Israelƒuɔ Bɔlɛ 3

Mose Ɔ́nu Ka Kugyii Lɛƒoƒo Lɛɛda

1Limeyi lɛdi ni, Mose úti ulekudi ɔti Yetro baƒonu ku bese úsienku kadikɔ na ketele ɔgyu na bédu Katɔti kɔbi kɔni baalɔ Horeb kudɔ. 2Mmɔ na Unwoti ɔtu ɔdi ɔ́da ɔ́lɛ-nwu lɛlɔ aani ogya ɔni mɔɔda na kugyii lɛƒoƒo lɛdi lɛlɔ. Na Mose ɔ́nu ka lɛƒoƒo lɛmmɔ lɛɛda, nsu lɛla biala lilakywi. 3Amu na Mose úye lɛlɔ ɔnii, “Bi akɔla adi mɛni? Bi ɔsu na ogya ɔɔda lɛƒoƒo lɛmɛni kemmo, nsu lɛla biala lilakywi? Ndubusie ntánu.”

4Amu ka Unwoti ɔ́nu ka Mose ɔ́kpɛ uudé ogya ɔmmɔ kudɔ ni, údie lɛdi ɔ́lɛku ogya ɔmmɔ kemmo na ɔ́kpali-nwu ɔnii, “Mose! Mose!”

Na Mose údie kenye ɔnii, “Ati, aanu-mi mɛni.”

5Amu na Katɔti ɔ́su Mose ɔnini, “Da ƒula lɛgbanvuo die! Ɔsika kalɔ kedee lɛlɔ na enye.” 6Na Katɔti ɔ́su Mose ɔnini, “Ami ndi ƒ'ɔti Katɔti ku Abraham Katɔti ku Isak Katɔti ku Yakob Katɔti.” Na ka Mose ɔɔyia ka wanu Katɔti ɔsu ni, ɔ́bɛla nwuna anumi.

7Amu na Unwoti ɔ́su Mose ɔnini, “Lɛ́nu kalɛ na Egyipteƒuɔ bakya baanya Israelƒuɔ taakya ku kalɛ báya na beebó abi. Na muunú bana keku kani beewulo taawia ukyuli ɔni mekpo maƒɔ-ma malɛku bana lɛbibo kemmo. 8Na ɔmɛni ɔsu na lɛ́yu líbo ka mbedie-ma lɛlɛku Egyipteƒuɔ enu ku bana kalɔ kammɔ kemmo. Na lɛya na betélie kalɔ kani na kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii. Na kalɔ kammɔ na Kanaanƒuɔ ku Hetiƒuɔ ku Amoriƒuɔ ku Perisiƒuɔ ku Hewiƒuɔ ku Yebusiƒuɔ belie. 9Geen ni, línu keku kani na Israelƒuɔ beewulo na mɔɔnu kalɛ na Egyipteƒuɔ benye-ma lɛlɔ na baanya-ma taakya. 10Anwuɔsu mɔɔtala-a ɔƒɛni na eteesie Ɔga Ƒarao kudɔ. Na etédie mina bekyuli bani ndi Israelƒuɔ alɛku Egyipte kalɔ lɛlɔ.”

11Amu na Mose ɔsu Katɔti ɔnini, “Ami ndi ɔma, na muusié nténye Ɔga Ƒarao anumi nnii mɔɔkpanku Israelƒuɔ lɛlɛku Egyipte kalɔ lɛlɔ?”

12Amu na Katɔti údie Mose kenye ɔnini, “Ndubulie-ku-ɔ. Na likposela lɛni na ndubɔtina-a ka ami nátala-a sɔsɔ ndi ka si ákpanku-ma álɛku mmɔ áwɔlɔ ni, amii Hebriƒuɔ bɛdubo-mi bɔkpa na kɔbi kɔmɛni lɛlɔ.”

13Amu na Mose úye Katɔti ɔnii, “Na si banii lísie ńténye Israelƒuɔ anumi na lɛ́su-ma nnii, ‘Bina bati kuuku Katɔti nátala-mi ɔ́kya-mii’ na béye-mi banii, ‘Dɛ na baalɔ-nwu’ ni, bi na nsu-ma?”

14Amu na Katɔti ɔ́su-nwu ɔnini, “Si béye-ɔ mina lɛnyi ni, na asu-ma anii, ‘Ami baalɔ Ami Ndi Ami.’ Na asu-ma ka ‘Ami Ndi Ami nátala-mi ɔ́kya-mii.’ ”

15Na Katɔti ɔ́sɔ ɔsu Mose ɔnini, “Su Israelƒuɔ anini, ‘Bina bati kuuku Abraham Katɔti ku Isak Katɔti ku Yakob Katɔti nátála-mi ɔ́kya-mii.’ Na lɛnyi lɛmɛni na mɔɔdi úsela uwi ƒui na ani na bina bawɔ bawɔ badubuti beteenyimo-mi ɔ́si kaba úsie kaba.”

16Ɔ́sɔ ɔ́su-nwu ɔnii, “Sie na atálɔ Israel atɔƒi benengu ƒui asala na asu-ma anii, ‘Unwoti ɔni ndi bina bati kuuku Abraham ku Isak ku Yakob Katɔti nédie lɛlɔ ɔ́tina-mi ɔnini, lɛ́nu kalɛ na Egyipteƒuɔ baabla-mii kalala. 17Na líse kenye ka ndubɔda-mii lidie lɛbibo lɛmmɔ kemmo na Egyipte kalɔ lɛlɔ, na liti-mii ntése kalɔ kani kemmo na Kanaanƒuɔ ku Hetiƒuɔ ku Amoriƒuɔ ku Perisiƒuɔ ku Hewiƒuɔ ku Yebusiƒuɔ beli, kesii kani kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii.’

18“Si ásu-ma etemila amɛni ni, mina bekyuli badubo ƒula litemi buti. Na ɔmmɔ kama ni, na eti Israelƒuɔ benengu bammɔ ada na bisie Egyipteƒuɔ ɔga kudɔ na bɛsu-nwu bɛnini, ‘Unwoti ɔni ndi Hebriƒuɔ Katɔti údie lɛlɔ ɔ́tina-bu. Anwuɔsu te-bu kuƒi na buti emeyi atɛ busie ketele kemmo na butábla akpala bute bula Unwoti Katɔti.’ 19Nsu ngyi ka Egyipteƒuɔ ɔga ɔɔɔdubo bɔtuna, si ɔyikun ubendi ɔdi útebedi-nwu asa na unu kalɔ. 20Anwuɔsu ndubudie mina kɔnu lɛtina Egyipteƒuɔ na lɛni-ma kɔtu na akɔla lidu lidu budie bɔtina kemmo. Na ɔmmɔ kama ɔdubɔtuna na bɛtɔlɔ.

21“Ndubɔya na Egyipteƒuɔ beti ɔbu bete-mii kalɛ na si uwi ɔni na bina bekyuli badubo bɔtɔlɔ ni, belesie ku enukplu. 22Na kaduli biala uleku ku bani na beli-ma kudɔ ƒui badubuvele bana liku bekyuli na bete-ma lɛwu ku sika ugyiedi ku ɔƒualadi na beti ala ammɔ bakya bana bebi belekubi ku bananabi. Na lɛni bɛdubɔbla na biti Egyipteƒuɔ akɛla bɛtɔlɔku.”

Currently Selected:

Israelƒuɔ Bɔlɛ 3: lef

Highlight

Copy

Compare