Israelƒuɔ Bɔlɛ 19
19
Israelƒuɔ Bésie Sinai Kɔbi Lɛlɔ
1Kɔbuli kɔtɛdi lɛlɔ na Israelƒuɔ bésie bétédu Sinai ketele kemmo na limeyi lɛmmɔ lɛlɔ pɛpɛɛpɛ ka báta Egyipte kalɔ lɛlɔ. 2Na Reƒidim na báta asa bétédu Sinai ketele kammɔ kemmo na bábla keliekɔ na kɔbi kɔmmɔ kaƒɔna.
3Amu Mose ɔ́kɔ úsie kɔbi kɔmmɔ lili na útasiaku Katɔti. Na mmɔ ni, Unwoti ɔ́lɔ Mose na ɔ́su-nwu ɔnini, “Tásu Yakob kaduli bekyuli ku Israelƒuɔ anini, 4‘Amii alati bɛ́nu ku bina anumi lɛla lɛni na lɛ́bla Egyipteƒuɔ ku kalɛ na líti-mii aani kalɛ kɔdigbo aasɛ uuti nwuna bebi taasia nwuna avwi lɛlɔ líboku mɛni. 5Ɔƒɛni si bínu-mi litemi kaduɛ na bɛ́di mina bunyimi lɛlɔ ni, amii ndubɔbla mina bekyuli bani lɛlɔ na mina kayi kadubɔsia na kadi bekyuli ƒui akɔ, ina ka kayawi ƒui kadi mina kadi. 6Na bɛdubɔbla bakpane ku kadi kani bekyuli nse kedee bite-mi.’ Etemila ammɔ lɛsa na ɔlɛka akɔ ete Israelƒuɔ.”
7Anwuɔsu Mose ɔ́yu úbo kalɔ na ɔ́lɔ Israel batɔnkune ƒui ɔ́sala. Na ɔ́su-ma ɔda ɔni ƒui na Unwoti úbo-nwu. 8Amu na bana ƒui bédie kenye banini, “Bɔdubɔbla lɛla biala na Unwoti ɔ́su-bu.” Anwuɔsu Mose únwini útásu Unwoti kenye kani bekyuli bammɔ bédie.
9Amu na Unwoti ɔ́su Mose ɔnini, “Ndubo bɔda bɔlɛ bekyuli bammɔ kudɔ na liƒlukutu bonwu kemmo na benu ka mɔɔtɛmiku-ɔ. Na ɔ́si ɔmmɔ kama ni, badubɔƒɔ-ɔ badi.” Mose ɔ́sɔ únwini ku kenye kammɔ útásu bekyuli bammɔ.
10Amu na Unwoti ɔ́su Mose ɔnini, “Sie na atáya na baklibi lɛlɔ bese sɛɛn ɔmwi ku kɔnaadi. Na baƒɔ bana adala. 11Na baklibi lɛlɔ bese limeyi lɛtɛdi. Ɔsika limeyi lɛtɛdi lɛmmɔ lɛlɔ ndubɔyu bubo Sinai kɔbi kaƒɔna na ukyuli biala ɔnu-mi. 12Tina-ma kesii kani na ɔdi biala ubo kuƒi ka unye udu na kɔbi kɔmmɔ kudɔ. Na asu-ma ka ukyuli biala ɔ́nu kaduɛ na utakɔ utebo kɔbi kɔmmɔ lili, iye ɔni ude-ku muedi. Na si ɔdi ɔ́bla unyeƒi na ɔ́via ɔmii ɔmmɔ ni, ɔlɛka badu-nwu. 13Bɛkana na bibo-nwu atabi iye kataminta, nsu ɔdi uteti kɔnu utetuku ukyuli ɔmmɔ udu. Na ɔda bubo bɔmɛni buse bute bekyuli ku bebuo ƒui. Si ɔdi útadi-mu lɛlɔ na badu-nwu. Nsu si bínu kakpɛɛ bɔvwi ni, bekyuli bammɔ bebo kuƒi ka bakɔ besie kɔbi kɔmmɔ lili.”
