Israelƒuɔ Bɔlɛ 23
23
1“Ukyuli ɔdi utegyingya ɔkɔ etemila. Na ɔdi utenye ɔlalane kama utedie kenye utete-nwu ulu ukpidi lɛlɔ.
2“Na tasiaku bekyuli bumomo kama na atábla likpidi. Na si eedie lɛla lɛdi kenye na litemi katɛkɔ ni, tanu bekyuli bumomo anumi na enwini litemi geen lɛmmɔ. 3Tanu ɔwabane anumi tatɛ litemi na litemi katɛkɔ.
4“Na si ánu ebuo ala utine ɔni na ɔdi ƒula ukisine ɔdi ka úkulo kabuli ni, na asɔku-nwu esienku-nwu. 5Na si etila na ánu ka étulo-nwu na úbuli ni, na ebunku-nwu na ɔta.
6“Tebulo ɔwabane litemi bɔtɛ siin na litemi katɛkɔ. 7Ɔkɔ kenye kani na báda básia ukyuli ɔdi ni, teti litemi lɛmmɔ tabla kabla na adu ukyuli buni kɔtɔ anii badu-nwu, ɔsika lɛɛɛdubo litemi ɔtɛne ukpidi ɔmɛni ubo bute na ɔlɛ kɔtu bɔni kemmo.
8“Na ɔdi utaƒɔ egulabi na bɔbɛ kemmo, ɔsika ala ammɔ udu aabwɛ bekyuli bani mɔɔnu anumi na balátɛ litemi siin.
9“Na bitabla ɔƒɔ kalala, ɔsika amii alati bɛgyi ɔlɛ bunu bɔni nkya kaƒɔ bulie kemmo uwi ɔni na bɛ́kya Egyipte.
Lɛnwunameyi Lɛlɔ Ɔda Bubo
10“Biti akwa aku bɛtuma na bɛva bina edula, na bide bina lɛla biala na bɛ́va. 11Na lɛkwa maatɛdi lɛlɔ ni, bɛya na kalɔ kammɔ kanwuna. Na ɔdi utede lɛla lɛni nákwɛ-ka kemmo. Nsu bawabane bebo kuƒi ka badi lɛla biala na lɛ́kwɛ mmɔ. Na bebuo lɛnɔ bebo kuƒi ka badi edula ani nébu-ka kemmo. Lɛni kani na ɔlɛka bɛbla bina adingyii ku ebo mmo lɛnɔ.
12“Biti emeyi aku bɛbla bina kabla na bɛnwuna limeyi maatɛdi lɛlɔ. Kalɛ na bina baƒɔ ku bekyuli bani mɔɔbla kabla teete-mii ku bina bebuo muedi lɛnɔ bakɛ bɔnwuna.
13“Bɛsia anumi na bɛdi ɔda biala na líbo-mii lɛlɔ. Bitakpali baƒiɔ biala bitawia bana kebunku, na bitalɔ ɔdi lɛnyi muedi.
Bɛdi Limeyi Kɔtɛ Na Lɛkwa Kemmo
14“Kɔtɛ na ɔlɛka bɛdi limeyi na lɛkwa kemmo bite-mi.
15“Bɛdi Bodobodo Ɔni Néteƒu Limeyi emeyi maatɛ. Na bɔnyii butakya bodobodo ɔmmɔ kemmo aani kalɛ na líbo-mii ɔda. Na bɛdi limeyi lɛmmɔ na Abib kɔbuli kɔni kemmo lɛ́lɛ ugyii lite-mi kemmo, ɔsika kuna kemmo na bɛ́tɔlɔ Egyipte kalɔ lɛlɔ.
“Ɔdi biala utebenye-mi anumi ku enukplu.
16“Bɛdi Edula Bɔƒɛ Limeyi ku edula edeedi ani na bɛ́ƒɛ bɛ́siku bina mmo bɔni na bɛ́tuma.
“Na si uwi ɔni na bɛɛsála-nya teewi unwu ku kesekɔ bamba lidu ƒui kemmo ni, na bɛdi Edula Bɔsala Limeyi.
17“Ɔlɛka banana ƒui bebenye Katɔti Ɔyikune Ƒui anumi kɔtɛ na lɛkwa kemmo.
18“Biteti lɛla biala kemmo na bɔnyii bɔkya bitebunku ubugya akpala ani na bíti biite-mi lɛlɔ.
“Na bebuo bani akpala na bɛ́bla bíte-mi na emeyi atɛ amɛni kemmo ni, bɛnu ka kadi kétegye ɔdi lɛmwi lɛlɔ.
