Israelƒuɔ Bɔlɛ 20
20
Katɔti Ɔda Bubo Leevu
1Amu na Unwoti ɔ́ka ɔda bubo etemila leevu amɛni ɔ́su ɔnini,
2“Ami ndi bina Unwoti Katɔti ɔni nédie-mii ɔ́lɛku Egyipte kalɔ lɛlɔ kesii kani nka bénye-mii lɛlɔ na bɛɛbla bana kabla.
3Bitese benwoti badi bitebunku-mi lɛlɔ.
4Bitavɔ iye bɛnwi lɛla lɛni nálɛ ala ani nkya kayaa iye kalɔ lɛlɔ iye ntu bɔni na kalɔ kemmo na bitaakpa. 5Na tebo kalɔ takya baƒiɔ badi lili kalɔ iye akpa ɔdi. Ɔsika ndi bina Unwoti Katɔti ɔni muukpó kɔgyulo, na mɔɔní bekyuli bani muukisi-mii kɔtu ɔ́si bati ku bebi lɛlɔ útédu kaba katɛdi ku kenedi lɛlɔ. 6Nsu mɔɔbla lɛƒɔndia teete nkyuli ɛlɛ ɛlɛ bani mɔɔyɔ́-mi na baadi mina ɔda bubo lɛlɔ.
7Takpali Unwoti ƒula Katɔti lɛnyi keeke. Ɔsika Unwoti ɔdubɔni ukyuli ɔni mɔɔlɔ-nwu lɛnyi keeke kɔtu.
8Se Lɛnwunameyi likpo, na abla-ni kedee. 9Emeyi aku na ɔlɛka eti abla ƒula kabla. 10Nsu limeyi maatɛdi ndi ami Unwoti ƒula Katɔti Lɛnwunameyi lɛni kemmo na útalɛ ka abla kabla kadi, awɔ iye ƒula bebi iye ƒula kabla bablane iye ƒula bebuo iye ɔƒɔ ɔni nlie-ɔ kudɔ. 11Ɔsika emeyi aku kemmo na Unwoti údie katɔ ku kalɔ ku ɛpu ku ala ani nkya-nya kemmo, nsu ɔ́nwuna limeyi maatɛdi lɛlɔ. Anwuɔsu Unwoti údie Lɛnwunameyi sɛsɛɛ na úte-ni kusɛ kusɛ.
12Bu ƒ'ɔti ku ƒ'ini na adubulie ngba gyɔlɔɔ, na keyi kayɔku-ɔ na kalɔ lɛlɔ, kalɔ kani na ami Unwoti ƒula Katɔti ndubuti lite-ɔ.
13Tadu ukyuli.
14Tadi kɔsɔnɔ.
15Teyu.
16Tada ukyuli ɔdi kenye.
17Taya na anumi egyie-ɔ na ƒula ukyulikpana kaduli lɛlɔ. Na taya na anumi egyie-ɔ na ƒula ukyulikpana ulekudi, iye nwuna kabla ɔblane ɔnanabi iye ulekubi, iye nwuna ɔmantɛ bakɔ iye nwuna bebuo ala betine iye nwuna lɛla biala na ubo lɛlɔ.”
Liƒu Lɛ́da Israelƒuɔ
18Amu ka bekyuli bammɔ bénu kalɛ na katɔ keedu, na kaabwɛ ogya, na kakpɛɛ lɛnɔ kaaku, na bánu kalɛ na uyɔ lɛnɔ ɔ́ƒɔ kɔbi kɔmmɔ lɛlɔ ni, liƒu bonwu lɛ́da-ma. Anwuɔsu báni bésie kama kama. 19Na básu Mose banini, “Si Unwoti úbo litemi lɛdi na wasu-bu ni, na ɔsu-ɔ na asu-bu. Na bulayɔ ka Unwoti ɔlati ɔtɛmi ute-bu. Si ɔɔɔdi lɛni bula ƒui bɔdubo bukpi.”
20Amu na Mose ɔ́su bekyuli bammɔ ɔnini, “Liƒu litada-mii. Bubo kani na Unwoti úbo ubakɔku-mii ɔnu kalɛ na bitaadi nwuna ɔda bubo lɛlɔ na bilabla likpidi lɛdi.”
21Nsu ɔmmɔ ƒui kama bekyuli bammɔ bámu benye ɔgyu baanu, na Mose lɛti kani nésie úsela kɔbi suu kɔni kemmo na Unwoti ɔ́kya mmɔ kudɔ.
Katɔti Úbo Israelƒuɔ Ɔda Na Lɛƒiɔkpa Lɛlɔ
22Amu na Unwoti ɔ́su Mose ɔnini, “Su Israelƒuɔ anini, ‘Amii alati bínu kalɛ na ami Unwoti lɛ́tɛmiku-mii lɛ́siku katɔ, 23Anwuɔsu bitese baƒiɔ badi bitebunku-mi, na biteti sika ɔƒualadi iye ugyiedi bitavɔ baƒiɔ badi bitese lɛlɔ.
24“ ‘Biti lɛti bɛtu lɛkpabi bite-mi na biti bina baƒonu ku bese ku ɔmantɛ bakɔ bitaabla bɔkyula akpala ku unwi bɔbla akpala nwuna lɛlɔ teete-mi. Na kesii biala na lɛ́su ka bɛkpa-mi na bɛkɔliku mina lɛnyi katɔ ni, ndubɔyu libo na mbete-mii kusɛ kusɛ. 25Na si bíti atabi bɛɛbla lɛkpabi bite-mi ni, biteti atabi ani na abuala na béti bábuɛ-nya, ɔsika si bíti atabi ammɔ udu bɛ́tu-ni ni, bɛdubɔya na uteese-mi lɛlɔ. 26Na bitabla akpabi na bɛsia ubili bitédu-nwu kudɔ kalɛ na bilakɔ libili lɛmmɔ na ɔdi wetédie lɛlɔ kasɔngya.’ ”
Currently Selected:
Israelƒuɔ Bɔlɛ 20: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