14Amu na Mose ɔ́si kɔbi lili mmɔ úsie nwuna bekyuli kudɔ na ɔ́su-ma ka baklibi lɛlɔ bese bete Unwoti bɔsiaku. Anwuɔsu báƒɔ bana adala. 15Ɔmmɔ kama Mose ɔ́su-ma ɔnini, “Bɛklibi lɛlɔ bise bite limeyi lɛtɛdi. Na ɔdi utese ulekudi kudɔ.”
16Na limeyi lɛtɛdi lɛmmɔ lɛlɔ ni, kayaa kése kalɔ keedu na kaabwɛ ogya na liƒlukutu bonwu líbaƒɔ kɔbi kɔmmɔ lili. Na kɔnakunwi bénu kakpɛɛ kɔku bonwu kɔdi. Na bani ƒui nkya keliekɔ mmɔ ƒui liƒu bonwu lɛ́da-ma. 17Amu na Mose ɔ́kpanku-ma ɔlɛku bana keliekɔ usienku kɔbi kɔmmɔ kaƒɔna. 18Na sɔsɔ ni, uyɔ úyi Sinai kɔbi kɔmmɔ lɛlɔ ƒui. Ɔsika Unwoti ɔ́yu úbo kɔbi kɔmmɔ lɛlɔ ku ogya. Na uyɔ ɔmmɔ ɔɔkɔ́ katɔ aani si lɛgyavonku bonwu lɛdi na bákya ogya bálɛ, na kɔbi kɔmmɔ kɔɔkunku na lɛlɔ lɛɛtɔ́-ma kpakpaakpa na bɔyia ɔsu. 19Na bɔkɔ kani na kakpɛɛ kammɔ kɔku kɔɔkɔ́ katɔ teebu. Amu na Mose ɔ́tɛmi úte Unwoti, na Unwoti údie kenye ku katɔ budun.
20Amu na Unwoti ɔ́yu úbo Sinai kɔbi kɔmmɔ lili. Na ɔ́kpali Mose ka ɔkɔ ubo kɔbi kɔmmɔ lili. Amu na Mose ɔ́kɔ úsie mmɔ. 21Na Unwoti ɔ́su-nwu ɔnini, “Yu, na esie atásu bekyuli bammɔ ka batavia ɔmii ɔmmɔ betebo banii baawia Unwoti banu. Na si báyu atuɔkplu ni, bana ketulodikɔ badubo bukpi bɔyii udu. 22Ina bakpane bani mɔɔní teede-mi ni, ɔlɛka babla lɛlɔ sɛɛn. Si ɔɔɔdi lɛni ndubo-ma kɔtu bɔni.”
23Amu na Mose ɔ́su Unwoti ɔnini, “Bekyuli bammɔ balakana bɔkɔ bubo Sinai kɔbi kɔmmɔ lili. Ɔsika awɔ ɔlati nébo-bu ɔda anii, ‘Sia ɔmii mana kɔbi kɔmmɔ na abla mmɔ sɛsɛɛ kedee ete-mi.’ ”
24Amu na Unwoti údie Mose kenye ɔnini, “Sɔ yu sie kɔbi kɔmmɔ kalɔ, na atákpanku Aaron eboku. Nsu útalɛka bakpane ku bekyuli bammɔ bavia ɔmii ɔmmɔ, na bakɔ bebo Unwoti kudɔ. Na si báyu atuɔkplu ni, ndubo-ma kɔtu bɔni.”
25Ɔmmɔ ɔsu ɔ́yu úsie bekyuli bammɔ kudɔ na ɔ́su-ma ala ani na Unwoti ɔ́su-nwu.
Currently Selected:
Israelƒuɔ Bɔlɛ 19: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