19“Biti edula edeedi abuni ƒui ani bɛ́kɛ na kalɔ kammɔ kemmo biboku ami, bina Unwoti Katɔti kakpakɔ.
“Biteƒulo ese ubi ɔdi lɛna na uni anyi ntu kemmo.
Katɔti Ɔtu Ɔdubo Bɔklibi Ulu Ute-mii
20“Bɛnu! Ndubo bɔtala mina ɔtu na ɔgyu ɔtɔ-mii, na anwu ndubo-mii bɔgyumana na ulu lɛlɔ, na uti-mii utéduoku kesii kani lɛ́klibi líse-mii. 21Binu ɔtu ɔmmɔ litemi biala lɛni na ɔdubo-mii bɔsu. Na ɔdi utata utenye-nwu lɛlɔ, ɔsika ami nátala-nwu. Na si ɔdi ɔ́ta únye-nwu lɛlɔ ni, uleti ulakyiɛ-nwu, ɔsika mina lɛnyi lɛlɔ na ɔkɛ. 22Nsu si bínu ɔtu ɔmmɔ litemi na bɛ́di mina ɔda ɔni líbo-mii lɛlɔ ni, ndubo bina bekisine bukpoku bute-mii. 23Na mina ɔtu ɔdubo bɔgyu bɔtɔ-mii, na ɔtɔnku-mii utéduoku Amoriƒuɔ ku Hetiƒuɔ ku Perisiƒuɔ ku Kanaanƒuɔ ku Hewiƒuɔ ku Yebusiƒuɔ kalɔ kemmo. Na ndubo-ma bɔbɔku budie mmɔ. 24Na bitakya lili kalɔ bitete bana baƒiɔ na bitaabla-ma kabla, na bitasiaku bana ɔbladu kama lɛnɔ. Ɔlɛka bɛbwɛ bana baƒiɔ ku bana atabi kedee ammɔ ƒui kpɛtɛ kpɛtɛ. 25Bɛkpa ami bina Unwoti Katɔti lɛti pɛ, na mina kusɛ kusɛ ɔdubo-mii bɔsiaku na bɛkɛ bɛdi na bɛkɛ bɛni. Na ndubo ɔlɛ biala bɔda budie bina akɔ. 26Na uleku biala ulénwini udinkɔ na bina akɔ iye ubile kaƒɔ. Na bɛdubo ngba bulie na bɛbi lɛlɔ geen asa na bikpi.
27“Ndubo mina liƒu ala butaabla na bina anumi na lɛya na kadi bekyuli bani nkya kɔlɔ kɔmmɔ kemmo ƒui beƒu babla susuusu, na lɛya na ama bani ndi bina bekisine mmɔ benwini kama bakya-mii na bekeli batɔlɔ. 28Na ndubo bɔya na bebweyi bani mɔɔta geen batɔ-mii anumi na batábɔku Hewiƒuɔ ku Kanaanƒuɔ ku Hetiƒuɔ ɔlɛku bina ulu lɛlɔ. 29Na lɛɛɛdubo ɔmɛni bɔbla na lɛkwa linwi kemmo si ɔɔɔdi lɛni kalɔ kammɔ kadubo bɔsɔ buwi ukpludi na beƒiebuo bemomo-ka kemmo bavili. 30Mmomu ndubo-ma butaabɔku blii blii úti útédu ka bímomo bɛ́ƒɔ kalɔ kammɔ ƒui lɛlɔ.
31“Na ndubo bɔya na bina lɛmii lise kalɔ lɛsiku Ɛpugyie kɔtu útédu Mediterenia Ɛpu kenye. Na ɔsɔ ɔsi ketele kemmo útédu Euƒrate Ketu kenye. Na ndubuti bekyuli bani nli kalɔ kammɔ kemmo lɛkya-mii enu kemmo, na bɛbɔku-ma bɛlɛku bina anumi. 32Na amii ku bekyuli bammɔ iye bana baƒiɔ ni, bitenyimi lɛla lɛdi bitete lɛlɔ. 33Bitete kuƒi na bekyuli bammɔ belie-mii kudɔ, si ɔɔɔdi lɛni ni, badubo bɔya na bɛbla likpidi na mina anumi, ɔsika si bɛ́kpa bana baƒiɔ ni, ɔdubunwini kakpagyuɛ na kedie-mii.”
Currently Selected:
Israelƒuɔ Bɔlɛ 23: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
