kevo atula ani na Lewiƒuɔ bénweni ɔkɛnku Mose ɔda bubo kenye na ɔkpane Aaron ubidi Itamar ntɔnku-ma. 22Na Besaleel ɔni ɔti ndi Uri ɔni ɔti ndi Hur ɔni nási Yuda kaba kemmo nábla lɛla biala na Unwoti úbo ɔda. 23Na ubunkune ɔni baalɔ banii Oholiab ɔni ndi Ahisamak ubidi na ɔ́si Dan kaba kemmo na ɔdi enu kabla lidu ɔblane ni, ɔgyi bɔtaa ku adi buluu ku egyiedi kpɛtɛ kpɛtɛ ani náƒɔ kuye geen budi. 24Na akpala ani bekyuli bammɔ béte na bákɔliku katɔ bébo kudu béte Unwoti na ɔdi sika ugyiedi bumomo bɔdubɔbla aani edula ebi aƒo leevu unu.

25Na sika ɔƒualadi ɔni na kadi bammɔ bekyuli bani na báka mmɔ béyii ɔdi edula ebi aƒɔ avlaatɛ ku kakɛ unu. 26Na kuyii kɔni na báda béte ukyuli biala na báka mmɔ ɔdi edula ebi ɔɔƒɛɛ blii keyile unu. Na banana bani náaƒɔ akwa aavlanyɔ ku kama na báka-ma bumomo bɔdi nkyuli mpim eti leevu-anyɔ ku ɛtɛ ku eti leevu-unwi (603,550) 27Na sika ɔƒualadi edula ebi aƒo avlaatɛ ku kakɛ unu ɔni ndi bɔkɔku talento eti anyɔ ɔmmɔ, na béti bábla kevo kammɔ ku akpa ammɔ kalɔ ɔka eti anyɔ ammɔ. Na ɔka biala ɔda talento unwi ɔni ndi edula ebi akyami aavlanyɔ-ɛtɛ. 28Na sika ɔƒualadi ɔni nébu na wabla aani edula ebi akyami leevu-ɛlɔ unu ni, Besaleel úti ɔ́bla akpa ammɔ kɔkwɛnimi kɔbaladi ku aduni ani mɔɔbala akpa ammɔ eli ku lɛlɔ.

29Na abuala egyiedi akpala ani bákɔliku katɔ bébo kudu béte Unwoti mmɔ unu ɔdi edula ebi aƒo aavlanyɔ ku kakɛ unu. 30Na anwu na béti bábla kalɔ ɔka béte Kevo Kasakɔ kayakun ku abualagyie lɛkpabi lɛmmɔ ku nina abualagyie ntɔ kaƒɔkɔ kammɔ ku kana lɛlɔ ablala ƒui 31ku kaduli kammɔ akpa ammɔ ku kana kaduli kammɔ kayakun ku ewele ani nda kevo ku kaduli kammɔ ámana ƒui. Ligyii lɛni nda ɔtɔ ɔmmɔ kemmo ku kama.

Currently Selected:

Israelƒuɔ Bɔlɛ 38: lef

Highlight

Copy

Compare